ម៉ាកសញ្ញារបស់ក្រុមហ៊ុន Volkswagen នឹងប្ដូរទៅរកបច្ចេកវិទ្យាត្រួតពិនិត្យការបញ្ចេញឧស្ម័នថ្មីរបស់រថយន្ដឌីយេស៊ែល នៅអឺរ៉ុប និងនៅអាមេរិកខាងជើង ក៏ដូចជាការកាត់បន្ថយការចំណាយក្នុងការវិនិយោគប្រចាំឆ្នាំចំនួន១ពាន់លានអឺរ៉ូ (១.១ពាន់លានដុល្លារ) ផងដែរ។ប្រធានម៉ាកសញ្ញា VW លោក Herbert Diess បានធ្វើការប្រកាសនេះកាលពីថ្ងៃអង្គារ ខណៈដែលក្រុមហ៊ុនបានតស៊ូដើម្បីពុះពារជម្នះរឿងអាស្រូវមួយស្ដីអំពីករណីដែលរថយន្ដមួយចំនួនរបស់ខ្លួនបានបំពាក់ជាមួយ Software កុំព្យូទ័រ ដែលអនុញ្ញាតឲ្យខ្លួនធ្វើការសាកល្បងការបញ្ចេញឧស្ម័នរថយន្ដនៅអាមេរិក។
លោក Diess បានបន្ដថា ក្រុមហ៊ុននឹងប្ដូរបច្ចេកវិទ្យាឌីយេស៊ែលរបស់ខ្លួននៅអឺរ៉ុប និងនៅអាមេរិកខាងជើង និងដំឡើងប្រព័ន្ធដែលប្រើប្រាស់ល្បាយមួយ (mixture) នៃសារធាតុគីមី urea និងទឹក ដើម្បីកាត់បន្ថយការបញ្ចេញឧស្ម័នពីរថយន្ដឌីយេស៊ែល។ លោក Diess បានបន្ដថា ការប្ដូរនឹងកើតឡើងនៅក្នុងពេលឆាប់ៗនេះតាមដែលអាចធ្វើទៅបាន។ លោក Diess បានបន្ថែមថា ក្រុមហ៊ុននឹងពង្រីកបច្ចេកវិទ្យាផលិតតម្លៃទាបរបស់ខ្លួន និងកាត់បន្ថយការចំណាយទៅលើការវិនិយោគ។
ក្រុមហ៊ុន VW ក៏មានផែនការដើម្បីប្ដូរការកែប្រែនៅពេលខាងមុខនូវរថយន្ដប្រណីត Phaeton ដ៏ធំរបស់ខ្លួនទៅជារថយន្ដអគ្គិសនីតែមួយគត់ដើម្បីបង្ហាញសមត្ថភាពបច្ចេកវិទ្យារបស់ក្រុមហ៊ុន។ VW AG ដែលមានម៉ាកសញ្ញាផ្សេងៗទៀតរួមទាំង Audi និង Skoda ផងនោះ កំពុងតែប្រឈមនឹងវិបត្ដិមួយ បន្ទាប់ពីអាជ្ញាធរអាមេរិក បាននិយាយថា ខ្លួនបានចៀសវាងពីការត្រួតពិនិត្យការបញ្ចេញឧស្ម័នទៅលើរថយន្ដចំនួន៤៨២,០០០គ្រឿងនោះមក។ ក្រុមហ៊ុនបានទុកដោយឡែកនូវទឹកប្រាក់ចំនួន៦.៥ពាន់លានអឺរ៉ូ (៧.៣ពាន់លានដុល្លារ) ដើម្បីរ៉ាប់រងតម្លៃជួសជុលក្នុងការហៅរថយន្ដមកវិញ និងការផាកពិន័យ។ ប៉ុន្ដែអ្នកវិភាគបាននិយាយថា តម្លៃនៅក្នុងក្របខណ្ឌនៃការផាកពិន័យ និងការខាតបង់នៅក្នុងការលក់ទំនងជានឹងមានទំហំច្រើនជាងយ៉ាងខ្លាំង។
មុននេះ អភិបាលរដ្ឋ Lower Saxony របស់ប្រទេសអាល្លឺម៉ង់ ដែលមានភាគហ៊ុនដ៏តូចមួយនៅក្នុង VW បាននិយាយថា ក្រុមហ៊ុននេះបានសារភាពកាលពីពេលមុនថា ខ្លួនបានប្រើឧបាយកលបោកប្រាស់ដ៏ ប៉ិនប្រសប់នូវទិន្នន័យបញ្ចេញឧស្ម័ននៅក្នុងរថយន្ដឌីយេស៊ែល។ VW បានទទួលស្គាល់ការបោកប្រាស់នេះចំពោះនិយតករអាមេរិក កាលពីថ្ងៃទី០៣ ខែកញ្ញា រយៈពេលជាងមួយឆ្នាំ បន្ទាប់ពីអ្នកស្រាវជ្រាវបានបោះពុម្ពផ្សាយនូវការសិក្សាមួយបង្ហាញការបញ្ចេញឧស្ម័នពិតប្រាកដនៅលើពិភពលោកនូវគំរូរថយន្ដ២គ្រឿងរបស់ VW គឺមានកម្រិតខ្ពស់ជាងការអនុញ្ញាត។
បន្ថែមទៅលើទុក្ខសោកនៃរឿងអាស្រូវបោកប្រាស់ការបញ្ចេញឧស្ម័ននេះ ប្រទេសសិង្ហបុរី បានផ្អាកការលក់រថយន្ដ VW ឌីយេស៊ែលរបស់ខ្លួន ហើយកាលពីព្រឹកថ្ងៃចន្ទ VW បាននិយាយថា ខ្លួនកំពុងតែហៅមកវិញនូវរថយន្ដឌីយេស៊ែលចំនួន១,៩៥០គ្រឿងនៅក្នុងប្រទេសចិន ដើម្បីកែម៉ាស៊ីន Software ដែលក្រុមហ៊ុនបានសារភាពថា បានបោកប្រាស់នោះ៕
VOA
VW នឹងប្ដូរបច្ចេកវិទ្យាឌីយេស៊ែល និងកាត់បន្ថយការវិនិយោគ
0 Comments