កាសែតមួយបានដកស្រង់សម្ដីប្រធាន Volkswagen ថ្មី លោក Hans Dieter Poetsch ដែលបាននិយាយថា លោកមើលឃើញរឿងអាស្រូវជុំវិញការលួចបន្លំសាកល្បងការបញ្ចេញឧស្ម័នរថយន្ដថា ការគំរាមមួយចំពោះការសម្រេចបានរបស់ក្រុមហ៊ុន បើទោះបីជាបានពុះពារជម្នះដើម្បីដោះស្រាយក៏ដោយ។
នៅក្នុងកិច្ចប្រជុំផ្ទៃក្នុងមួយរបស់ក្រុមហ៊ុននៅសប្ដាហ៍នេះ នៅទីបញ្ជាការដ្ឋានរបស់ VW នៅ Wolfsburg លោក Poetsch បានពិពណ៌នាសភាពការណ៍នេះថា ជាវិបត្ដិប្រកបដោយការគំរាមមួយចំពោះក្រុមហ៊ុន។ កាសែត Weltam Sonntag របស់អាល្លឺម៉ង់បានរាយការណ៍ឲ្យដឹងដូច្នេះនៅមុនការបោះពុម្ពផ្សាយនៅថ្ងៃអាទិត្យ។ លោក Poetsch ក៏បាននិយាយផងដែរថា លោកជឿថា VW អាចពុះពារជម្នះបាននូវវិបត្ដិនេះ។ កាសែត Weltam Sonntag បាននិយាយដូច្នេះ។ អ្នកនាំពាក្យរបស់ VW មិនព្រមធ្វើអធិប្បាយអំពីរបាយការណ៍នេះទេ។
ក្រុមហ៊ុនផលិតរថយន្ដដ៏ធំបំផុតរបស់អឺរ៉ុប នេះបានសារភាពការបោកប្រាស់នេះនៅក្នុងការសាកល្បងបញ្ចេញឧស្ម័នរបស់រថយន្ដឌីយេស៊ែលនៅអាមេរិក ហើយរដ្ឋមន្ដ្រីក្រសួងដឹកជញ្ជូនអាល្លឺម៉ង់ បាននិយាយថា VW ក៏បានប្រើល្បិចយ៉ាងប៉ិនប្រសប់នៅអឺរ៉ុបផងដែរ ជាកន្លែងដែល VW លក់រថយន្ដរបស់ខ្លួនបានចំនួនប្រហែល៤០ភាគរយនោះ។
VW បានទុកដោយឡែកនូវទឹកប្រាក់ចំនួន៦.៥ពាន់លានអឺរ៉ូ (៧.៣ពាន់លានដុល្លារ) ដើម្បីជួយធានារ៉ាប់រងការខូចខាតនៅក្នុងរឿងអាស្រូវនេះ ប៉ុន្ដែអ្នកវិភាគមួយចំនួនគិតថា វិក្កយបត្រចុងក្រោយអាចខ្ពស់ជាងនេះខ្លាំងណាស់។
ដោយរៀបរាប់តាមអ្នកដឹងរឿងផ្ទៃក្នុងដែលមិនស្គាល់ឈ្មោះ កាសែត Weltam Sonntag បាននិយាយថា ថវិកាវិនិយោគរបស់ VW ចំនួន១០០ពាន់លានអឺរ៉ូ រហូតដល់ឆ្នាំ២០១៨ បានស្ថិតនៅក្រោមការពិនិត្យមើលឡើងវិញដើម្បីកាត់បន្ថយ។ VW មិនព្រមធ្វើអធិប្បាយការលើកឡើងនេះទេ។
VW បាននិយាយថា ខ្លួននឹងជួសជុលឡើងវិញនូវរថយន្ដឌីយេស៊ែលដែលមាន Software មានសមត្ថភាពសាកល្បងបញ្ចេញឧស្ម័នបោកប្រាស់ដោយចំណាយប្រាក់១១លានដុល្លារ។ VW ក៏ប្រឈមនឹងការផាកពិន័យពីនិយតករនិងពីរដ្ឋអាជ្ញា ព្រមទាំងការប្ដឹងផ្ដល់ពីអតិថិជន និងអ្នកវិនិយោគទុនផងដែរ ហើយនិងលទ្ធភាពនៃការប៉ះពាល់ដល់ការលក់របស់ខ្លួនពីការខូចខាតនូវកេរ្ដិ៍ឈ្មោះនោះ។
ការស្ទង់មតិដោយការស្រាវជ្រាវផ្សារអាល្លឺម៉ង់ Puls បានបង្ហាញថា ៤១ភាគរយនៃអ្នកប្រើប្រាស់មើលឃើញការខូចខាតរបស់ម៉ាកសញ្ញានេះរយៈពេលយូរ ចំណែក១១ភាគរយបាននិយាយថា ពួកគេលែងចង់ទិញរថយន្ដ VW ទៀតហើយ។ កាសែតអាល្លឺម៉ង់មួយទៀតបានរាយការណ៍ឲ្យដឹងដូច្នេះ៕
Reuters
ប្រធានប្រតិបត្តិថ្មីរបស់VW មើលឃើញរឿងអាស្រូវបោកប្រាស់ថា ជាការគំរាមចំពោះការសម្រេចបានរបស់ក្រុមហ៊ុន
0 Comments