ម៉ាកាវ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេច កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមទាំងគណៈប្រតិភូជាន់ខ្ពស់រាជរដ្ឋាភិបាលកម្ពុជា បានអញ្ជើញដល់ចំណតអាកាសយានដ្ឋានអន្តរជាតិម៉ាកាវ ទីក្រុងម៉ាកាវ នៃសាធារណរដ្ឋប្រជាមានិតចិន កាលពីវេលាម៉ោង១១និង២៥នាទីម៉ោងនៅទីក្រុងប៉េកាំងប្រទេសចិន ត្រូវនឹងម៉ោង១០និង២៥នាទី ម៉ោងនៅព្រះរាជាណាចក្រកម្ពុជា ដើម្បីអញ្ជើញចូលរួមវេទិកាសេដ្ឋកិច្ចទេសចរណ៍ពិភពលោកម៉ាកាវលើកទី៤ ដែលនឹងប្រារព្ធធ្វើ ឡើងនៅព្រឹកថ្ងៃទី១២តុលា។
វត្តមាននៃការអញ្ជើញដល់របស់សម្តេចតេជោនាយករដ្ឋមន្ត្រី និងសម្តេចកិត្តិ ព្រឹទ្ធបណ្ឌិត ព្រមទាំងគណៈប្រតិភូជាន់ខ្ពស់រាជរដ្ឋាភិបាលកម្ពុជា ត្រូវបានធ្វើគារវកិច្ចស្វាគមន៍យ៉ាងស្និទ្ធស្នាលរាក់ទាក់ ពីសំណាក់ឯកឧត្ដម Tam Chon Weng រដ្ឋមន្ត្រីសង្គមកិច្ចម៉ាកាវ ព្រមទាំងវត្តមានឯកឧត្តម លោកជំទាវ ជាឥស្សរជនជាន់ខ្ពស់ទីក្រុងម៉ាកាវ និងឥស្សរជនការទូតរបស់ព្រះរាជាណាចក្រកម្ពុជា ប្រចាំសាធារណរដ្ឋប្រជាមានិតចិនជាច្រើនរូប។
តាមកម្មវិធីដែលបាលគ្រោងទុក សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត និងស្នាក់អាស្រ័យបំពេញទស្សនកិច្ចការងាររយៈពេល២យប់ នៅទីក្រុងម៉ាកាវ ដើម្បីចូលរួមវេទិកាសេដ្ឋកិច្ចទេសចរណ៍ពិភពលោកម៉ាកាវលើកទី៤ មុននឹងបន្តដំណើរទៅកាន់ទីក្រុងប៉េកាំង ដើម្បីចូលរួមសន្និសីទពិសេសរបស់គណបក្សនយោបាយនៅអាស៊ីស្តីពីផ្លូវសូត្រ រួមទាំងការបំពេញទស្សនកិច្ចការងារទៅកាន់បណ្តាស្ថាប័នរដ្ឋ និងក្រុមហ៊ុនឯកជននានា ក្នុងទីក្រុងប៉េកាំងប្រទេសចិន៕
សម្តេចតេជោ និងសម្តេចកិត្តិព្រឹទ្ធបណ្ឌិត អញ្ជើញដល់ចំណតអាកាសយានដ្ឋានអន្តរជាតិម៉ាកាវ
0 Comments