ពោធិ៍សាត់ ៖ គ្រោះថ្នាក់ចរាចរណ៍មួយបានកើតឡើង ដោយម្ចាស់រថយន្តមិនលើកលែងឲ្យរួចខ្លួនងាយៗឡើយ ខណៈដែលបុកក្របីមេមួយក្បាលងាប់រកម្ចាស់មិនឃើញប្តឹងទារសំណងរហូតផ្អើលស្នងការនិងព្រះរាជអាជ្ញា បញ្ជាឲ្យលក់ក្របីនោះសងសំណងម្ចាស់រថយន្តដែលខូចខាតក្នុងឧប្បត្តិហេតុនេះ។
ហេតុការណ៍គ្រោះថ្នាក់នេះបានកើតឡើងកាលពីវេលាម៉ោង៨និង២០នាទីយប់ថ្ងៃទី៣០ ខែតុលា ឆ្នាំ២០១៥ ត្រង់ចន្លោះគីឡូម៉ែត្រលេខ១៤៧និង១៤៨ លើផ្លូវជាតិលេខ៥ក្នុងភូមិត្រពាំងរំដេញ ឃុំក្បាលត្រាច ស្រុកក្រគរ ខេត្តពោធិ៍សាត់។
លោក ខៀវ សុខា មេប៉ុស្តិ៍នគរបាលឃុំក្បាលត្រាចបានឲ្យដឹងថា មានរថយន្តមួយគ្រឿងប្រភេទហាយឡិនឌឺ ពណ៌ទឹកប្រាក់ គ្មានទាន់មានស្លាកលេខ ដោយទើបតែទិញពីឃ្លាំង ដោយម្ចាស់ជាអ្នកបើកបរឈ្មោះ សេង ពលៈ អាយុ៣៣ឆ្នាំរស់នៅ ស្រុកបាភ្នំ ខេត្តបាត់ដំបង។ បានធ្វើចរាចរណ៍ពីកើតទៅលិចលើទ្រូងផ្លូវជាតិលេខ៥នៃផ្លូវអាទិភាព ដោយប្រើប្រាស់ល្បឿនលឿនគួរសម ពេលមកដល់ចំណុចកើតហេតុខាងលើ បានជួបនិងក្របីមេ២ក្បាលរត់ឆ្លងផ្លូវជាតិ ដោយគេចក្របីមេមួយក្បាលផុតស្រាប់តែ ក្របីមេមួយក្បាលទៀតស្ទុះរត់មកទៀតក៏បុកក្របីនោះងាប់តែម្ដង។
លោក សុខា បន្តថា ក្រោយពេលបុកក្របីនោះងាប់ភ្លាមរថយន្តទើបតែទិញនោះបានរងការខូចខាតផ្នែកខាងមុខ មួយចំនួនធ្វើឲ្យម្ចាស់រថយន្តអត់ខ្ចីទៅណាក៏បានប្ដឹងនគរបាលប៉ុស្តិ៍ទាំងយប់ រកមុខម្ចាស់ក្របី ដើម្បីឲ្យសងជាសំណងដែលត្រូវជួសជុលរថយន្ត។ តែម្ចាស់ក្របីនោះមិនចេញមុខឡើយ ធ្វើឲ្យរឿងនេះកាន់តែឡើងកម្ដៅ រហូតដល់លោកអធិការនគរបាលស្រុកក្រគរ។
លោក អែម រុន អធិការនគរបាលស្រុកក្រគរបានឲ្យដឹងថា ក្រោយពេលទទួលពាក្យបណ្ដឹងពីជនរងគ្រោះតាមរយៈរដ្ឋបាលប៉ុស្តិ៍កន្លែងកើតហេតុ ហើយជនរងគ្រោះប្រញាប់យករថយន្តទៅជួសជុលទៀត ទើបបង្ខំចិត្តរាយការណ៍ទៅស្នងការនិងព្រះរាជអាជ្ញា ផ្អើលទាំងយប់លើករណីនេះ រហូតដល់ព្រឹកថ្ងៃទី៣១ ខែតុលា ដោយប្រកាសរកម្ចាស់ក្របីមិនឃើញក៏ហៅអាជ្ញាធរ តាមបញ្ជាតុលាការលក់ក្របីមេងាប់មួយក្បាលនេះ ព្រោះមានសភាពហើមបន្តិចហើយ ក៏លក់បាន២០០ដុល្លារ ប្រគល់ឲ្យម្ចាស់រថយន្តនោះទាំងអស់នៅវេលាម៉ោង១០ព្រឹកថ្ងៃ៣១ ខែតុលានោះ ទើបម្ចាស់រថយន្តនេះព្រមបញ្ចប់រឿងយកលុយនេះបើករថយន្តចេញបាត់តែម្ដង។
លោកអធិការបន្តថា ទោះជាម្ចាស់រថយន្តនោះទៅបាត់និងដោះស្រាយរួចរាល់ក៏ដោយក៏ម្ចាស់ក្របីនេះមិនខ្ចីចេញមុខដែរ តែយ៉ាងណាលោកសូមឲ្យបងប្អូនប្រជាពលរដ្ឋទាំងអស់ជាម្ចាស់សត្វពាហនៈ ទាំងនេះសូមមេត្តាការពារទ្រព្យសម្បត្តិផ្ទាល់ខ្លួនឲ្យបានល្អ កុំដើរពាសវាលពាសកាលជាពិសេសលើផ្លូវសាធារណៈដែលគេកំពុងចរាចរណ៍ទៅមកនេះ វាអាចបង្កហេតុបាត់បង់ទ្រព្យសម្បត្តិផ្ទាល់ខ្លួន និងបាត់បង់ជីវិតអ្នកដំណើរឬក៏ទ្រព្យសម្បត្តិផ្សេងៗជាដើម៕
ទើបទិញរថយន្តថ្មីៗបុកក្របីឆ្លងផ្លូវងាប់មួយក្បាលរកម្ចាស់ក្របីមិនឃើញលក់បាន២០០ដុល្លារទើបព្រមបើករថយន្តទៅ
0 Comments