បាត់ដំបង ៖ កាលពីពាក់កណ្ដាលខែតុលាកន្លងទៅ ប្រពលរដ្ឋជាង២០០គ្រួសារ មកពីស្រុករុក្ខគីរីបាននាំគ្នាមកសាលាខេត្តបាត់ដំបងដើម្បីសុំឲ្យលោកអភិបាលខេត្តជួយដល់ពួកគាត់អំពីករណីដីធ្លីប៉ុន្តែត្រូវបានសមត្ថកិច្ចមិនឲ្យចូលដល់មុខសាលាខេត្ត ហើយផ្នែករដ្ឋបាលម្នាក់បានចេញទៅជួបពួកគាត់ និងបានសន្យាថានឹងពាំនាំកង្វល់របស់ពួកគាត់ជម្រាបជូនដល់លោកអភិបាលខេត្តឲ្យបានជ្រាប រហូតមកដល់ពេលនេះនៅថ្ងៃទី៣០ ខែវិច្ឆិកា ឆ្នាំ២០១៥ ពួកគាត់បាននាំគ្នាប្រហែលជា១០០នាក់មកមុខសាលាខេត្តម្តងទៀត ដោយពួកគាត់បញ្ជាក់ថា គ្មានអាជ្ញាធរណាបានចុះទៅជួយអន្តរាគមន៍ដល់ពួកគាត់ដូចបានសន្យាកាលពីលើកទីមួយនោះទេ ទើបពួកគាត់នាំគ្នាមកម្តងទៀតប៉ុន្តែបានជាពួកគាត់បានមកដល់មុខសាលាខេត្ត ដោយសារតែពួកគាត់ធ្វើដំណើរបំបែកគ្នា ទើបសមត្ថកិច្ចមិនបានហាមឃាត់។ ពួកគាត់បាននាំគ្នាមកនេះ មកពីឃុំពីរ គឺឃុំព្រៃត្រឡាច និងឃុំស្តុកប្រវឹក ហើយអ្វីដែលពួកគាត់តវ៉ានោះ ត្រង់ថាការរានព្រៃរបស់ពួកគាត់ក្នុងមួយគ្រួសារ ខ្លះបាន៣ហិកតា ខ្លះ២ហិកតា គ្រាន់បានប្រកបមុខរបរនោះតែងតែមានអ្នកជំនាញទៅហាមឃាត់ពួកគាត់តែបើសិនជាមន្ត្រី ឬអ្នកមានអំណាចដែលជាក្រុមគ្នាគេនោះ គេរានព្រៃយកដីម្នាក់ៗរាប់សិបហិកតាតាមតែចិត្តរបស់គេ ត្រង់ចំណុចនេះហើយ ទើបពួកគាត់មានការតវ៉ាដើម្បីឲ្យពួកគាត់ទទួលបានភាពសមធម៌។
ពួកគាត់បានបន្តថា អាជ្ញាធរខេត្តគួរតែជួយគិតគូរដល់ពួកគាត់ដែលជាប្រជាពលរដ្ឋ មិនគួរបណ្ដោយឲ្យអ្នកមានអំណាចធ្វើអ្វីតាមតែចិត្តនោះទេ ព្រោះពួកគាត់ត្អូញត្អែរថាកូនចៅរបស់ពួកគាត់ត្រូវការដីប្រកបមុខរបរខ្លះដើម្បីដោះស្រាយជីវភាពក្នុងក្រុមគ្រួសាររបស់គាត់។
នៅថ្ងៃនេះដែរ សាលាខេត្តបានឲ្យតំណាង៤រូបចូលជួបដើម្បីរកដំណោះស្រាយ តែនៅមិនទាន់ដឹងថា សាលាខេត្តចាត់មន្ត្រីចុះនៅពេលណាពួកគាត់ និងរង់ចាំបន្តរហូតដល់មានដំណោះស្រាយ៕
ប្រជាពលរដ្ឋនាំគ្នាមកសុំកិច្ចអន្តរាគមន៍ពីលោកអភិបាលខេត្តបាត់ដំបង
0 Comments