សៀមរាប ៖ នៅក្នុងឱកាសបុណ្យកាន់បិណ្ឌប្រពៃណីខ្មែរ ក្នុងវេនទី៨ ត្រូវនឹងថ្ងៃ៨រោចខែភទ្របទឆ្នាំមមែសប្តស័ក ពុទ្ធសករាជ ២៥៥៩ ត្រូវនឹងថ្ងៃទី ០៥ ខែតុលា ឆ្នាំ ២០១៥លោកឃឹម ប៊ុនសុង អភិបាលនៃគណៈអភិបាលខេត្តលោកនូ ផល្លាប្រធានក្រុមប្រឹក្សាខេត្ត និង លោកជំទាវ ព្រមទាំងអស់លោក លោកស្រីជាថ្នាក់ដឹកនាំមន្ទីរ មន្ត្រីរាជការសាលាខេត្តសៀមរាប បានអញ្ជើញទៅចូលរួមក្នុងពិធីកាន់បិណ្ឌវេនទី៨ ជាមួយបងប្អូនពុទ្ធបរិស័ទនៅវត្តអង្គរខាងត្បូង និង អង្គរខាង ជើង ក្រុង ខេត្តសៀមរាប។
ពិធីបុណ្យកាន់បិណ្ឌត្រូវបានបុរាណណាចារ្យរាជបណ្ឌិតខ្មែររៀបចំរយៈពេល១៥ថ្ងៃ ដោយចាប់គិតពីថ្ងៃទី ០១ រោចដល់ថ្ងៃ ១៥រោច ខែភទ្របទជាពិធីមួយសម្រាប់ឧទ្ទិសកុសលទៅដល់ប្រេតជនញាតិដែលបានស្លាប់ទៅនោះ។ ពុទ្ធបរិស័ទចាប់ផ្ដើមធ្វើពីថ្ងៃ ១រោច រហូតដល់ថ្ងៃ ១៤រោច ជាវារកភត្ត(ភត្តធ្វើតាមថ្ងៃ)ជាបន្តបន្ទាប់។ ចំណែកមួយថ្នាក់ទៀតគេធ្វើនៅថ្ងៃ ១៥រោច ដែលគេហៅថាបុណ្យភ្ជុំ ។ ពិធីបុណ្យទាំងពីរថ្នាក់នេះ បច្ចុប្បន្នត្រូវបានបូកបញ្ចូលគ្នា ហើយហៅកាត់ថាពិធីបុណ្យភ្ជុំបិណ្ឌនេះឯង។ តាមការបញ្ជាក់របស់តាអាចារ្យបានឲ្យដឹងថា ក្នុងជំនឿកាន់បិណ្ឌនេះត្រូវបានប្រជាពលរដ្ឋខ្មែរនាំគ្នាគោរពប្រតិបត្តិយ៉ាងខ្ជាប់ខ្ជួនតាំងពីសម័យបុរាណរហូតមកដល់សតវត្សរ៍ទី ២១នេះ។
នៅក្នុងពិធីកាន់បិណ្ឌនេះលោកឃឹម ប៊ុនសុងនិងលោកជំទាវ ព្រមទាំងបងប្អូនជាថ្នាក់ដឹកនាំ មន្ត្រីរាជការ និងពុទ្ធបរិស័ទបានធ្វើការវេរប្រគេននូវទ័យ្យទានវត្ថុដល់ព្រះសង្ឃ ដើម្បីសម្រាប់ប្រើប្រាស់នៅក្នុងពេលព្រះសង្ឃគង់ចាំព្រះវស្សាក្នុងទីវត្តទាំងពីរនេះ ដោយមួយវត្តរួមមាន អង្ករ ១០០គក្រ មី ១០កេស ទឹកក្រូច ១០កេស ប្រេងឆា ១០ដប ទឹកត្រី ០៥យួរ ទឹកស៊ីអ៊ីវ ០៥យួរ ត្រីខ ០២កេស ទឹកសុទ្ធ១០កេស ស្ករស ២០គក្រ តែ ០២គក្រប្រេងម៉ាស៊ុត ៣០លីត្រ និង បច្ច័យចំនួន ២លាននិងជូនបច្ច័យដល់សីលវ័ន្តសីលវតីម្នាក់ៗ ១ម៉ឺនរៀលផងដែរ។
បន្ទាប់ពីការគោរពថ្វាយភូងផ្កា បូជាទៀនធូប ចំពោះព្រះពុទ្ធរូបព្រះសម្មាសម្ពុទ្ធ និង នមស្សការ ព្រះរតនត្រ័យទៅ តាមគន្លងព្រះធម៌ព្រះសម្មាសម្ពុទ្ធរួចមក និង លោកលោកស្រីថ្នាក់ដឹកនាំ និងបងប្អូនញាតិមិត្ត ពុទ្ធបរិស័ទបានធ្វើពិធីរាប់បាត្របង្សុកូល ឧទ្ទិសកុសលផលបុណ្យ ជូនដល់ដួងវិញ្ញាណក្ខ័ន្ត ចំពោះមាតាបិតាជីដូនជីតា និងញាតិកាលទាំង៧សន្តាន