ឧត្តរមានជ័យ ៖ យុវជនវ័យ២៦ឆ្នាំម្នាក់ត្រូវនគរបាលចាប់ខ្លួនយកទៅសួរនាំកាលពីវេលាម៉ោង១៦និង៣០នាទី ល្ងាចថ្ងៃទី១៤ ខែតុលា ឆ្នាំ២០១៥ នៅភូមិស្លែងពណ៌ ឃុំ ត្រពាំងតាវ ស្រុក អន្លង់វែង ខេត្តឧត្តរមានជ័យ ក្រោយពីបានធ្វើសកម្មភាពយកខ្នងពូថៅវាយក្បាលរបស់បងប្រុសខ្លួនបណ្តាលឲ្យរបួស ព្រោះជម្លោះពាក្យសំដី និងទ្រាំជាមួយការជេរប្រមាថមិនបាន។
ជនសង្ស័យដែលសមត្ថកិច្ចចាប់ខ្លួនមានឈ្មោះ វ៉ាត់ សំបូរ ភេទប្រុស២៦ឆ្នាំ ជាប្អូន រីឯជនរងគ្រោះមានឈ្មោះ វ៉ាត់ មាន ភេទប្រុស អាយុ២៩ឆ្នាំ ជាបងបង្កើត រងរបួសស្នៀតផ្កាខាងឆ្វេង ពួកគេរស់នៅភូមិស្លែងពណ៌ ឃុំ ត្រពាំងតាវ ស្រុក អន្លង់វែង ខេត្តឧត្តរមានជ័យ។
លោក ស៊ូ នូវ អធិការនគរបាលស្តីទីស្រុកអន្លង់វែង បានឲ្យដឹងថា មុនកើតហេតុ ជនរងគ្រោះជាបងបានមានទំនាស់ពាក្យសំដីជាមួយប្អូន ដែលជាទូទៅឲ្យតែផឹកស្រវឹងតែងតែរករឿងម៉ែឪនិងបង្កជម្លោះក្នុងក្រុមគ្រួសារ នៅថ្ងៃកើតហេតុនេះ បានជេរប្រមាថលើប្អូនធ្វើឲ្យឈ្មោះ វ៉ាត់ សំបូរ និងប្រកែកគ្នារហូតដល់តឹងសរសៃក.រៀងៗខ្លួន ទ្រាំមិនបានក៏បានយកពូថៅទៅវាយចំស្នៀតផ្ការបួសធ្ងន់តែម្តង។
បច្ចុប្បន្នជនរងគ្រោះត្រូវបានគេដឹកតាមរថយន្តបញ្ជូនទៅសង្គ្រោះនៅមន្ទីរពេទ្យខេត្តសៀមរាប រីឯប្អូនប្រុសត្រូវនគរបានស្រុកអន្លង់វែងចាប់ឃុំខ្លួនបណ្តោះអាសន្នដើម្បីសួរនាំនិងកសាងសំណុំរឿងបញ្ជូនទៅតុលាការចាត់ការទៅតាមផ្លូវច្បាប់៕
ផឹកស៊ីស្រវឹងដឹងតែរករឿងនិងជេរប្រទេចក្រុមគ្រួសារ ត្រូវប្អូនប្រុសវាយ១ខ្នងពូថៅរបួសធ្ងន់
0 Comments