វេទិកាកំពុងសាងសង់សម្រាប់ការប្រគំតន្ត្រីនាពេលខាងមុខ បានបាក់រលំ កាលពីថ្ងៃព្រហស្បតិ៍ នៅក្នុងទីក្រុងណានជីង ដែលរដ្ឋធានីនៃខេត្តក្វាងស៊ី ប្រទេសចិន បានសម្លាប់មនុស្សម្នាក់ និង ១៣ នាក់ផ្សេងទៀត រងរបួស។
យោងតាមការអះអាងរបស់ក្រុមអាជ្ញាធរបានឲ្យដឹងថា ឧប្បត្តិហេតុនេះ បានកើតឡើងនៅវេលាម៉ោង ១៧ ល្ងាច នៅក្នុងមជ្ឈមណ្ឌលកីឡាក្វាងស៊ី នៅពេលដែលក្រុមកម្មករកំពុងមមាញឹកធ្វើរោងសម្រាប់ប្រើប្រាស់ជាវេទិកាប្រគំតន្ត្រីរបស់តារាចម្រៀងស្រីតៃវ៉ាន គឺនាង ចូលីន សៃ។
ក្រុមអាជ្ញាធរបានបញ្ជាក់ថា មនុស្សម្នាក់ក្នុងចំណោមអ្នករងរបួស កំពុងស្ថិតក្នុងស្ថានភាពធ្ងន់ធ្ងរ ខណៈដែលអ្នកដទៃទៀត ត្រឹមតែរងរបួសស្រាលប៉ុណ្ណោះ។
កម្មករម្នាក់ ដែលរងរបួសក្នុងហេតុការណ៍រលំវេទិកាប្រគំតន្ត្រីនេះបាននិយាយថា លោកបានឈរជិតវេទិកាប្រគំតន្ត្រី ហើយភ្លាមៗនោះស្រាប់តែឮសម្លេងប្រាវតែម្តង ធ្វើឲ្យចម្រឹងដែករលំលើរូបលោក តែសំណាងល្អ ដែលលោកនៅម្ចាស់ការលើខ្លួនឯង រួចក៏ស្ទុះក្រោកឈរឡើងរត់ចេញក្រៅតែម្តង។
បច្ចុប្បន្ន ការស៊ើបអង្កេតកំពុងបន្តដើម្បីស្វែងរកមូលហេតុពិតប្រាកដ ដែលបណ្តាលឲ្យមានការរលំវេទិកាប្រគំតន្ត្រីមួយនេះ៕
មនុស្សម្នាក់ស្លាប់ក្នុងហេតុការណ៍រលំវេទិកាប្រគំតន្ត្រីនៅតំបន់ភាគខាងត្បូងប្រទេសចិន
0 Comments