ដែលបានចែកឋានទៅកាន់បរលោកខាងមុខហើយនោះ ព្រមទាំងឧទ្ទិសដល់គោរពវិញ្ញាណក្ខន្ធដល់កម្មាភិបាល យុទ្ធជន ដែលបានពលីជីវិត ក្នុងបុព្វហេតុការពារកសាង អភិវឌ្ឍន៍ជាតិមាតុភូមិកម្ពុជា សូមឲ្យមកទទួលនូវផល្លានិសង្ឃដែល ឯកឧត្តម លោកជំទាវ និង ថ្នាក់ដឹកនាំ បានឧទ្ទិសជូនតាមរយៈព្រះសង្ឃ ដែលជាស្រែបុណ្យក្នុងរដូវកាលបុណ្យកាន់បិណ្ឌ និងភ្ជុំបិណ្ឌនេះ និងសូមឲ្យអំណាចនៃអានិសង្ឃនេះជួយទ្រទ្រង់ឲ្យវិញ្ញាណក្ខន្ឋអ្នកទាំងនោះ បានទៅកាន់ទីសោយសុខឋានបរមសុខកុំបីឃ្លៀងឃ្លាតក្នុងឋានសុគតិភពកុំបីខានឡើយ។ដូច្នេះការប្រារព្ធធ្វើពិធីបុណ្យភ្ជុំបិណ្ឌនេះឡើង ក្នុងគោលបំណងដើម្បីឧទ្ទិសមហាកុសល់ជូនដល់លោកអ្នកមានគុណមានមាតាបិតាជីដូនជីតា ញាតិកាលទាំង៧សណ្តានដែលបានបាក់បែកចែកឋានទៅកាន់បរលោកទៅហើយនោះនិង ជួយរំដោះឲ្យរួចចាកផុតពីទុក្ខទោសទាំងឡាយ ឧបាយភូមិណាមួយ និងឲ្យបានទៅកាន់សុគតិភពថ្មី ហើយងាកក្រោយមកជួយបីបាច់ថែរក្សា កូនចៅ ឲ្យមានសេចក្ដីសុខសប្បាយក្នុងក្រុមគ្រួសារ សង្គមជាតិផងដែរ។
សំណេះសំណាលជាមួយព្រះសង្ឃ និង ពុទ្ធបរិស័ទនោះ លោកឃឹម ប៊ុនសុង ក៏បានលើងផងដែរ អំពីសភាពការ សន្តិសុខ សណ្ដាប់ធ្នាប់នៅព្រះរាជាណាចក្រកម្ពុជា និយាយដោយឡែកខេត្តសៀមរាប ដោយមានការចូលរួមពីសំណាក់ បងប្អូនប្រជាពលរដ្ឋ និង ការយកចិត្តទុកដាក់ខ្ពស់របស់អាជ្ញាធរមូលដ្ឋាន សំខាន់លើសន្តិសុខទេសចរណ៍ បានធ្វើឲ្យខេត្ត មានការអភិវឌ្ឍន៍ ពិសេសហេដ្ឋារចនាសម្ព័ន្ធវិស័យទេសចរណ៍ និង វិស័យឯទៀត។ ក្នុងនោះដែរលោកក៏បានលើក នូវលទ្ធផលនៃការផ្ទៀងផ្ទាត់ផែនទី បញ្ហាព្រំដែនរវាងកម្ពុជា និង វៀតណាម របស់រាជរដ្ឋាភិបាល ដើម្បីបញ្ជាក់ជូនប្រជាពុទ្ធបរិស័ទ កុំឲ្យជឿតាមពាក្យមួលបង្កាច់របស់ ក្រុមជ្រុលនិយម ព្រមទាំងបានធ្វើការក្លែងបន្លំលិខិតឯក សារ ក្នុងមួលបង្កាច់រាជរដ្ឋាភិបាលស្របច្បាប់តាមរយៈការបោះឆ្នោត ។ម្យ៉ាងទៀតពិធីបុណ្យកាន់បិណ្ឌភ្ជុំបិណ្ឌនេះ ក៏បានបង្ហាញនូវការសាមគ្គីភាពរបស់ប្រជាពលរដ្ឋខ្មែរយើងផងដើម្បីនាំយកចង្ហាន់ និងទេយ្យទានផ្សេងៗសម្រាប់យកទៅផ្គត់ផ្គង់ដល់ព្រះសង្ឃដែលគង់នៅចាំព្រះវស្សាអស់កាលត្រីមាសដែលព្រះសង្ឃមានការលំបាកខ្វះខាតចង្ហាន់និងលំបាកក្នុងការនិមន្តបិណ្ឌបាត្រនារដូវវស្សាផងដែរ៕
អភិបាលខេត្តអញ្ជើញកាន់បិណ្ឌវេនទី២ នៅវត្តអង្គរខាងត្បូង និងខាងជើង ក្រុងសៀមរាប
0 Comments