ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាមានប្រសាសន៍ថា កម្ពុជាកំពុងមាន សន្តិភាព ស្ថិរភាព និងការអភិវឌ្ឍន៍ ហើយគ្មានវិបត្តិនយោបាយអ្វីទាំងអស់។
ក្នុងពិធីសម្ពោធដាក់ឱ្យប្រើប្រាស់ជាផ្លូវការ វារីអគ្គិសនី ស្ទឹងតាតៃ ដែលមានអនុភាព ២៤៦ មេហ្គាវ៉ាត់ វិនិយោគដោយសាជីវកម្ម China National Heavy Machinery ក្នុងទឹកប្រាក់ ៥៤០លានដុល្លារអាម៉េរិក ស្តិតក្នុង ភូមិអន្លង់វាក់ ឃុំតាតៃ ស្រុកកោះកុង ខេត្តកោះកុង នាព្រឹកថ្ងៃទី ២៣ខែ ធ្នូ ឆ្នាំ ២០១៥ សម្ដេចតេជោ ថ្លែងថា អ្នកដែលចាត់ទុកថាមានវិបត្តិ គឺជាវិបត្តិផ្ទាល់ខ្លួន ឯអ្នកដែលកំពុងតែសប្បាយ គឺប្រជាជន។ ឥឡូវមានរឿងអ្វី កម្មវិធីសម្ពោធមានអាក់ខានដោយសារតែមនុស្សម្នាក់ ឬពីរអ្នកឯណា គឺអត់ផងណ្ណឹង អ្នកឯងកើតទុក្ខកើតតែម្នាក់ឯងទៅ អ្នកដែលជាប់គុកដោយសារប្រព្រឹត្តបទល្មើសឱ្យវាជាប់គុកទៅ វាកើតទុក្ខតែវាណ្ណឹងទៅ ព្រោះប្រព្រឹត្តអាក្រក់វាត្រូវតែជាប់គុក ឯអ្នកដែលគេសប្បាយ គឺគេសប្បាយទៅ។
ខ្ញុំសូមបញ្ជាក់ថា កម្ពុជាកំពុងមាន សន្តិភាព ស្ថិរភាព និងការអភិវឌ្ឍន៍។ ទាក់ទង និងការយាងនិវត្តន៍ របស់ព្រះករុណាព្រះមហាក្សត្រ ពីការបំពេញព្រះរាជទស្សនកិច្ច នៅប្រទេសឡាវនាព្រឹកថ្ងៃទី២៣ នេះដែរ សម្ដេចតេជោ ថ្លែងថា បន្ទាប់ពីពិធីសម្ពោធនេះ ខ្ញុំត្រូវប្រញាប់ប្រញាល់ទៅព្រលានយន្តហោះអន្តរជាតិភ្នំពេញដូរខោអាវភ្លាម ដើម្បីទទួលព្រះរាជដំណើរយាងនិវត្តន៍របស់ព្រះមហាក្សត្រ។ បើនាយករដ្ឋមន្ត្រីនៅក្នុងប្រទេស ហើយព្រះមហាក្សត្រយាងមកពីក្រៅប្រទេស អវត្តមាននាយករដ្ឋមន្ត្រីគឺជាការលំបាកមើលណាស់ នៅក្នុងក្របខណ្ឌជាខ្លឹមសារផង និង ក្របខណ្ឌពិធីការផង។
ពាក់ព័ន្ធនិងបញ្ហាអគ្គិសនីនេះផងដែរ សម្ដេចតេជា បានមានប្រសាសន៍ផ្ដល់ជូនសារនិង បញ្ជាក់បន្ថែមអំពីការងារដែលត្រូវធ្វើក្នុងវិស័យអគ្គិសនីថា ទន្ទឹមនឹងការកសាង វារីអគ្គិសនីឬ រោងចក្រអគ្គិសនី នៅកន្លែងនេះឬកន្លែងនោះ ក្រសួងរ៉ែ និងថាមពលនិង ក្រហ៊ុនអគ្គិសនីកម្ពុជាត្រូវធ្វើការងារ៣ សំខាន់ដែលចាំបាច់ត្រូវធ្វើ ក្នុងនោះមាន កិច្ចការទី១ ពង្រីកបណ្ដាញចែកចាយ ព្រោះថាបើយើងគ្រាន់តែផលិតថាមពលអគ្គិសនី ហើយយើងពុំមានបណ្ដាញចែកចាយ វាមិនខុសពីការដែលយើងផលិតរថយន្តហើយពុំមានផ្លូវបើកនោះទេ។ ដូច្នេះបញ្ហានេះត្រូវទៅទន្ទឹមគ្នាតែម្ដង ហើយសង្ឃឹមថាមិត្តចិន និងឱ្យខ្ចីប្រាក់ថែមទៀតដើម្បី នឹងតបណ្ដាញអគ្គិសនី។ ទុនសម្រាប់តបណ្ដាញអគ្គិសនីមានមួយផ្នែកជាទុនរបស់រដ្ឋ របស់អគ្គិសនីផ្ទាល់ និងដោយរាជរដ្ឋាភិបាលឱ្យខ្ចីខ្លះ តែក៏សូមអំពាវនាវចំពោះដៃគូអភិវឌ្ឍន៏ ដែលក្នុងនោះមានសាធារណរដ្ឋប្រជាមានិតចិន ហើយ ខ្ញុំក៏បានខ្ចីទុន ពីឥណ្ឌាដែរដើម្បីតបណ្ដាញពីខេត្តស្ទឹងត្រែង មកខេត្តក្រចេះ និងប្រើវិស័យឯកជនដើម្បីតភ្ជាប់ផងដែរ ដូចជាតភ្ជាប់ពី ក្រចេះ មកកាន់ខេត្តកំពង់ចាម និង ពីកំពង់ចាម មកកាន់រាជធានីភ្នំពេញ។ ដូច្នេះការ
ពង្រីកបណ្ដាញតទៅទៀត មានទាំងបណ្ដាញជាតិ និងបណ្ដាញចែកចាយថ្នាក់ក្រោមជាតិទៅកាន់មូលដ្ឋាន ព្រោះថាបច្ចុប្បន្នមាននៅសល់ខេត្តមួយចំនួន ដែលត្រូវតែតម្រង់ឆ្ពោះទៅ។ ប៉ុន្តែដើម្បីតទៅដល់ភូមិប្រជាពលរដ្ឋត្រូវប្រើប្រាស់ដើមទុន ដើម្បីតបណ្ដាញនេះទៅដល់ផ្ទះប្រជាពលរដ្ឋ ដើម្បីបញ្ឈប់នៅស្ថានភាពដែលឯកជនផលិតភ្លើង ហើយលក់តម្លៃខ្ពស់ឱ្យប្រជាពលរដ្ឋ។កិច្ចការទី២ ត្រូវពង្រឹងបណ្ដាញជាតិ ដើម្បីជៀសវាងការរអាក់រអួលផ្នែកបណ្ដាញអគ្គិសនីណាមួយនោះ។
កិច្ចការទី៣ គឺជាចំណុចដែលប៉ះពាល់ដោយផ្ទាល់ជាមួយប្រជាពលរដ្ឋតែម្ដង គឺត្រូវដាក់កម្មវិធី ដែលមានរួចមកហើយៗត្រូវអនុវត្តឱ្យបាន នូវការបញ្ចុះតម្លៃភ្លើងជាបន្តបន្ទាប់។ តម្លៃអគ្គិសនីទាក់ទងនឹងការប្រកួតប្រជែងអំពីផលិតកម្មផងដែរ តម្លៃអគ្គិសនីវាពាក់ព័ន្ធនឹងជីវភាពរបស់ប្រជាពលរដ្ឋ នៅពេលណាមួយនោះតម្លៃអគ្គិសនីនឹងផ្ដល់ផលប្រយោជន៍ឱ្យប្រជាពលរដ្ឋរបស់យើង ជាពិសេសប្រជាពលរដ្ឋដែលប្រើប្រាស់ចរន្តអគ្គិសនីក្រោម ៥០គីឡូវ៉ាត់។ ឥឡូវនេះអ្នកដែលទទួលបានផល
ប្រយោជន៍មុនគេ គឺកម្មករ កម្មការិនីនៅទីក្រុងភ្នំពេញ បន្ទាប់មកនឹងរាយទៅតាមតំបន់ទីប្រជុំជនមួយចំនួនទៀត ដែលមានកម្មករកម្មការិនីស្នាក់នៅ ដូច្នេះយើងឱ្យអ្នកប្រើតិចទទួលបានផលច្រើន៕
សម្ដេចតេជោសែន ៖ កម្ពុជាកំពុងមានសន្តិភាព ស្ថិរភាព និងការអភិវឌ្ឍ
0 Comments