បាត់ដំបង ៖ យុវជនម្នាក់ដែលជាអ្នកបើកបរម៉ូតូបានស្លាប់ភ្លាមៗ និងយុវជនម្នាក់ទៀតដែលរួមដំណើរជាមួយក៏រងរបួសធ្ងន់ដែរ នៅក្នុងករណីគ្រោះថ្នាក់ចរាចរមួយដែលបានកើតឡើងកាលពីថ្ងៃទី៣០ ខែតុលា ឆ្នាំ២០១៥ វេលាម៉ោង១២និង៥០នាទីថ្ងៃត្រង់នៅលើកំណាត់ផ្លូវក្រាលកៅស៊ូក្នុងស្រុកមួយកន្លែងស្ថិតក្នុងភូមិចាមរអា ឃុំព្រៃស្វាយ ស្រុកមោងឫស្សី ខេត្តបាត់ដំបង ខណៈដែលអ្នកបើកបរស្រវឹងហើយជ្រេចង្កូតធ្លាក់ផ្លូវ។
លោកអធិការរង ឌឿន សម្បត្តិ បានបញ្ជាក់ថា នៅមុនពេលកើតហេតុគឺមានម៉ូតូម៉ាកឌ្រីមមួយគ្រឿងពណ៌ខ្មៅ ពាក់ស្លាកលេខ បាត់ដំបង 1R-8280 ដោយមានជិះគ្នា២នាក់ រីឯអ្នកបើកបរមានឈ្មោះ សែន រតនា ភេទប្រុស អាយុ២៦ឆ្នាំ រស់នៅភូមិនិគមក្រោម ឃុំឫស្សីក្រាំង ស្រុកមោងឫស្សី ដោយពួកគេបានបើកបរយ៉ាងលឿនក្នុងទិសដៅចុះពីផ្លូវជាតិលេខ៥ឆ្ពោះទៅកាន់ស្រុករុក្ខគិរី។
លោកអធិការរងបានបន្តថា លុះទៅដល់ត្រង់ចំណុចកើតហេតុដែលជាចំណុចផ្លូវកោងស្រាប់តែអ្នកកាន់ចង្កូតបានជ្រេធ្លាក់ផ្លូវ បោកធ្លាក់ទៅក្នុងប្រឡាយបណ្ដាលឲ្យអ្នកបើកបរបានស្លាប់ភ្លាមៗនៅនឹងកន្លែងកើតហេតុនោះតែម្តង ដោយឡែកអ្នករួមដំណើរក៏ត្រូវរងរបួសជាទម្ងន់ផងដែរ។
ក្រោយពេលសមត្ថកិច្ចចុះត្រួតពិនិត្យគឺសង្កេតឃើញថា ជនរងគ្រោះទាំងពីរនាក់ស្ថិតក្នុងភាពស្រវឹងទាំងអស់គ្នា ហើយបានប្រើប្រាស់ល្បឿននៃការបើកបរលឿនហួសកំណត់ថែមទៀតផងទើបបណ្ដាលឲ្យមានករណីគ្រោះថ្នាក់ចរាចរណ៍កើតឡើងបែបនេះ ហើយក្រោយពេលកើតហេតុសមត្ថកិច្ចក៏បានប្រគល់សពទៅឲ្យក្រុមគ្រួសារយកទៅធ្វើបុណ្យតាមប្រពៃណី ចំណែកអ្នករបួសក៏កំពុងសម្រាកព្យាបាលនៅឯមន្ទីរពេទ្យបង្អែកស្រុកមោងឫស្សីផងដែរ៕
ស្រវឹងបើកបរលឿន ជ្រុលធ្លាក់ប្រឡាយបាក់.កស្លាប់
0 Comments