ភ្នំពេញ ៖ អ្នកស្រី អេរីកា បូក (Erika Boak) ប្រធានផ្នែកអប់រំនៃអង្គការយូនីសេហ្វបានឲ្យដឹងថា កម្ពុជាត្រូវការសាងសង់បង្គន់អនាម័យចំនួន៥៥៦០០ទៀតនៅកម្រិតបឋមសិក្សានៅទូទាំងប្រទេស ដើម្បីឆ្លើយតបទៅនឹងតម្រូវការសមរម្យ របស់កុមារា និងកុមារី។
អ្នកស្រី អេរីកា បូក បានបន្តថា ការខិតខំប្រឹងប្រែងក្នុងការសាងសង់បង្គន់អនាម័យនៅថ្នាក់បឋមសិក្សានៅក្នុងឆ្នាំ២០១៥នេះ បាននាំឲ្យមានលទ្ធផលជាវិជ្ជមាន។ ប៉ុន្តែថាចំនួនបង្គន់ទាំងនោះនៅមិនទាន់គ្រប់គ្រាន់នៅឡើយទេ។
ការលើកឡើងរបស់ប្រធានផ្នែកអប់រំនៃអង្គការយូនីសេហ្វខណៈពេលដែលបានអញ្ជើញចូលរួមទិវាពិភពលោកស្តីពី «ការលាងសម្អាតដៃ និងអនាម័យនៅតាមគ្រឹះស្ថានសិក្សា»កាលពីថ្ងៃទី២២ខែធ្នូឆ្នាំ២០១៥នៅសាលាបឋមសិក្សាចៅពញាហុក ក្នុងខណ្ឌចំការមនដែលរៀបចំឡើងរួមគ្នាដោយក្រសួងអប់រំយុវជននិងកីឡា និងអង្គការយូនីសេហ្វ ។
យុទ្ធនាការជំរុញអនាម័យនៅថ្នាក់បឋមសិក្សានេះ ត្រូវបានរៀបចំធ្វើឡើងដើម្បីជាផ្នែកមួយនៃការចូលរួមកាត់បន្ថយអត្រា មរណភាពកុមារផង និងការលើកស្ទួយគុណភាពអប់រំកម្រិតបឋមសិក្សាផង។
លោកស្រី គឹម សេដ្ឋានី រដ្ឋលេខាធិការក្រសួងអប់រំបានថ្លែងនៅក្នុងពិធីនៃទិវាពិភពលោក ស្តីពីការលាងសម្អាតដៃ នោះ ដោយទទួលស្គាល់ថា កង្វះអនាម័យក្នុងជីវិតប្រចាំថ្ងៃបានធ្វើឲ្យប៉ះពាល់ដល់ការលូតលាស់ របស់កុមារ។ លោកស្រីបញ្ជាក់ថា« កង្វះអនាម័យបង្កឲ្យឆ្លងដង្កូវព្រូន និងធ្វើឲ្យកុមារមានភាពស្លេកស្លាំង ឈានទៅកង្វះអាហារូបត្ថម្ភ ប្រឈមនឹងភាពក្រិន និងមានផលប៉ះពាល់ដល់ការរីកលូតលាស់របស់កុមារ ទាំងផ្នែករាងកាយ និងស្មារតី ដោយសារជំងឺរាគរូស ជំងឺផ្លូវដង្ហើមស្រួចស្រាវ ជំងឺក្រិន និងជំងឺភ្នែកក្រហមជាដើម»។
ការមិនមានបង្គន់អនាម័យនៅក្នុងគ្រឹះស្ថានបឋមសិក្សា រឹតតែបង្កឲ្យសិស្សានុសិស្សតូចៗប្រឈមនឹងភាពខ្វះអនាម័យកាន់តែច្រើន។បើ មានបង្គន់អនាម័យនៅតាមគ្រឹះស្ថានសិក្សា នឹងជួយការពារកុមារពីភាពខ្វះអនាម័យ។ បច្ចុប្បន្ននេះ កង្វះបង្គន់អនាម័យក៏ជាឧបសគ្គមួយ ក្នុងការងារពង្រឹងគុណភាពអប់រំថ្នាក់បឋមសិក្សានៅកម្ពុជាដែរ។
អ្នកស្រី អេរីកា ប្រធានផ្នែកអប់រំនៃអង្គការយូនីសេហ្វប្រចាំនៅកម្ពុជាបានបញ្ជាក់ថា នៅពេលដែលស្តង់ដារថ្នាក់ជាតិរបស់កម្ពុជា បានកំណត់ឲ្យកុមារាថ្នាក់បឋមសិក្សាប្រហែល៥០នាក់ ត្រូវប្រើប្រាស់បង្គន់មួយ និងកុមារីប្រហែល៣៣នាក់ត្រូវបង្គន់មួយនោះ ស្ថានភាពបច្ចុប្បន្នបង្ហាញថា មានកុមារារហូតដល់១៧៣នាក់ និងកុមារីរហូត១៥៧នាក់ បានប្រើប្រាស់បង្គន់មួយ។អ្នកស្រីបានបន្ថែមថា «ដូច្នេះតួលេខនេះបញ្ជាក់ថា កម្ពុជានៅត្រូវការសាងសង់បង្គន់អនាម័យចំនួន៥៥៦០០ទៀត នៅកម្រិតបឋមសិក្សានៅទូទាំងប្រទេស ដើម្បីឆ្លើយតបទៅនឹងតម្រូវការសមរម្យ របស់កុមារា និងកុមារី»។
គួរបញ្ជាក់ថា កង្វះខាតបង្គន់អនាម័យនៅតាមសាលាបឋមសិក្សានៅប្រទេសកម្ពុជាមិនមែនកើតឡើងដោយសារតែ ការមិនបានសាងសង់ប៉ុណ្ណោះទេ។ ប៉ុន្តែនៅតាមសាលាខ្លះដែលមានបង្គន់អនាម័យហើយ បែរជាខ្វះការថែទាំ ហើយក៏ត្រូវបិទទ្វារទុកចោលមិនប្រើប្រាស់ក៏មានដែរ៕
កម្ពុជាត្រូវការបង្គន់អនាម័យជាង៥ម៉ឺនទៀត សម្រាប់ថ្នាក់បឋមសិក្សា នៅទូទាំងប្រទេស
0 Comments