បន្ទាយមានជ័យ ៖ កម្លាំងនគរបាលការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តបន្ទាយមានជ័យ ដឹកនាំដោយព្រះរាជអាជ្ញា លោក ផាន់ វណ្ណ រត្ន័ នៅល្ងាចថ្ងៃទី៥ ខែតុលា ឆ្នាំ២០១៥ បានចុះបង្ក្រាបករណីជួញដូរ និងប្រើប្រាស់គ្រឿងញៀននៅចំណុចផ្លូវលេខ២សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ដោយឃាត់ខ្លួនជនសង្ស័យបានចំនួន៤នាក់ និងវត្ថុតាងថ្នាំញៀនមួយចំនួនទៀតផងដែរ។
លោក ធិន ស៊ិនដេត នាយការិយាល័យប្រឆាំងគ្រឿងញៀនបានឲ្យដឹងថា ជនសង្ស័យទាំង៤នាក់ត្រូវបានចាប់ខ្លួនជាបន្តបន្ទាប់នៅក្នុងការចុះបង្ក្រាប ក្រោមការបញ្ជាផ្ទាល់ពីសំណាក់លោកឧត្ដមសេនីយ៍ត្រី អាត់ ខែម ស្នងការនគរបាលខេត្តបន្ទាយមានជ័យ។
លោកបាននិយាយបន្តទៀតថា មុនពេលកើតហេតុកម្លាំងរបស់លោកបានឃាត់ខ្លួនជនសង្ស័យបានម្នាក់ឈ្មោះ អៀង ស៊ីវណ្ណា ហៅឆែប អាយុ២៨ឆ្នាំ រស់នៅភូមិសែសិន សង្កាត់អូរអំបិល និងដកហូតថ្នាំញៀនប្រភេទម៉ាទឹកកក៣កញ្ចប់ ហើយក្រោយការសួរនាំរួចមក កម្លាំងរបស់លោក ក៏បានឈានទៅដល់ការឃាត់ខ្លួនជនសង្ស័យម្នាក់ទៀតឈ្មោះ ស៊ិន បារាំង អាយុ២៣ឆ្នាំ រស់នៅភូមិអណ្ដូងផ្លូវ ឃុំគំរូ ស្រុកថ្មពួក ដោយដកហូតថ្នាំញៀនប្រភេទម៉ាទឹកកកចំនួន៤កញ្ចប់ថែមទៀតផង។ បន្ទាប់ពីសួរនាំជនសង្ស័យទាំង២នាក់នេះរួចមក កម្លាំងនគរបាលក៏បានឈានទៅដល់ការ ឃាត់ខ្លួនជនសង្ស័យពីរនាក់ទៀត ដោយទី១-ឈ្មោះ សាំ ពិសិដ្ឋ អាយុ២៣ឆ្នាំ រស់នៅភូមិត្រញំងប្រិយ៍ ឃុំភ្នំដី ស្រុកភ្នំស្រុក និង២-ឈ្មោះ វ៉ែន វិសាល អាយុ២៨ឆ្នាំ មុខរបរគ្រូបង្រៀន រស់នៅភូមិកណ្ដាលលិច ឃុំស្រះជីកស្រុកភ្នំស្រុក ខេត្តបន្ទាយមានជ័យ។ ហើយជនសង្ស័យទាំង៤នាក់កម្លាំងសមត្ថកិច្ចបានដកហូតថ្នាំញៀនប្រភេទម៉ាទឹកកកចំនួន៧កញ្ចប់ ទូរស័ព្ទដៃ២គ្រឿង ម៉ូតូ១គ្រឿង និងឧបករណ៍សម្រាប់ជក់ និងប្រើប្រាស់មួយចំនួនផងដែរ។
ជនសង្ស័យទាំង៤នាក់នោះត្រូវបានសួរនាំ និងឃុំខ្លួនជាបណ្ដោះអាសន្ននៅការិយាល័យប្រឆាំងបទល្មើសគ្រឿងញៀនដើម្បីកសាងសំណុំរឿងបញ្ជូនទៅកាន់តុលាការចាត់ការតាមផ្លូវច្បាប់ ៕
ឃាត់ខ្លួនអ្នកជួញដូរ និងប្រើប្រាស់គ្រឿងញៀន៤នាក់ ព្រមទាំងដកហូតថ្នាំញៀន៧កញ្ចប់
0 Comments