សៀមរាប ៖ កាលពីព្រឹកថ្ងៃ១៣កើត ខែ មិគសិរឆ្នាំ មមែ សប្តស័ក ព.ស២៥៥៩ ត្រូវនឹងថ្ងៃ ពុធ ទី ២៣ ខែ ធ្នូ ឆ្នាំ ២០១៥នៅបរិវេណវត្តព្រះឥន្ធកោសីយ៍ ក្រុងខេត្តសៀមរាប បានធ្វើពិធីគោរពព្រះវិញ្ញាណក្ខន្ធ ថ្វាយជូនព្រះសពព្រះសុមង្គលសិលាចារ្យ ឥន្ទកេសរោ បណ្ឌិតពេជ្រសនព្រះមេគណខេត្តសៀមរាប ដែលបានទទួលអនិច្ចធម៌ កាលពីវេលាម៉ោង ៥ និង ៤៥នាទីព្រឹក ថ្ងៃ៨ កើតខែ មិគសិរ ឆ្នាំ មមែ សប្តស័ក ព.ស២៥៥៩ ត្រូវនឹងថ្ងៃទី១៨ ខែ ធ្នូ ឆ្នាំ២០១៥ ក្នុងព្រះជន្មាយុ៨២ព្រះវស្សា ដោយព្រះរាគាពាធ នៅមន្ទីរពេទ្យ កាល់ម៉ែត្ររាជធានីភ្នំពេញ។
ពិធីនេះបានប្រព្រឹត្តទៅក្រោមវត្តមានរបស់លោកបណ្ឌិតឃឹម ប៊ុនសុងអភិបាលនៃគណៈអភិបាលខេត្តលោកនូ ផល្លាប្រធានក្រុមប្រឹក្សាខេត្តនិង លោកស្រី រួមទាំងការនិមន្ត អញ្ជើញចូលរួម ពីព្រះមហាវិមលធម្មពិន សែមសិរីសុវណ្ណោ ព្រះរាជាគណៈថ្នាក់ទោ និង ព្រះអនុគណក្រុង ស្រុក ព្រះថេរាព្រះថេរៈជាសិស្សគុណ និងឯកឧត្តម លោក ជំទាវ ជាសមាជិកក្រុមប្រឹក្សាខេត្ត គណៈអភិបាលខេត្ត អាជ្ញាធរជាតិអប្សរា មេបញ្ជាការបញ្ជាការរងកងកម្លាំង ប្រដាប់អាវុធទាំងបី ថ្នាក់ដឹកនាំមន្ទីរ អង្គភាព មន្ត្រីរាជការអាជ្ញាធរក្រុង ស្រុក ចៅសង្កាត់ និងប្រជាបរិស័ទផងដែរ។
ក្នុងការអាននូវជីវប្រវត្តិរបស់ព្រះសុមង្គលសិលាចារ្យឥន្ទកេសរោបណ្ឌិតពេជ្រ សនព្រះមេគណខេត្តដោយបានបញ្ជាក់ថា ក្នុងដំណើរក្នុងមួយជីវតរបស់ព្រះអង្គ បានតស៊ូដើម្បីដុតបំផ្លាញនូវកិលេសអវិជ្ជាចម្រើននូវគុណធម៌និងបញ្ញាឲ្យកើតឡើង ព្រមទាំងបានបណ្ដុះនូវសេចក្តីស្រឡាញ់មេត្តាករុណាចំពោះសិស្សគណនិងបងប្អូនពុទ្ធបរិស័ទ។ ស្ថិតពេលដែលព្រះអង្គនៅមានព្រះជន្មក្នុងនាមជាអគ្គមគ្គុទ្ទេសក៍ព្រះអង្គបានបំពេញភារកិច្ចដើម្បី ជូនមាតុប្រទេសរបស់ខ្លួន ទាំងវិស័យពុទ្ធចក្រ និង អាណាចក្រដោយបានកសាងនូវសមិទ្ធផលធំៗជាច្រើន នៅលើទឹកដីប្រវត្តិសាស្ត្រសៀមរាប ក្នុងការលើកស្ទួយនូវប្រពៃណី ទំនៀមទម្លាប់ វប្បធម៌ដោយមិនបានពុំគិតនូវពីផល ប្រយោជន៍បុគ្គលរបស់ខ្លួនឡើយ ។ដោយឃើញនូវស្នាដៃរបស់ព្រះអង្គ ទាំងនេះហើយដែលធ្វើឲ្យយើងជាថ្នាក់ ដឹកនាំគ្រប់ន្ត្រីរាជការ កងកម្លាំងប្រដាប់អាវុធ និង បងប្អូនកូន ចៅមានក្តីសោកស្ដាយ អាឡោះអាល័យរកទីបំផុត គ្មាន នូវព្រះគុណូបការៈដ៏ថ្លៃថ្លានិងវិសេសវិសាលដ៏ឧត្ដុង្គឧត្ដម នូវស្នាព្រហស្ត៍របស់ព្រះអង្គដែលបានបន្សល់ទុកនៅសមទ្ធិផលជាច្រើន សម្រាប់ជាតិមាតុភូមិ ក្នុងខេត្តសៀមរាប។
ក្នុងការតបស្នងចំពោះពីគុណបំណាច់ទាំងនេះហើយទើបអាជ្ញាធរខេត្ត បានរៀបចំពិធីគោរពព្រះវិញ្ញាណក្ខន្ធថ្វាយជូនដល់ព្រះសពព្រះសុមង្គលសិលាចារ្យឥន្ទកេសរោបណ្ឌិតពេជ្រ សនព្រះមេគណខេត្តដោយអានិសង្ស នៃអំពើដ៏ល្អទាំងឡាយ ដែលព្រះមេគណបានយឹតយោងព្រះវិញ្ញាណក្ខន្ធព្រះសុមង្គលសិលាចារ្យឥន្ទកេសរោបណ្ឌិតពេជ្រ សនបាននិមន្តទៅកាន់ឋានបរមសុខ ដែលជាទីរំលត់ទុក្ខ។
ក្នុងនោះដែរទាំងមន្ត្រីសង្ឃគណៈអភិបាលខេត្តក្រុមប្រឹក្សាខេត្តថ្នាក់ដឹកនាំមន្ទីរកងកម្លាំងប្រដាប់អាវុធមន្ត្រីរាជការ អាជ្ញាធរក្រុងស្រុក បាននិមន្ត និង អញ្ជើញដាក់កម្រងផ្កា និងបូជាទៀនធូប ថ្វាយនៅចំពោះមុខព្រះសពដើម្បីឧទ្ទិសព្រះវិញ្ញាណក្ខន្ធរបស់ព្រះអង្គបាននិមន្តទៅកាន់ព្រះបរមសុគតិភព ឲ្យបានគ្រប់ៗជាតិ កុំបីឃ្លៀងឃ្លាតឡើយ។
ក្នុងនោះដែរលោកបណ្ឌិតឃឹមប៊ុនសុងនិងលោកជំទាវក៏បាននាំយកនូវបច្ច័យចំនួន ២លានរៀលប្រគេនជូនព្រះសង្ឃដើម្បីយកទៅប្រើប្រាស់ក្នុងពិធីបុណ្យសពព្រះសុមង្គលសិលាចារ្យឥន្ទកេសរោ បណ្ឌិតពេជ្រ សនព្រះមេគណខេត្តផងដែរ ៕
ពិធីគោរពព្រះវិញ្ញាណក្ខន្ធ ថ្វាយព្រះសពមេគណខេត្ត
0 Comments