ការសិក្សាស្រាវជ្រាវបានបង្ហាញឲ្យឃើញថា វ៉ាក់សាំងថ្មីត្រូវបានគេស្គាល់ឈ្មោះថា VSV-ZEBOV អាចជួយបញ្ចប់ករណីចម្លងរាលដាលនៃ Ebola។ នេះជាការលើកឡើងដោយវេជ្ជបណ្ឌិត Dr. Amesh Adalja អ្នកឯកទេសផ្នែកជំងឺឆ្លង ហើយជាមន្ដ្រីជាន់ខ្ពស់នៃសាកលវិទ្យាល័យ University of Pittsburgh Medical Center’s Center for Health Security។
នៅក្នុងការសិក្សាស្រាវជ្រាវនោះ ក្រុមអ្នកស្រាវជ្រាវនៅប្រទេសហ្គីណេ បានចាក់វ៉ាក់សាំងឲ្យមនុស្សទាំងឡាយដែលប៉ះពាល់ជាមួយអ្នកដែលរងការចម្លង Ebola។ បើតាមភាសាបច្ចេកទេសវិញ វ៉ាក់សាំងប្រភេទនេះ ហៅថា ring vaccination គឺសម្រាប់ចាក់បង្ការមនុស្សផងទាំងឡាយដែលស្ថិតនៅជុំវិញអ្នកកើត Ebola រួចទៅហើយនោះ។
មិនមានករណី Ebola ថ្មី ត្រូវបានរកឃើញទៀតទេ អំឡុង១០ថ្ងៃ ឬច្រើនលើសពីនេះ បន្ទាប់ពីការចាក់វ៉ាក់សាំងនៅក្នុងក្រុមមនុស្សដែលទទួលបានការចាក់វ៉ាក់សាំងជាបន្ទាន់នោះ គឺនៅតំបន់ដែលមានមនុស្ស១៦នាក់ កំពុងតែវិវឌ្ឍទៅនៃជំងឺ Ebola ទៅហើយ។ នេះជាការបង្ហាញឲ្យឃើញថា ចំពោះមនុស្សផងទាំងឡាយ ដែលបានទទួលការចាក់វ៉ាក់សាំងបន្ទាន់នោះ គឺវ៉ាក់សាំងមានប្រសិទ្ធភាព១០០ភាគរយ នេះបើយោងតាមការសិក្សាស្រាវជ្រាវដែលទទួលបានលទ្ធផលជាទីគាប់ចិត្ដ។ ដោយឡែកលទ្ធផលនៃការសិក្សាស្រាវជ្រាវនោះត្រូវបានចុះផ្សាយនៅក្នុងព្រឹត្ដិបត្រ Journal the Lancet ចុះថ្ងៃទី៣១ ខែកក្កដា ក្រោមចំណងជើងថា “10 Deadly Diseases That Hopped Across Species”។
លោក Adalja និយាយថា ការសិក្សាស្រាវជ្រាវនេះ គឺជាព័ត៌មានមួយដ៏អស្ចារ្យ ដោយសារតែអត្រានៃការការពារមានប្រសិទ្ធភាពដល់ទៅ១០០ភាគរយរបស់វា។
ការរកឃើញថ្មីៗនេះ គឺជាចំណែកនៃការវិភាគបឋមនៃការពិសោធសាកល្បងវ៉ាក់សាំង។ ប្រសិនបើលទ្ធផលទាំងឡាយនោះត្រូវបានបញ្ជាក់អះអាងដោយការសិក្សាស្រាវជ្រាវនៅពេលអនាគតនោះ វាមានន័យថា ប្រភេទវ៉ាក់សាំុងដែលត្រូវបានគេហៅថា “ring vaccination” ស្ថិតនៅជាយុទ្ធសាស្ដ្រដូចគ្នា ដូចធ្លាប់ត្រូវបានគេប្រើប្រាស់នៅក្នុងរយៈពេលប៉ុន្មានទសវត្សរ៍កន្លងមក ក្នុងការទប់ស្កាត់ជំងឺអុតធំ (smallpox) ដែលនឹងត្រូវបានប្រើប្រាស់នៅក្នុងការចម្លងរាលដាលនៃ Ebola តទៅអនាគត។ លោក Adalja បានមានប្រសាសន៍ដូច្នេះ។
ទោះជាយ៉ាងណាក្ដី ក៏មានមនុស្សម្នាក់កើតអាការៈគ្រុន ដែលនោះជាប្រតិកម្មនៃវ៉ាក់សាំងតែប៉ុណ្ណោះ។ នៅមានតម្រូវការដើម្បីបន្ដស្រាវជ្រាវឲ្យបានច្រើនថែមទៀតទៅលើប្រតិកម្មនៃវ៉ាក់សាំង។ ដូច្នេះទាំងគ្រូពេទ្យ និងអ្នកជំងឺ អាចយល់ដឹងថា តើប្រតិកម្មដោយសារការចាក់វ៉ាក់សាំងនោះ យ៉ាងដូចម្ដេចខ្លះទៅ។ លោក Adalja បានបញ្ជាក់ប្រាប់អំពីករណីបែបយ៉ាងនេះ៕
AFP
វ៉ាក់សាំង Ebola ថ្មី ៖ តើវាអាចជួយបញ្ចប់ការចម្លងរាលដាលដែរទេ?
0 Comments