សមត្ថកិច្ចនគរបាល ស្រុកបរិបូណ៌បាននិយាយឲ្យដឹងថា ជនសង្ស័យរូបនោះមានឈ្មោះថោ ធួន អាយុ២៥ឆ្នាំ មានទីលំនៅភូមិឃុំកើតហេតុខាងលើ។ ចំណែកនារីរងគ្រោះមានអាយុ២១ឆ្នាំ រស់នៅក្នុងភូមិជាមួយគ្នា។
សមត្ថកិច្ចបានស្រង់សម្ដីក្នុងពាក្យបណ្តឹងរបស់ស្ត្រីជាម្តាយនារីរងគ្រោះប្តឹងថា មុនពេលកើតហេតុគាត់ជាម្តាយបានប្រើកូនស្រីឲ្យទៅមើលកណ្តាប់សំណាបនៅក្នុងស្រែ ដែលមានចម្ងាយជាង៥០ម៉ែត្រពីផ្ទះ។ ប៉ុន្តែនៅពេលកូនស្រីទៅបាត់យូរពេក ម្តាយក៏ទៅតាមរក ស្រាប់តែជិតដល់ជន្លង់ចំបើង មានចម្ងាយជាង៣០ម៉ែត្រពីផ្ទះ ក៏ឃើញកូនស្រីគាត់រត់ទាំងអាក្រាតមករកគាត់ ជាម្តាយ ដោយយំប្រាប់ថា ឈ្មោះធួន ចាប់នាងរំលោភ ពេលនោះគាត់ជាម្តាយបានឃើញឈ្មោះ ធួន រត់គេចខ្លួនបាត់ទៅ។
ស្ត្រីជាម្តាយនារីរងគ្រោះ បាននិយាយឲ្យអ្នកសារព័ត៌មានយើងដឹងថា មូលហេតុនាំឲ្យមានការយឺតយ៉ាវក្នុងការប្តឹង គឺមកពីដោយសារជនសង្ស័យជាអ្នកស្រុកអ្នកភូមិជាមួយគ្នា មិនចង់ឲ្យវែងឆ្ងាយ គាត់បានហៅមកសម្របសម្រួលគ្នាដោយឲ្យខាងប្រុសទទួលខុសត្រូវ និងរៀបចំទុកដាក់ជាប្តីប្រពន្ធតែខាងប្រុសមិនព្រមយក ហើយក៏ឈានដល់ការចរចារគ្នាសំណងជាប្រាក់ ដែលដំបូងឡើយគាត់ទារ៥ពាន់ដុល្លារ ហើយក៏បានចរចាគ្នាត្រូវត្រឹមសំណង២ពាន់ និងបានសន្យាប្រគល់ប្រាក់នៅថ្ងៃទី០៦ ខែសីហា ឆ្នាំ២០១៥។ លុះដល់ថ្ងៃកំណត់ប្រគល់ប្រាក់ ស្រាប់តែខាងប្រុងប្រាប់ថាៈ គ្មានប្រាក់ទេ ប្តឹងដល់ណាប្តឹងទៅ។ ដោយសារតែហេតុនេះហើយទើបគាត់សម្រេចប្តឹងឲ្យផ្តន្ទាទោសតាមផ្លូវច្បាប់។
នៅចំពោះមុខសមត្ថកិច្ចនគរបាលព្រហ្មទណ្ឌកម្រិតធ្ងន់ខេត្ត ជនសង្ស័យរូបនោះបានសារភាពថា ខ្លួនបានស្គាល់នារីរងគ្រោះជាង១ខែមកហើយ មុនពេលកើតហេតុខ្លួនបានទូរស័ព្ទហៅនាងមកជួប និងបានស្រឡាញ់គ្នាដោយពុំមានការចាប់បង្ខំឡើយ ប៉ុន្តែពេលម្តាយនាងមកទាន់នាងបែរជាយំស្រែកប្រាប់ម្តាយនាងថា ខ្លួនចាប់រំលោភនាងទៅវិញ។ ចំពោះការសងប្រាក់ខ្លួនមានតែ១ពាន់ដុល្លារយកទៅសង ដោយសន្យាថា២ទៅ៣ថ្ងៃទៀតនឹងឲ្យបង្គ្រប់ តែម្តាយខាងស្រីមិនព្រមទើបមានការប្តឹងផ្តល់តែម្តងទៅ។
លោកឌុច ចំរើន នាយការិយាល័យនគរបាលព្រហ្មទណ្ឌកម្រិតធ្ងន់ខេត្ត ឲ្យដឹងថា តាមចម្លើយជនសង្ស័យ និងការប្តឹងរបស់ម្តាយនារីរងគ្រោះ សាច់រឿងមិនស៊ីចង្វាក់គ្នាឡើយ។ ករណីនេះសមត្ថកិច្ចបានកសាងសំណុំរឿងបញ្ជូនរឿងទៅតុលាការខេត្ត ចាត់ការតាមផ្លូវច្បាប់៕
ចាប់រំលោភកូនស្រីគេនៅជន្លង់ចំបើង ម្តាយគេមកទាន់សម្រួលមិនត្រូវគ្នាប្តឹងសមត្ថកិច្ចចាប់ខ្លួន
0 Comments