បន្ទាយមានជ័យ ៖ មន្ត្រីសាខាកាំកុងត្រូលខេត្តបន្ទាយមានជ័យដើម្បីសុវត្ថិភាពចំណីអាហារជូនប្រជាពលរដ្ឋនាព្រឹកថ្ងៃទី៨ ខែកញ្ញា ឆ្នាំ២០១៥ បានដឹកនាំកម្លាំងចុះត្រួតពិនិត្យម្ហូបអាហាររកសារធាតុគីមីដែលដាក់ក្នុងម្ហូបអាហារបង្កការប៉ះពាល់ដល់សុខភាពនៅផ្សារត្រី ក្នុងសង្កាត់/ក្រុងប៉ោយប៉ែត។
លោក ហុង លាង អនុប្រធាន នៃសាខាកាំកុងត្រូលខេត្តបន្ទាយមានជ័យបានឲ្យដឹងថា ជាបន្តបន្ទាប់ជំនាញរបស់លោកតែងចុះត្រួតពិនិត្យការតាំងលក់ទំនិញតាមផ្ទះ ស្តង់ ផ្សារ របស់អាជីវករដើម្បីរកទំនិញដែលហួសការប្រើប្រាស់ និងគ្មានគុណភាព ពិសេសពិនិត្យរកសារធាតុហ្វមូលីមដែលសម្រាប់រក្សាសាច់ឲ្យស្រស់ និងកុំឲ្យស្អុយលើចំណីអាហារជាដូចជា លើគ្រឿងសមុទ្រ សរសៃគុយទាវ។
ជាក់ស្ដែងការចុះត្រួតពិនិត្យនេះបានធ្វើតេស្តទៅលើគ្រឿងសមុទ្រ និងអំបិលឃើញថាពុំមានប្រើប្រាស់សារធាតុដែលនាំឲ្យប៉ះពាល់សុខភាពពលរដ្ឋឡើយ។ ជាមួយគ្នានោះក៏បានធ្វើការណែនាំដល់អាជីវករត្រូវតាំងលក់ទំនិញឲ្យមានគុណភាព។
លោក ស៊ាន ស៊ីណាត ប្រធានសាខាកាំកុងត្រូលខេត្តបន្ទាយមានជ័យបានបញ្ជក់ថា អ្វីដែលជាគោលដៅសំខាន់របស់កាំកុងត្រូល គឺធ្វើយ៉ាងណាផ្សព្វផ្សាយណែនាំអាជីវករពលរដ្ឋឲ្យយល់ពីម្ហូបអាហារដែលច្បាប់ហាមឃាត់ និងប៉ះពាល់សុខភាព ហើយរកឲ្យឃើញនៅទំនិញខូចគុណភាពដាក់លក់តាមទីផ្សារ៕
កាំកុងត្រូលចុះពិនិត្យរកសារធាតុគីមីលើម្ហូបអាហារនៅផ្សារត្រីប៉ោយប៉ែត
0 Comments