ព្រឹត្តិការណ៍ទី២ នៃ ITF Men’s Futtures Event ដែលមានឈ្មោះថា GLF ចម ប្រសិទ្ធ Open បានចាប់ផ្ដើមកាលពីថ្ងៃទី២៩វិច្ឆិកានេះ បន្ទាប់ពីព្រឹត្តិការណ៍ទី១ ដែលមានឈ្មោះថា GLF Open បានបញ្ចប់កាលពីថ្ងៃទី២៨វិច្ឆិកាមកនោះ។ ការប្រកួតធ្វើនៅមជ្ឈមណ្ឌលវាយកូនបាល់កម្ពុជានា Cambodia Country Club (CCC)។
កីឡាករដែលមានចំនួនច្រើនជាងព្រឹត្តិការណ៍ទី១ គឺ GLF Open បានចុះឈ្មោះចូលលេងជម្រុះនៅក្នុងព្រឹត្តិការណ៍ទី២នេះ និងបន្តទៅព្រឹត្តិការណ៍ទី៣ ដែលមានឈ្មោះថា GLF TepKhunnah Open បន្តទៀត។
GLF ចម ប្រសិទ្ធ Open នេះ សម្រាប់វិញ្ញាសាវាយជាឯកត្តជននោះ មានកីឡាករចូលរួមចំនួន៣២នាក់ ក្នុងនោះមានកីឡាករកម្ពុជា១រូប -ក្រៅពីនោះជាកីឡាករជប៉ុន-កូរ៉េ-បារាំង-ថៃ-កាហ្សាក់ស្ថាន-ចិន -អ៊ីស្រាអែល – ឥណ្ឌូនេស៊ី -អេស្ប៉ាញ- អាល្លឺម៉ង់ – តៃប៉ិ -ឥណ្ឌា និងរុស្សី។
សម្រាប់វិញ្ញាសាវាយគូវិញ ក៏មានកីឡាករ៣២រូបចូលរួមប្រកួតដែរ ក្នុងនោះក៏មានកីឡាករកម្ពុជាចូលរួមចំនួន៣រូប គឺម៉ម ផល្គុណ ឌឿម សុជាភារុណ និងឡុង សំនៀង និងមានកីឡាករបរទេសដែលមកពីប្រទេសប្រមាណ១៣ប្រទេស ដែលនេះជាលើកទី៥ហើយដែលកម្ពុជាទទួលរៀបចំនូវព្រឹត្តិការណ៍ប្រកួតលក្ខណៈអន្តរជាតិដ៏ធំបែបនេះ។
សម្រាប់ឆ្នាំនេះ កីឡាករបរទេសដែលចូលរួមមានចំណាត់ថ្នាក់ពិភពលោក(World Ranking) គឺសុទ្ធតែមានកម្រិតល្អ គឺលំដាប់លេខ៣៣០ ដែលកាលពីកន្លងមកអ្នកចូលរួមគឺមានលំដាប់លេខត្រឹម៥០០នោះ។
លោក ទេព រិទ្ធីវីទ្ធ អគ្គលេខាធិការសហព័ន្ធកីឡាវាយកូនបាល់កម្ពុជា ដែលជាអ្នកកៀរគរឲ្យមានព្រឹត្តិការណ៍នេះនៅកម្ពុជាបានចាត់ទុកថា ដោយសារតែកម្រិត នៃការប្រកួតកាន់តែខ្ពស់បែបនេះ ទើបកីឡាករដែលមាន Ranking ល្អៗក្នុងពិភពលោកមកចូលរួមប្រកួតកាន់តែច្រើននោះ។
ព្រឹត្តិការណ៍ទី២នេះ មានទាំងការប្រកួតវាយទោល និងវាយគូ ដូចព្រឹត្តិការណ៍ទី១ដែរ។ តាមការគ្រោងទុកព្រឹត្តិការណ៍ទី២នេះ នឹងបញ្ចប់នៅថ្ងៃទី០៥ធ្នូខាងមុខ។
គួរបញ្ជាក់ថា នៅក្នុងព្រឹត្តិការណ៍ទី១ GLF Open វិញ្ញាសាវាយទោលចំណាត់ថ្នាក់លេខ១បានទៅកីឡាករមកពីប្រទេសកូរ៉េឈ្មោះKwon Soon Woo និងលេខ២បានទៅកីឡាករមកពីឥណ្ឌាឈ្មោះ Son Ji Hoon។ ចំពោះវិញ្ញាសាវាយគូបានទៅកីឡាករ LEE Kuan Yi និងកីឡាករ LIU Shao Fan មកពីចិនតៃប៉ិ លេខ២ បានទៅកីឡាករKwon Soon Woo និងកីឡាករ Son Ji Hoon ដែលជាចំណាត់ថ្នាក់លេខ១ លេខ២ វាយឯកត្តជននោះ៕
ITF Men’s Futtures ចាប់ផ្ដើមព្រឹត្តិការណ៍ទី២GLF ចម ប្រសិទ្ធ Open
0 Comments