បាត់ដំបង ៖ កាណូតស្មាច់ជាច្រើនគ្រឿងត្រូវបានគេដឹកជញ្ជូន និងលក់តាំងផ្លូវតាំងពីខេត្តតាកែវ មកកាន់ខេត្តបាត់ដំបង សល់តែចំនួន៥គ្រឿងប៉ុណ្ណោះ ដែលគេ កំពុងទម្លាក់ចូលក្នុងស្ទឹងសង្កែដើម្បីដឹកនាំយកទៅលក់បន្តក្នុងការប្រព្រឹត្តបទល្មើសនេសាទ។
ហេតុការណ៍នេះបានកើតឡើងនៅម៉ោង១១និង២៥នាទីព្រឹកថ្ងៃទី១៦ ខែសីហា ឆ្នាំ២០១៥នេះ នៅចំណុចក្បាលស្ពានវត្តគោលត្រើយខាងកើតស្ថិតក្នុងភូមិវត្តតាមឹម ឃុំអូរដំបង១ ស្រុកសង្កែ ខេត្តបាត់ដំបង។
សេចក្ដីរាយការណ៍បានឲ្យដឹងថា មុនពេលកើតហេតុគេឃើញរថយន្តមួយគ្រឿងម៉ាកហ្វុយសូ ប្រភេទយីឌុប ពាក់ស្លាកលេខតាកែវ3A-0502 បានមកឈប់សំចត ព្រមទាំងបានទម្លាក់កាណូតស្មាច់ជាច្រើនគ្រឿង ដែលកាណូតទាំងនេះតែងតែប្រព្រឹត្តបទល្មើសនេសាទនៅតំបន់ទន្លេសាប។
កម្មករលើកាណូតម្នាក់និយាយថា កាណូតនេះបានដឹកនាំមកតាំងពីខេត្តតាកែវ ហើយក៏មានច្រើនគ្រឿងដែរ ដែលផ្ទុកនៅលើរថយន្តយីឌុបនេះ ប៉ុន្តែដោយសារតែមានម៉ូយទិញនៅតាមផ្លូវដូច្នេះទើបមកដល់ដំបងនេះសល់ចំនួនតែ៥គ្រឿងប៉ុណ្ណោះ ដោយមានគ្រឿងតម្លៃ១៦០០០០០រៀល។
សេចក្ដីរាយការណ៍បន្តថា ការដឹកនាំ និងការយកមកលក់នេះគេមិនដឹងថាតើការផលិតកាណូតស្មាច់នេះមានអាជ្ញាប័ណ្ណ ឬយ៉ាងណានោះទេ ព្រោះកន្លងមកកម្លាំងសមត្ថកិច្ច និងព្រះរាជអាជ្ញាខេត្តបាត់ដំបងក៏ធ្លាប់បានចុះបង្ក្រាបទីតាំងផលិតកាណូតស្មាច់នៅឯឃុំជីវាំង ស្រុកឯកភ្នំ ខេត្តបាត់ដំបង២ករណីផងដែរ។
បច្ចុប្បន្នកាណូតទាំងនេះកំពុងតែទម្លាក់នៅក្បាលស្ពានវត្តគរ ចុះទៅក្នុងស្ទឹងសង្កែដើម្បីអូសបន្តធ្វើដំណើរឆ្ពោះទៅកាន់បឹងទន្លេសាបទ ក្នុងគោលបំណងលក់ចែកចាយនៅទីនោះដើម្បីយកទៅប្រព្រឹត្តបទល្មើសនេសាទ៕
កាណូតស្មាច់ជាច្រើនគ្រឿងកំពុងទម្លាក់ចូលស្ទឹងសង្កែដើម្បីយកទៅប្រព្រឹត្តបទល្មើសនេសាទ
0 Comments