ក្រុម BorussiaMoenchengladbach បានយកឈ្នះក្រុម Schalke ជាលើកទី ២ ក្នុងរយៈពេល ៤ ថ្ងៃនេះ ជាមួយនឹងជ័យជម្នះ ក្នុងលទ្ធផល ២-០ នៅការប្រកួតជុំទី ២ German Cup កាលពីថ្ងៃពុធ ខណៈដែលក្រុមជើងឯករង Borussia Dortmund កាលពីរដូវកាលមុន បានបំបាក់ក្រុមសិស្សប្អូន Paderborn មិនឲ្យងើបមុខរួចដោយលទ្ធផល ៧-១។
ក្រុម Dortmund បានតាមពីក្រោយ នៅពេលដែលកីឡាករ SrdjanLakic ឆ្មក់យកឱកាសពីកំហុសឆ្គងបង្កឡើងដោយអ្នកចាំទី Roman Buerki ដើម្បីធ្វើឲ្យក្រុមភ្ញៀវធ្វើការនាំមុខមុន ប៉ុន្តែភ្លាមៗនោះ ក្រុម Dortmund ដឹងច្បាស់ថា ពួកគេនឹងឈ្នះការប្រកួត នៅពេលដែលកីឡាករ Gonzalo Castro រកបាន ២ គ្រាប់ម្នាក់ឯង ព្រមទាំងគ្រាប់បាល់ពីកីឡាករ Adrian Ramos, Shinji Kagawa, IlkayGundogan, Lukasz Piszczek និងកីឡាករ HenrikhMkhitaryan ល្មមធ្វើឲ្យក្រុមប្រជែងរបស់ខ្លួនមិនអាចតបតបាន។
គួរឲ្យដឹងថា ក្រុម Moenchengladbach ធ្លាប់បានយកឈ្នះក្រុម Schalke ដោយលទ្ធផល ៣-១ ម្តងរួចមកហើយ កាលពីថ្ងៃអាទិត្យ នៅការប្រកួតបាល់ទាត់ក្នុងស្រុក Bundesliga ហើយលើកនេះ ពួកគេធ្វើបានយ៉ាងអស្ចារ្យជាថ្មីម្តងទៀត ដោយសារគ្រាប់បាល់ពីកីឡាករ Lars Stindl នៅនាទី ៤២ និងកីឡាករ Thorgan Hazard ពីការស៊ុតបាល់ប៉េណាល់ទី នៅនាទី ៥៣។
ខណៈនោះដែរ ក្រុម Bayer Leverkusen បានយកឈ្នះក្រុម Viktoria Cologne ដោយលទ្ធផល ៦-០ ក្នុងនោះក៏មានគ្រាប់បាល់ ២ គ្រាប់របស់កីឡាករ Javier Hernandez ផងដែរ។ ចំណែកឯ ក្រុម Werder Bremen, Stuttgart និងក្រុម Augsburg បានបោះជំហានមកដល់ដំណាក់កាលបន្ទាប់នៃការប្រកួត German Cup ដូចៗគ្នា។
នៅក្នុងទឹកដីរបស់ក្រុម Schalke កីឡាករ Joel Matip បានប្រើប្រាស់ជំនាញម៉ែចែកឲ្យរបស់គាត់ រួចបណ្តើរញាក់បាល់តែម្នាក់ឯង ស៊ុតបាល់ឲ្យចំគោលដៅដែរ តែត្រូវគេបាំង មុនពេលដែលគាត់រកបានគ្រាប់បាល់ប៉េណាល់ទី និងជាគ្រាប់បាល់ឈ្នះសម្រាប់ក្រុម Moenchengladbach។
ជ័យជម្នះរបស់ក្រុម Moenchengladbach នេះដែរ បានកើតមានឡើង ក្រោយពេលពួកគេរកបានជ័យជម្នះ ៥ លើកជាប់ៗគ្នា នៅក្របខណ្ឌបាល់ទាត់ Bundesliga។
ដោយឡែក កីឡាករ Anthony Ujah រកបានគ្រាប់បាល់ឈ្នះតែ ១ គ្រាប់គត់ឲ្យក្រុម Werder Bremen ពេលជួបជាមួយអតីតក្រុម Cologne ខណៈដែលក្រុម Stuttgart បានយកឈ្នះក្រុមលេខ ៤ Carl Zeiss Jena ដោយលទ្ធផល ២-០ ដោយសារគ្រាប់បាល់របស់កីឡាករ Martin Harnik និង Alexandru Maxim។
ក្រុម Augsburg ដែលកំពុងត្រដាបត្រដួលនៅក្របខណ្ឌ Bundesliga បានយកឈ្នះក្រុមសិស្សប្អូន Freiburg ក្នុងលទ្ធផល ៣-០ ដោយសារគ្រាប់បាល់ពីកីឡាករ Ji Dong-won, Alexander Esswein និងកីឡាករ Caiuby៕
ក្រុម Dortmund ឈ្នះក្នុងលទ្ធផល ៧-១ ខណៈដែល Moenchengladbach បំបាក់ក្រុម Schalke ក្នុងលទ្ធផល ២-០ នៅការប្រកួត German Cup
0 Comments