កំពង់ឆ្នាំង ៖ លោក ចក់ កែវចំរើន ប្រធានការិយាល័យបេឡាអតីតយុទ្ធជន លោក កែវ ភក្តី ប្រធានការិយាល័យអតីតយុទ្ធជននៃមន្ទីរសង្គមកិច្ចខេត្តកំពង់ឆ្នាំង និងលោក ឆេង លីមេភូមិសំរោង នៅព្រឹកថ្ងៃទី៣១ខែតុលា ឆ្នាំ២០១៥ បាននាំយកអំណោយផ្ទាល់ខ្លួននិងអំណោយរបស់លោក អេង ណារិទ្ធិ ប្រធានការិយាល័យនៃមន្ទីរសុរិយោដីខេត្តកំពង់ឆ្នាំងនិងអំណោយរបស់ លោក ឡី ថាធី លក់គ្រឿងសំណង់គ្រប់ប្រភេទដែលមានទីតាំងនៅក្រោយមន្ទីរពេទ្យខេត្តនិងសង្កាត់ខ្សាមក្រុងកំពង់ឆ្នាំង ទៅជូនដល់លំនៅដ្ឋានគ្រួសារក្រីក្រចាស់ជរាគ្មានទីពឹងចំនួន៤គ្រួសារនៅភូមិសំរោង សង្កាត់ផ្សារឆ្នាំង ក្រុងកំពង់ឆ្នាំង។
លោក កែវ ភក្តី បានឲ្យដឹងថា គ្រួសារទាំង៤ក្រីក្រនោះមាន ១.ឈ្មោះ លោកយាយ ស៊ុំ សៀន អាយុ៨០ឆ្នាំ រស់នៅតែម្នាក់ឯងគ្មានទីពឹង ,២.ឈ្មោះ មាស ពេជ្រ អាយុ៣៦ឆ្នាំ បុរសពោះម៉ាយចិញ្ចឹមកូន៧នាក់មុខរបបនេសាទត្រី, ៣.លោកយាយ កា ចាន អាយុ៦១ឆ្នាំ មានជំងឺលើសឈាមរស់នៅម្នាក់ឯងលើដីគេ, ៤.លោក ហម មឿន អាយុ៤៤ឆ្នាំមានជំងឺរស់នៅ២នាក់ប្តីប្រពន្ធគ្មានកូនដើរបេះបន្លែលក់។
លោកបានបញ្ជាក់ទៀតថា អំណោយដែលបានយកមកផ្តល់ជូនក្នុងមួយគ្រួសារៗទទួលបាន អង្ករ១០គីឡូក្រាម ,មី១កេះ, ទឹកត្រី១យួរ ,ទឹកស៊ីអ៊ីវ១យួរ, ប៊ីចេង១កញ្ចប់ និងថវិកា២ម៉ឺនរៀលផងដែរ។
លោក ចក់ កែវចំរើន បាននិយាយថា អំណោយទាំងអស់ខាងលើនេះ ទោះបីតិចតូចមែនក៏អាចជួយសម្រួលដល់ការលំបាកដល់គ្រួសារក្រីក្របានមួយគ្រាផងដែរ។
លោកបានធ្វើការផ្តាំផ្ញើដល់ក្រុមគ្រួសារទាំង៤ សូមរស់នៅមានអនាម័យល្អ ខិតខំថែទាំសុខភាពឲ្យបានល្អប្រសើរ និងខិតខំប្រកបមុខរបរចិញ្ចឹមជីវិតដោយសុចរិត និងបើមានជំងឺត្រូវទៅកាន់មន្ទីរពេទ្យខេត្តព្យាបាលពេលវេលា កុំទុកឲ្យធ្ងន់ធ្ងរពិបាកព្យាបាល ហើយបើគ្មានលទ្ធភាពក៏ត្រូវរាយការណ៍ជូនអាជ្ញាធរភូមិ សង្កាត់ឲ្យបានដឹងទាន់ពេល ដើម្បីជួយអំពាវនាវដល់សប្បុរសជនឲ្យជួយឧបត្ថម្ភ៕
គ្រួសារក្រីក្រចាស់ជរាគ្មានទីពឹងចំនួន៤គ្រួសារបានទទួលអំណោយពីសប្បុរសជន
0 Comments