ភ្នំពេញ ៖ កម្លាំងនគរបាលខណ្ឌសែនសុខ បានបន្តប្រើប្រាស់កម្លាំងទ្រង់ទ្រាយធំមកឆ្មក់ចូលបង្ក្រាបទីតាំងជួញដូរគ្រឿងញៀនដ៏ល្បីឈ្មោះ ១កន្លែងនៅភូមិត្រពាំងឈូកសង្កាត់ទឹកថ្លា (ម្តុំមុខពេទ្យលោកសង្ឃ) កាលពីវេលាម៉ោង៣រសៀលនថ្ងៃទី២៣ ខែតុលា ឆ្នាំ២០១៥នេះជាលទ្ធផលចាប់ខ្លួនក្រុមជនពាក់ព័ន្ធនៅក្នុងរង្វង់ប្រតិបត្តិការបាន១៩នាក់ និងឧបករណ៍សម្រាប់សេព មួយចំនួនទៀត។
នៅក្នុងការបង្ក្រាបនោះ ដឹកនាំកម្លាំងដោយលោក សក់ កញ្ញារិទ្ឋ អភិបាលរងខណ្ឌសែនសុខជាតំណាងរបស់លោក លី សាវេត អភិបាលខណ្ឌ និងលោកវរសេនីយ៍ឯក ម៉ក់ ហុង អធិការនគរបាលខណ្ឌ និងមានការចូលរួមពីលោកអធិការរង និងមេប៉ុស្តិ៍ជ្រាច្រើនរូបទៀត។
លោកវរសេនីយ៍ឯក ម៉ក់ ហុង អធិការនគរបាលខណ្ឌសែនសុខ បានមានប្រសាសន៍ថា នៅក្នុងប្រតិបត្តិការនេះ កម្លាំងរបស់លោក ចាប់ខ្លួនក្រុមជនពាក់ព័ន្ធប្រើប្រាស់គ្រឿងញៀនបាន១៩នាក់ក្នុងនោះមានស្រីម្នាក់ផង ព្រមទាំងរឹបអូសបាន ឧបករណ៍ប្រើប្រាស់មួយចំនួន និងដាវ សាម៉ូរ៉ៃចំនួន២ដើមផង។
ការបង្ក្រាបគ្រឿងញៀនរបស់សមត្ថកិច្ចខណ្ឌសែនសុខ បានធ្វើឡើងជាញឹកញាប់រាល់សប្តាហ៍ វាហាក់ដូចជាសមរភូមិរាំរៃមួយ រវាងក្រុមសមត្ថកិច្ច និងក្រុមជនសង្គមងងឹតគ្រឿងញៀនច្បាំងគ្នា បង្ក្រាប មិនចេះអស់មិនចេះហើយ ដែលមានរយៈពេលបរហែល២០ឆ្នាំហើយ នៅទីនោះ ទីបំផុតទីផ្សារគ្រឿងញៀនកាន់តែរីកធំឡើងៗនៅទីនោះដោយលួចលាក់ ហើយ ការចុះមកបង្ក្រាប របស់សមត្ថកិច្ចមកលើជនល្មើសគ្រឿងញៀនគឺ ប្រៀបដូចជា រឿងកំប្លែង រវាងសត្វឆ្មា និងកណ្តុរដូច្នេះឯង។
ទោះបីយ៉ាងណាសកម្មភាពរបស់ នៃការចុះបង្ក្រាបរបស់សមត្ថកិច្ចមូលដ្ឋានក៏ជាក្តីសង្ឃឹមមួយរបស់ ប្រជាជន ដែលធុញទ្រាន់ចំពោះវត្តមានដ៏ព្រហើនរបស់ក្រុមជនសង្គមងងឹត នៅពេលប៉ូលិសដកថយពីសមរភូមិនោះ ដែលយូរៗចុះមកបង្ក្រាបម្តងគ្រាន់បង្អើលពួកគេ។
គោលបំណងរបស់ប្រជាជនគឺចង់ឲ្យ ប៉ូលិសឬប៉េអិមកម្ទេចកម្ចាត់មេខ្លោងធំរបស់អ្នកជួញដូរថ្នាំញៀននៅទីនេះឲ្យអស់ ប៉ុន្តែរយៈពេលជាង២០ឆ្នាំហើយ បានត្រឹមតែបង្អើលៗចាប់លែងៗយកតែល្អមើលមិនខុសពីជនមាត់ដាចខ្លះនិយាយថា ប្រហែលជាមេគ្រឿងញៀនមានអំណាចធំជាងមេប៉ូលិសមូលដ្ឋាន៕
នគរបាលខណ្ឌសែនសុខ បន្តឆ្មក់ចូលបង្ក្រាបគ្រឿងញៀន នៅមុខពេទ្យលោកសង្ឃចាប់ខ្លួនបាន១៩នាក់
0 Comments