ភ្នំពេញ ៖ ទីផ្សារខុនដូនៅកម្ពុជានៅតែមានសុទិដ្ឋិនិយមនៅឡើយ ខណៈគម្រោងជាច្រើននឹងចាប់ផ្តើមសាងសង់នៅឆ្នាំ២០១៦ខាងមុខនេះ ក្នុងនោះខុនដូ The Penthouse Resident កម្ពស់៣៨ជាន់ នឹងបញ្ចប់ការសាងសង់នៅឆ្នាំ២០១៨ ខាងមុខនេះប្រសិនជាគ្មានអ្វីប្រែប្រួលទេនោះ។
អ្នកនាង អ៊ី វណ្ណារី បុគ្គលិកផ្នែកលក់នៃគំរោង The Penthouse Resident បានថ្លែងឲ្យដឹងតាមទូរស័ព្ទនាព្រឹកថ្ងៃទី១៥ ធ្នូថា គម្រោងនេះបានចាប់ផ្តើមលក់ កាលពីខែវិច្ឆិកាកន្លងមកនេះ ដោយទទួលបានការកក់ពីអតិថិជនរហូតដល់៣០ភាគរយហើយ។
គម្រោងនេះនឹងចាប់ផ្តើមបុកគ្រឹះ និងបង្ហាញបន្ទប់តាំងបង្ហាញនៅខែមករា២០១៦ខាងមុខនិងគ្រោងបញ្ចប់ការសាងសង់នៅឆ្នាំ២០១៨ខាងមុខនេះ ប្រសិន ជាគ្មានអ្វីប្រែប្រួលទេនោះ។ អ្នកនាងបន្តថា The Penthouse Resident សាងសង់ ទ្បើងលើផ្ទៃដី១៦៩២ម៉ែត្រការ៉េ ស្ថិតនៅតាមបណ្តោយផ្លូវសុធារស ក្នុងសង្កាត់ទន្លេបាសាក់ ខណ្ឌចំការមន ដែលស្ថិតនៅទីតាំងស្ថិតនៅទល់មុខផ្សារទំនើប AEON MALL។
អ្នកនាងបន្តថា “យើងជឿជាក់ថា គម្រោងនេះនឹងទទួលបានជោគជ័យ ព្រោះទីតាំងរបស់យើងស្ថិតនៅទល់មុខផ្សារទំនើប ភោជនីយដ្ឋាន ធនាគារ និងក្បែរព្រះបរមរាជវាំង ពិសេសការឌីសាញអគារនេះប្រកបដោយភាពទាក់ទាញ តាមរយៈការបំពាក់កញ្ចក់ជុំវិញអាគារនេះ ដែលអាចឲ្យអ្នកស្នាក់នៅក្នុងអគារនេះអាចសន្សំសំចៃថាមពលអគ្គិសនី។ អ្នកនាងបន្តថា “ឆ្នាំ២០១៨ ជាពេលដែលគម្រោងខុនដូជាច្រើន នឹង បញ្ចប់ការសាងសង់ ប៉ុន្តែយើងមិនព្រួយបារម្ភពីការប្រកួតប្រជែងនោះទេ ព្រោះក្រុមហ៊ុនបានផ្តល់ជូននូវលក្ខខណ្ឌបង់ប្រាក់ពិសេស និងអាចទទួលបានកម្ចីពីធនាគារ Maybank ដែលជាដៃគូរបស់យើង។
The Penthouse Resident ត្រូវបានវិនិយោគដោយក្រុមហ៊ុន The Penthouse Resident Co, Ltd និងដៃគូបរទេស ដែលមានបទពិសោធន៍លើវិស័យអចលនវត្ថុ។ គម្រោងនេះមានផ្ទះចំនួន ៤៥៨ យូនីត និងមានចំណតយានយន្តដែលអាចចតយានយន្តបានជាច្រើនរយគ្រឿង។ អ្នកនាងបន្តថា ចំណត យានយន្តមាននៅជាន់ក្រោមដីចំនួន២ជាន់ និងចាប់ពីជាន់ទី២ដល់ជាន់ទី៧ និងចាប់ពីជាន់ទី៨ដល់ជាន់ទី៣៧ជាលំនៅដ្ឋាន។ ចំណែកជាន់ទី៣៨ ជាទីតាំង Skybar, Swimming Pool, និងភោជនីយដ្ឋាន ដែលអាចឲ្យអតិថិជនគយគន់ទេសភាពគ្រប់ផ្នែកទាំងអស់នៃរាជធានីភ្នំពេញ។
អ្នកនាងអ៊ី វណ្ណារីបានបន្តថា The Penthouse Resident លក់ក្នុងតំលៃចាប់ពី២០០០ ដល់២៥០០ដុល្លារក្នុងមួយម៉ែត្រការ៉េ និងមានការបញ្ចុះតំលៃពិសេស១០ភាគរយ ប្រសិនជាអតិថិជនទិញមុនពេលសាងសង់ និងធនាលើការជួល៦ភាគរយនៃតំលៃខុនដូ។ ទោះជាយ៉ាងណាអ្នកនាងវណ្ណារី មិនបញ្ជាក់ឲ្យដឹងពីទុនវិនិយោគក្នុងគម្រោងនេះនោះទេ។
លោក សេង សុភ័ក្រ អគ្គនាយករងនៃក្រុមហ៊ុនអចលនទ្រព្យកម្ពុជាCPLបានថ្លែងថា តំលៃដែលគម្រោងនេះដាក់ចេញជាតំលៃល្អ ហើយទីតាំងរបស់គំរោងនេះក៏មានភាពល្អប្រសើរផងដែរ ព្រោះវាមានទីតាំងនៅជិតផ្សារទំនើប AEON MALLជា ទីតាំងមួយ ដែលកំពុងមានប្រជាប្រិយភាពយ៉ាងខ្លាំងនាពេលបច្ចុប្បន្ននេះ ស្របពេលដែលទីផ្សារខុនដូនៅកម្ពុជា នៅតែមានសុទិដ្ឋិនិយមនៅឡើយ ព្រោះគម្រោងនីមួយៗក្រោយពេលប្រកាសលក់ សុទ្ធតែលក់អស់ពី៧០ទៅ៨០ភាគរយ ដូច្នេះអ្នកអភិវឌ្ឍន៍សុទ្ធតែមើលឃើញសញ្ញាល្អនៃទីផ្សារនេះ ព្រោះបើពួកគេលក់មិនដាច់ ក៏ពួកគេមិនចំណាយប្រាក់រាប់លានដុល្លារដើម្បីវិនិយោគដែរ។
លោកបន្តថា “បច្ចុប្បន្នទីផ្សារ ខុនដូ កំពុងមានតម្រូវការច្រើន ព្រោះនៅកម្ពុជាមានកម្លាំងទិញខ្លាំង ដែលមានទាំងអ្នកវិនិយោគក្នុងស្រុក និងអ្នកវិនិយោគបរទេសកំពុងចាប់អារម្មណ៍លើទីផ្សារខុនដូនៅកម្ពុជា៕
អគារខុនដូកប់ពពកថ្មីមួយនឹងបង្ហាញខ្លួន នៅទល់មុខផ្សារទំនើប AEON MALL
0 Comments