កំពង់ចាម ៖ កម្លាំងការិយាល័យនគរបាលប្រឆាំងគ្រឿងញៀនខត្តកំពង់ចាមក្នុងរយៈពេល២ថ្ងៃបានបង្ក្រាបករណីជួញដូរថ្នាំញៀនចំនួន២លើក និងដកហូតថ្នាំញៀនប្រភេទក្រាមពណ៌សចំនួន៨កញ្ចប់ព្រមទាំងឃាត់ខ្លួនជនសង្ស័យបានចំនួន៣នាក់រៀបចំបញ្ជូនទៅតុលាការចាត់ការតាមផ្លូវច្បាប់។
លោកវរសេនីយ៍ទោ សោម រស់ ប្រធានការិយាល័យប្រឆាំងគ្រឿងញៀនខេត្តកំពង់ចាមបានឲ្យដឹងថា នៅថ្ងៃទី០៦ ខែកញ្ញា ឆ្នាំ២០១៥ សមត្ថកិច្ចបានទទួលព័ត៌មានពីប្រជាពលរដ្ឋថា មានការធ្វើចរាចរថ្នាំញៀនលាក់ក្នុងនំប៉័ងផ្ញើពីភ្នំពេញតាមរយៈអ្នករត់តាក់ស៊ីមកឲ្យមុខសញ្ញានៅស្រុកចំការលើ ខេត្តកំពង់ចាម។ នៅវេលាម៉ោង១៧និង១៧នាទីថ្ងៃដដែល កម្លាំងសមត្ថកិច្ចដែលឃ្លាំមើលរថយន្តសង្ស័យមកពីភ្នំពេញហើយយកនំប៉័ង(ជាបញ្ញើ)មកប្រគល់ឲ្យជនសង្ស័យម្នាក់ដែលបានរង់ចាំនៅចំណុចភូមិជយោឃុំជយោស្រុកចំការលើ ភ្លាមៗនោះភ្នាក់ងាររបស់សមត្ថកិច្ចបានធ្វើការឆែកឆេរនំប៉័ងនោះក៏ប្រទះឃើញថ្នាំញៀនប្រភេទក្រាមពណ៌ស១កញ្ចប់ធំ មានទម្ងន់១,៦៧ក្រាម។ ផ្អែកតាមភស្តុតាងជាក់ស្ដែង សមត្ថកិច្ចក៏បានឃាត់ខ្លួនជនសង្ស័យឈ្មោះ ម៉េង ឃីន ភេទប្រុស អាយុ៣៨ឆ្នាំ មានទីលំនៅភូមិជយោ ឃុំជយោ ខេត្តកំពង់ចាម។
លោក សោម រស់ បានបន្តថា នៅថ្ងៃទី៧ ខែកញ្ញា ឆ្នាំ២០១៥ វេលាម៉ោង១៧និង៣០នាទីសមត្ថកិច្ចបានប្រើវិធានការជំនាញបង្ក្រាបករណីជួញដូរថ្នាំញៀននៅចំណុចថ្នល់កែង ស្ថិតក្នុងភូមិតាបែក ឃុំសំបូរ ស្រុកបាធាយ ខេត្តកំពង់ចាម ដោយបានឃាត់ខ្លួនជនសង្ស័យចំនួន២នាក់ គឺ ១-ហាក់ ធារិទ្ធ ភេទប្រុស អាយុ២៥ឆ្នាំ មុខរបរជាងបិទស្គុតម៉ូតូ រស់នៅភូមិតាបែក ឃុំសំបូរ ស្រុកបាធាយខេត្តកំពង់ចាម។ ២-កែម វាសនា ភេទប្រុស អាយុ១៤ឆ្នាំ ជាសិស្សរស់នៅភូមិភ្នំដិល ឃុំតាំងក្រាំង ស្រុកបាធាយ ខេត្តកំពង់ចាម។
លោក សោម រស់ បញ្ជាក់ថា ក្នុងការឃាត់ខ្លួនជនសង្ស័យខាងលើ សមត្ថកិច្ចបានដកហូតថ្នាំញៀនប្រភេទក្រាមពណ៌សចំនួន៧កញ្ចប់ ទូរស័ព្ទដៃចំនួន៣គ្រឿង ដាវ១ដើម ឧបករណ៍សេពគ្រឿងញៀនមួយចំនួន ប្រាក់រៀលចំនួន១,០០០,០០០រៀល(មួយលានរៀល)។
លោកវរសេនីយ៍ឯក ឯម កុសល ស្នងការរង និងជាប្រធានការិយាល័យកណ្ដាលប្រឆាំងបទល្មើសបានឲ្យដឹងថា ជនសង្ស័យទាំង៣នាក់ រួមនឹងវត្ថុតាងថ្នាំញៀនចំនួន៨កញ្ចប់(២ករណី)ខាងលើនេះត្រូវបានបញ្ជូនទៅសាលាដំបូងខេត្តកំពង់ចាមនៅថ្ងៃទី៨ ខែកញ្ញា ឆ្នាំ២០១៥ ដើម្បីចាត់ការតាមផ្លូវច្បាប់៕
បង្ក្រាបករណីជួញដូរថ្នាំញៀនឃាត់ខ្លួនជនសង្ស័យ៣នាក់បញ្ជូនទៅតុលាការ
0 Comments