ភ្នំពេញ ៖ ក្នុងកិច្ចពិភាក្សាដ៏មានសារៈសំខាន់ខាងវិស័យ ទេសចរណ៍ រវាងកម្ពុជា ម៉ាកាវត្រូវបានធ្វើឡើងក្នុងឱកាស ដែលសម្តេចអគ្គ មហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាអញ្ជើញស្នាក់អាស្រ័យ បំពេញទស្សនកិច្ចការងារនៅទីក្រុងម៉ាកាវ នៃសាធារណរដ្ឋ ប្រជាមានិតចិន ដើម្បីចូលរួមវេទិកាសេដ្ឋកិច្ចទេសចរណ៍ពិភពលោកម៉ាកាវលើកទី៤ ឆ្នាំ២០១៥ និងបានអនុញ្ញាតឲ្យឯកឧត្ដម Li Jinzao ប្រធានរដ្ឋបាលទេសចរណ៍ជាតិចិន ចូលជួបសំដែងការគួរសម និងពិភាក្សាការងារ។
ក្នុងជំនួបពិភាក្សាដ៏មាន សារៈសំខាន់នោះ សម្តេចតេជោនាយករដ្ឋមន្ត្រី និងឯកឧត្តម Li Jinzao បានធ្វើការពិភាក្សា យ៉ាងយកចិត្តទុកដាក់ទៅលើការជំរុញកិច្ចសហប្រតិបត្តិការលើវិស័យទេសចរណ៍ នៃប្រទេសទាំងពីរកម្ពុជា ចិន ឲ្យកាន់តែមានសក្ដានុពលខ្លាំងឡើងថែមទៀត ពិសេសការខិតខំរិះរកវិធីក្នុងការជំរុញអ្នកទេសចរចិន មកធ្វើដំណើរទេសចរណ៍ក្នុងប្រទេសកម្ពុជា ឲ្យមានការកើនឡើងរហូតដល់១លាននាក់ នៅក្នុងពេលដ៏ ខ្លីខាងមុខ។ ក្នុងជំនួបពិភាក្សាគ្នានោះ ឯកឧត្តម Li Jinzao មានប្រសាសន៍សុំយោបល់ពីសម្តេចតេជោនាយករដ្ឋមន្ត្រី ធ្វើយ៉ាងណាក្នុងការជំរុញកំណើនទេសចរណ៍សម្រាប់ប្រទេសទាំងពីរ ឲ្យកាន់តែមានសក្តានុពលខ្ពស់ ថែមទៀត។ ទាក់ទិនទៅនឹងបញ្ហានេះ សម្តេចតេជោនាយករដ្ឋមន្ត្រីមានប្រសាសន៍ស្នើដល់ឯកឧត្តមប្រធាន ធ្វើយ៉ាងណាបន្តជួយជំរុញឲ្យមានការកើនឡើង នៃចំនួនភ្ញៀវទេសចរណ៍ចិនមកកាន់ប្រទេសកម្ពុជា ឲ្យមាន ការកើនឡើងរហូតដល់១លាន៣សែននាក់ ពោលគឺរក្សាកំណើនត្រឹមតែ០,០១% នៃចំនួនប្រជាជនចិនសរុប ក្នុងការធ្វើដំណើរទៅបំពេញទស្សនកិច្ចទេសចរណ៍នៅកម្ពុជា។ សម្តេចតេជោបន្តថា ក្នុងឆ្នាំ២០១៤ កន្លងទៅចំនួនទេសចរណ៍ចិនដែលធ្វើដំណើរទេសចរណ៍នៅកម្ពុជាមានចំនួន ៥៦ម៉ឺននាក់ ដោយមិនរាប់បញ្ចូលនូវអ្នកទេសចរមកពីម៉ាកាវ និងកោះតែវ៉ាន់នោះទេ។ សម្តេចបន្តថា តាមការប្រមើលមើលទៅមុខទៀតនោះ ពោលគឺក្នុងឆ្នាំ២០១៥នេះចំនួនភ្ញៀវទេសចរចិន នឹងមានការកើនឡើងរហូតដល់ ៧០ម៉ឺននាក់។ សម្តេចតេជោមានប្រសាសន៍បន្តថា សម្តេចធ្លាប់បានជួបពិភាក្សាការងារជាមួយថ្នាក់ដឹកនាំចិនជាច្រើន ក្នុងនោះកម្ពុជាផ្តល់នូវភាពងាយស្រួលយ៉ាងច្រើនដល់អ្នកទេសចរចិន ក្នុងការធ្វើដំណើរ ទេសចរណ៍ក្នុងប្រទេសកម្ពុជា តួយ៉ាងដូចជាការផ្តល់នូវភាពងាយស្រួលក្នុងការប្រើប្រាស់ ប្រាក់យ័នលើទីផ្សារកម្ពុជា និងការចំហឲ្យមានការហោះហើរត្រង់ពីគ្រប់ទីកន្លែងទាំងអស់របស់ប្រទេសចិន មកកាន់ប្រ ទេសកម្ពុជា។ សម្តេចតេជោនាយករដ្ឋមន្ត្រីមានប្រសាសន៍បញ្ជាក់បន្ថែមថា រាជរដ្ឋាភិបាលកម្ពុជាកំពុងពិនិត្យលទ្ធភាព ក្នុងការបើកកុងស៊ុលនៅតាមតំបន់ ដែលមានភ្ញៀវទេសចរ និងតំបន់ដែលមានការហោះហើរត្រង់ក្នុងប្រទេសចិនបន្ថែមទៀត ក្នុងការជំរុញភ្ញៀវទេសចរមកកាន់កម្ពុជានោះ ដើម្បីបង្កលក្ខណៈងាយស្រួលក្នុងការផ្តល់ទិដ្ឋាការដល់អ្នកទេសចរណ៍ចិន។ សម្តេចតេជោនាយករដ្ឋមន្ត្រីបន្តថា កម្ពុជាបច្ចុប្បន្ន នេះ មានភាពអំណោយផលខ្លាំងណាស់ចំពោះអ្នកទេសចរចិន តួយ៉ាងដូចមានសាលាបណ្តុះបណ្តាល ភាសាចិន និងមានភោជនីយដ្ឋានចិនជាច្រើនកន្លែង។
ឯកឧត្ដម Li Jinzao មានប្រសាសន៍ថា ចំនួនទេសចរចិន១លាននាក់មិនមានអ្វីជាបញ្ហានោះទេ ប៉ុន្តែឯកឧត្តមនឹងខិតខំដោះស្រាយនូវរាល់បញ្ហាប្រឈមនានា តាមរយៈការជួយបណ្តុះបណ្តាលមន្ត្រីកម្ពុជា ពិសេសការកសាងសមត្ថភាពដល់មន្ត្រី ជាមួយគ្នានេះឯកឧត្តមនឹងខិតខំជំរុញយ៉ាងណា ឲ្យវិស័យទេសចរណ៍មានភាពល្អប្រសើរ ផ្តល់នូវផលប្រយោជន៍ពីគ្នាទៅវិញទៅមក និងមិនអនុញ្ញាតឲ្យអ្នកទេសចរចិន ធ្វើ នូវអ្វីដែលខុសច្បាប់របស់កម្ពុជានោះឡើយ៕
កម្ពុជា និងម៉ាកាវយកចិត្តទុកដាក់ជំរុញកិច្ចសហប្រតិបត្តិការលើវិស័យទេសចរណ៍ឲ្យកាន់តែមានសក្ដានុពលខ្លាំងឡើងថែមទៀត
0 Comments