កំពង់ចាម ៖ អតីតទណ្ឌិតដែលធ្លាប់ជាប់ពន្ធនាគារចំនួន៤លើករួចមកហើយ ពេលចេញមកវិញមិនរាងចាលបានធ្វើសកម្មភាពលួចកាច់សោម៉ូតូនៅកន្លែងទទួលផ្ញើត្រូវសមត្ថកិច្ចចាប់ខ្លួនបញ្ជូនទីពន្ធនាគារជាលើកទី៥សារជាថ្មីម្តងទៀត។
លោក អាន វុធ នាយផ្នែកនគរបាលព្រហ្មទណ្ឌក្រុងកំពង់ចាមបានឲ្យដឹងថា ហេតុការណ៍នេះបានកើតឡើងនៅវេលាម៉ោង៧និង៣០នាទីយប់ថ្ងៃទី៣០ ខែតុលា ឆ្នាំ២០១៥នៅកន្លែងទទួលផ្ញើកង់ម៉ូតូស្ថិតក្នុងភូមិទី១១ សង្កាត់កំពង់ចាម ក្រុងកំពង់ចាម។
លោក អាន វុធ បានបញ្ជាក់ថា ជនសង្ស័យត្រូវចាប់ខ្លួននេះឈ្មោះ ហេង សុភាព ហៅ ផល ហៅ សិដ្ឋ ភេទប្រុស អាយុ៣៧ឆ្នាំ មានទីលំនៅភូមិថ្មី ឃុំរកា៣ ស្រុកកែវសីម៉ា ខេត្តមណ្ឌលគីរីត្រូវសមត្ថកិច្ចចាប់ខ្លួនជាក់ស្តែងនៅពេលកំពុងធ្វើសកម្មភាពកាច់សោម៉ូតូនៅកន្លែងផ្ញើកើតហេតុខាងលើ។
តាមចម្លើយសារភាពរបស់ជនសង្ស័យបានឲ្យដឹងថា នៅថ្ងៃទី៣០ ខែតុលា ឆ្នាំ២០១៥វេលាម៉ោងប្រហែល៨យប់ខ្លួនបានទិញកូនសោម៉ូតូចំនួន៤រួចដើរទៅកន្លែងផ្ញើម៉ូតូនៅក្បែរតាំងពិព័រណ៍ជិតមាត់ទន្លេ ហើយបន្លំចូលហែកសំបុត្រម៉ូតូរួចបណ្ដើរចេញបម្រុងជិះគេចខ្លួនតែត្រូវសមត្ថកិច្ច និងអ្នកយាមនៅទីនោះឃើញចាប់ខ្លួនបានបញ្ជូនមកអធិការដ្ឋាននគរបាលក្រុងកំពង់ចាម។
ជនសង្ស័យ ហេង សុភាព បានបន្តថា កន្លងមកខ្លួនធ្លាប់ជាប់ឃុំក្នុងពន្ធនាគារចំនួន៤លើករួចមកហើយគឺ លើកទី១នៅចុងឆ្នាំ២០០១លួចម៉ូតូនៅខេត្តកំពង់ចាមត្រូវសមត្ថកិច្ចចាប់ខ្លួនដាក់ពន្ធនាគារអស់រយៈពេល២ខែទើបដោះលែងមកវិញ។ លើកទី២នៅឆ្នាំ២០០២លួចម៉ូតូនៅក្រុងកំពង់ចាមត្រូវសមត្ថកិច្ចចាប់ខ្លួនដាក់ឃុំក្នុងពន្ធនាគារអស់រយៈពេលជាច្រើនខែ។ លើកទី៣លួចម៉ូតូនៅក្រុងកំពង់ចាមដដែលត្រូវសមត្ថកិច្ចចាប់ខ្លួនបញ្ជូនទៅពន្ធនាគារដូចមុនទៀត។ លើកទី៤នៅឆ្នាំ២០១៤លួចម៉ូតូScoopyនៅមន្ទីរសាធារណការខេត្តកំពង់ចាម ហើយត្រូវសមត្ថកិច្ចចាប់ខ្លួនបញ្ជូនទៅពន្ធនាគារអស់ជាច្រើនខែរហូតដល់ថ្ងៃទី២៨ ខែសីហា ឆ្នាំ២០១៥ទើបដោះលែងវិញ។ នៅពេលចេញពីពន្ធនាគារខ្លួនក៏ទៅផ្ទះបងប្អូននៅខេត្តមណ្ឌលគីរីនៅទីនោះអស់រយៈពេលជាង១ខែរហូតដល់ថ្ងៃទី២៩ ខែតុលា ឆ្នាំ២០១៥ទើបចេញពីមណ្ឌលគីរីមកដេកនៅស្នួល ខេត្តក្រចេះបាន១យប់។ លុះដល់ថ្ងៃទី៣០ ខែតុលា ឆ្នាំ២០១៥ក៏ជិះរថយន្តឈ្នួលមកខេត្តកំពង់ចាមចូលលួចម៉ូតូនៅកន្លែងផ្ញើក្បែរតាំងពិព័រណ៍ក៏ត្រូវសមត្ថកិច្ចចាប់ខ្លួនជាលើកទី៥។
លោក ស៊ឹង ចាន់អូន អធិការនគរបាលក្រុងកំពង់ចាមបានឲ្យដឹងថា នៅព្រឹកថ្ងៃទី១ ខែវិច្ឆិកា ឆ្នាំ២០១៥សមត្ថកិច្ចនឹងបញ្ជូនសំណុំរឿង និងជនសង្ស័យទៅសាលាដំបូងខេត្តកំពង់ចាម និងត្រូវតុលាការចេញដីកាឃុំខ្លួនជាលើកទី៥៕
លួចម៉ូតូជាប់ឃុំ៤លើក ពេលចេញមកវិញលួចម៉ូតូទៀត ត្រូវប៉ូលិសចាប់ខ្លួនជាលើកទី៥
0 Comments