ក្រសួងសុខាភិបាលនៃប្រទេសកេនយ៉ា ព្រមទាំងដៃគូពហុភាគី កាលពីថ្ងៃអង្គារកន្លងទៅនេះ បានបើកកិច្ចអន្ដរាគមន៍ក្នុងការផ្ដល់ចំណីអាហារដ៏ត្រឹមត្រូវ ដើម្បីបង្កើនភាពសុំានឹងជំងឺក្នុងចំណោមពលរដ្ឋរបស់ខ្លួន ដែលផ្ទុកទៅដោយវីរុសបង្កឲ្យកើតទៅជាជំងឺ AIDS។
ក្រុមមន្ដ្រីជាន់ខ្ពស់បាននិយាយថា រដ្ឋាភិបាលបានធ្វើការវិនិយោគប្រកបដោយអាទិភាពនៅក្នុងកម្មវិធីបំប៉នដោយអាហារូបត្ថម្ភ ដែលនេះត្រូវបានចាត់ទុកថា ជាផ្នែកមួយនៃការឆ្លើយតបទៅនឹងយុទ្ធសាស្រ្ដថ្នាក់ជាតិ ជាមួយនឹងហ៊ីវ/អេដស៍ នោះហើយ។
លេខាធិការដើមខ្សែនៅក្រសួងសុខាភិបាល លោក Khadijah Kassachoon បានលើកឡើងថា ការបំប៉នផ្នែកអាហារូបត្ថម្ភដ៏ត្រឹមត្រូវគឺជាតួនាទីមួយដ៏ធំធេងនៅក្នុងការភ្ជាប់ទៅនឹងការព្យាបាលហ៊ីវ/អេដស៍ ចំពោះមនុស្សផងទាំងឡាយដែលកំពុងតែរស់នៅក្នុងស្ថានភាពបែបយ៉ាងដូច្នេះ។ អាហារូបត្ថម្ភបង្កើននូវប្រព័ន្ធសុំានឹងជំងឺ ហើយក៏ជាមធ្យោបាយប្រកបដោយសុវត្ថិភាពប្រឆាំងនឹងគ្រប់ជំងឺឱកាសនិយម។
ទាំងក្រសួងសុខាភិបាលកេនយ៉ា និងអង្គការជាដៃគូទាំងឡាយ បានអភិវឌ្ឍរួចហើយនូវមគ្គុទ្ទេសក៍ណែនាំសម្រាប់ការផ្ដល់ជាអាហារូបត្ថម្ភ ដើម្បីបង្កើនការគ្រប់គ្រងទៅលើហីុវ/អេដស៍ នៅក្នុងប្រទេស។
ប្រទេសអាហ្វ្រិកខាងកើតនេះ មានអត្រាអ្នកផ្ទុកវីរុសហីុវ/អេដស៍ដ៏ខ្ពស់បំផុតនៅអនុតំបន់សាហារ៉ា ដែលប្រេវ៉ាឡង់ថ្នាក់ជាតិបានប៉ាន់ប្រមាណថា មានដល់ទៅ៥.៦ភាគរយនៃប្រជាពលរដ្ឋទូទាំងប្រទេស។
ដោយឡែក លេខាធិការដើមខ្សែនៃក្រសួងសុខាភិបាលកេនយ៉ា បានសម្ដែងការសោកស្ដាយដោយសារតែកន្លងមកនេះ ចំណីអាហារសម្រាប់អ្នកផ្ទុកវីរុសហីុវ/អេដស៍ ខ្វះសុវត្ថិភាព ហើយមិនមានទាំងអាហារូបត្ថម្ភថែមទៀតផង ដែលបានធ្វើឲ្យខូចខាតដល់ការព្យាបាល និងគ្រប់គ្រងហ៊ីវ/អេដស៍នោះ៕
Xinhua
កេនយ៉ា ធ្វើអន្ដរាគមន៍ដោយផ្ដល់ចំណីអាហារត្រឹមត្រូវ ដល់ពលរដ្ឋដែលរស់នៅដោយផ្ទុក HIV/AIDS
0 Comments