ភ្នំពេញ ៖ ស្ថានទូតនៃព្រះរាជាណាចក្រកម្ពុជាប្រចាំនៅប្រទេសថៃ បានធ្វើអន្តរាគមន៍ឲ្យអាជ្ញាធរថៃដោះលែងពលរដ្ឋខ្មែរ២នាក់ ដែលត្រូវបានចាប់ខ្លួនពាក់ព័ន្ធ នឹងការប្រើប្រាស់ទិដ្ឋាការក្លែងក្លាយ។ នេះបើតាមការបញ្ជាក់ពីលោកជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា។
លោកជុំ សុន្ទរី បានបញ្ជាក់ប្រាប់កម្ពុជាថ្មីថា ក្រសួងការបរទេស និងសហប្រតិបត្តិការអន្តរជាតិបានណែនាំឲ្យស្ថានទូតកម្ពុជាប្រចាំនៅប្រទេសថៃ ទំនាក់ទំនងជាមួយអាជ្ញាធរថៃ សុំឲ្យធ្វើការដោះលែងពលរដ្ឋខ្មែរ២នាក់ ឈ្មោះថន សុភា ភេទប្រុស អាយុ៣៩ឆ្នាំ និងឈ្មោះស៊ុក សុវណ្ណ ភេទប្រុស អាយុ៤២ឆ្នាំ ដែលត្រូវបានអាជ្ញាធរថៃចាប់ខ្លួនកាលពីថ្ងៃទី១៩ ខែសីហា ឆ្នាំ២០១៥ ពីបទប្រើប្រាស់ទិដ្ឋាការក្លែងក្លាយ ហើយកំពុងត្រូវបានឃុំខ្លួននៅពន្ធនាគារប៉ាតាយ៉ា រ៉េម៉ង់ (Pattaya Remand)។
តាមអ្នកនាំពាក្យក្រសួងការបរទេសបញ្ជាក់ថា ឪពុកម្តាយរបស់ជនរងគ្រោះទាំងពីរនាក់ បានស្នើសុំក្រសួងការបរទេស និងសហប្រតិបត្តិការ អន្តរជាតិ ជួយអន្តរាគមន៍ជាមួយអាជ្ញាធរថៃ ដោះលែងកូនរបស់ពួកគាត់បានវិលត្រឡប់មកកម្ពុជាវិញ ដោយបានអះអាងថា ទិដ្ឋាការរបស់កូនទាំង២នាក់ ត្រូវបានមេខ្យល់ឈ្មោះសំអាង អ៊ីង ជាអ្នកធ្វើឲ្យ ហើយមេខ្យល់រូបនេះបានប្រាប់ថាជាទិដ្ឋាការស្របច្បាប់។
ជាមួយគ្នានោះ ក្រសួងការបរទេស និងសហប្រតិបត្តិការអន្តរជាតិ បានធ្វើការអំពាវនាវជាថ្មីដល់ពលរដ្ឋខ្មែរយើងសូមឲ្យមានការប្រុងប្រយ័ត្នឲ្យបានខ្លាំង ចំពោះឧបាយកលបោកប្រាស់គ្រប់រូបភាពរបស់មេខ្យល់ ដែលគិតតែពីផលប្រយោជន៍ផ្ទាល់ខ្លួនរបស់ពួកគេតែប៉ុណ្ណោះ៕
ស្ថានទូតកម្ពុជានៅថៃធ្វើអន្តរាគមន៍ឲ្យដោះលែងពលរដ្ឋខ្មែរ២នាក់
0 Comments