ឧត្តរមានជ័យ ៖ កាលពីវេលាម៉ោង៧និង៤០នាទីព្រឹក ថ្ងៃទី១៣ ខែតុលា ឆ្នាំ២០១៥ កុដិលោក១ខ្នងបានរលំភ្លើងទៀន ដែលដុតក្នុងកុដិ បណ្ដាលឲ្យឆេះផ្អើល ព្រះសង្ឃ និងប្រជាពលរដ្ឋដែលនៅជិតវត្តទាំងព្រឹក។
លោកវរសេនីយ៍ត្រីស៊ូ នូវ អធិការស្ដីទីស្រុកអន្លង់វែងបានឲ្យដឹងថា មានករណីគ្រោះ អគ្គិភ័យឆេះកុដិព្រះសង្ឃ១ខ្នង នៅវត្តគរីវ័ន្តណារាម ហៅវត្តស្រឡៅស្រោង ស្ថិតនៅក្នុងភូមិស្រឡៅស្រោង ឃុំលំទង ស្រុកអន្លង់វែង ខេត្តឧត្តរមានជ័យ។ កុដិ១ខ្នងនោះមានទំហំ៣ម៉ែត្រគុណនឹង៤ម៉ែត្រជញ្ជាំងក្តារប្រក់ស្បូវ ហើយក្នុងកុដិនោះមាន ប្រេងសាំងចំនួន១០លីត្រ ប្រេងម៉ាស៊ូតចំនួន៥លីត្រ និងសម្ភារៈប្រើប្រាស់មួយចំនួន។
លោកវរសេនីយ៍ត្រីស៊ូ នូវ អធិការស្ដីទីនគរបាលស្រុកបានបន្តទៀតថា ដោយមូលហេតុនៃការឆាបឆេះនេះ ដោយសាររលំភ្លើងទៀន។ ចំណែកព្រះសង្ឃដែលគង់ក្នុងកុដិមានចំនួន២អង្គពុំមានរងរបួសទេ ដែល ១.ព្រះនាម ស៊ុយ សិទ្ធ ព្រះជន្ម២៦ព្រះវស្សា ២.ព្រះនាម សៀង ហៃ ព្រះជន្ម១៥ព្រះវស្សា។ ប៉ុន្តែ សម្ភារៈនៅក្នុងកុដិត្រូវខូចខាត៕
អគ្គិភ័យលេបត្របាក់កុដិលោក១ខ្នងទាំងព្រឹក, ផ្អើលប្រជាពលរដ្ឋដែលរស់នៅជិតខាង
0 Comments