បាត់ដំបង ៖ ស្ត្រីម្នាក់បានយំសោកបោកខ្លួនដោយក្តីសោកសង្រេង ខណៈដែលឃើញកូនប្រុសរបស់ខ្លួនដែលទើបតែមានអាយុ៣ឆ្នាំ ត្រូវបានលង់ទឹកស្រះស្លាប់នៅខាងក្រោយផ្ទះ កាលពីថ្ងៃទី៣០ ខែតុលា ឆ្នាំ២០១៥វេលាម៉ោង៣និង៤០នាទីរសៀលត្រង់ចំណុចភូមិកណ្ដាល ឃុំត្រាង ស្រុកកំរៀង ខេត្តបាត់ដំបង បន្ទាប់ពីស្ត្រីជាម្តាយរូបនេះរវល់បំបៅដោះកូនដែលនៅតូចមិនទាន់ដឹងក្តីម្នាក់ទៀត។
បើតាមការរៀបរាប់ទាំងអួលដើម.កពីស្ត្រីជាម្តាយបាននិយាយថា កូនប្រុសរបស់គាត់មានឈ្មោះ ពយ ករុណា អាយុ៣ឆ្នាំ រស់នៅត្រង់ចំណុចកើតហេតុខាងលើដោយនៅមុនពេលកើតហេតុប្ដីរបស់អ្នកស្រីមិនបាននៅផ្ទះទេ ដោយគាត់បានចេញទៅប្រកបការងារដោយទុកឲ្យអ្នកស្រីនៅមើលផ្ទះ និងថែរក្សាកូនទាំងពីរនាក់នៅក្នុងបន្ទុក។
ស្ត្រីរូបនេះបានបន្តថា នៅមុនពេលកើតហេតុគឺខ្លួនកំពុងតែបំបៅដោះកូនដែលនៅតូចដោយសារវាយំពេក ហើយចំណែកកូនច្បងក៏នៅដើរលេងក្បែរៗផ្ទះនោះដែរ ប៉ុន្តែក្នុងរយៈតែមួយប៉ប្រិចភ្នែកតែប៉ុណ្ណោះ ពេលដែលខ្លួនដាក់កូនឲ្យដេកក៏ដើររកកូនច្បងលែងឃើញតែម្តង បើទោះបីជាខំប្រឹងស្រែកហៅយ៉ាងណាក៏ដោយ លុះពេលដើរទៅរកដល់មាត់ស្រះទឹកដែលនៅខាងក្រោយផ្ទះប្រហែល៣០ម៉ែត្រ ទើបបានប្រទះឃើញស្បែកជើងកូនក៏មានការតក់ស្លុតយ៉ាងខ្លាំង ដោយបានស្រែកហៅអ្នកភូមិឲ្យគេជួយ ព្រោះអាចសន្និដ្ឋានបានថា កូនប្រុសរបស់ខ្លួនប្រាកដជាលង់នៅក្នុងទឹកស្រះនេះជាមិនខាន។
ទីបំផុតក្រោយពេលដែលមានប្រជាពលរដ្ឋក៏ដូចជាសមត្ថកិច្ចមូលដ្ឋានបានជួយជ្រោមជ្រែងស្វះស្វែងរកក៏បានប្រទះឃើញកូនប្រុសនោះនៅក្នុងទឹកស្រះមែន ដោយមានសភាពស្លេកស្លាំង ហើយបានផុតដង្ហើមបាត់ទៅហើយ។ គឺនៅពេលនោះហើយដែលសម្រែករបស់ស្ត្រីជាម្តាយកាន់តែឮខ្លាំងឡើងដោយក្តីអាឡោះអាល័យ។
បច្ចុប្បន្នក្រោយពេលកើតហេតុក្រុមគ្រួសារ និងសាច់ញាតិបានរៀបចំធ្វើបុណ្យសពឲ្យកុមារដ៏អភ័ព្វនេះហើយ ដែលពិធីបុណ្យនេះធ្វើឲ្យមជ្ឈដ្ឋានជាច្រើនមានការអាណិតអាសូរយ៉ាងក្រៃលែង៕
រវល់បំបៅដោះកូនប្អូន កូនច្បងទៅលេងទឹកស្រះលង់ទឹកស្លាប់
0 Comments