ភ្នំពេញ ៖ ទូរទស្សន៍ហង្សមាសបានសម្រេចចិត្តប្ដឹងអតីតបេក្ខជនរូបនេះទៅកាន់សាលាដំបូងរាជធានីភ្នំពេញហើយ ខណៈដែល ម៉ៅ ហាជី ប្រកាសថា នឹងមិនរួញរាក្នុងការប្រឈមមុខឡើយ។
ទំនាស់ដ៏ស្រួចស្រាល់របស់ ម៉ៅ ហាជី និងក្រុមហ៊ុនហង្សមាសបានផ្ទុះឡើង ក្រោយពីដំណឹងចុះកុងត្រារបស់អតីតបេក្ខជន Cambodian Idol មានប្រជាប្រិយរូបនេះជាមួយនឹងផលិតកម្មថោន ដែលគេដឹងថា ជាដៃគូប្រជែងរបស់ផលិតកម្មហង្សមាសនោះ។ រឿងរ៉ាវចម្រូងចម្រាសរំលោភកិច្ចសន្យារបស់អតីតបេក្ខជន Cambodian Idol ម៉ៅ ហាជី បានក្លាយជាប្រធានបទមួយសំខាន់ចុងក្រោយដែលទស្សនិកជនគ្រប់ស្រទាប់ចង់ដឹង និងបន្តតាមដាន។
បើតាមភាគីខាងទូរទស្សន៍ហង្សមាសលើកឡើងថា បេក្ខជនដែលចូលប្រឡងដល់វគ្គ Live Show ទាំង១២នាក់ចុងក្រោយត្រូវបានចុះកុងត្រារយៈពេលមួយឆ្នាំ។ ក្រោយលេចចេញដំណឹងកុងត្រារយៈពេល៥ឆ្នាំបានមួយថ្ងៃ លោក មាស រិទ្ធី អ្នកអានព័ត៌មាន និងជាអគ្គនាយករងស្ថានីយទូរទស្សន៍ហង្សមាសបានប្រកាសឲ្យ ម៉ៅ ហាជី ចូលខ្លួនមកដោះស្រាយរឿងរំលោភកិច្ចសន្យាទៅចុះកុងត្រាជាមួយផលិតកម្មផ្សេង ដែលមិនទាន់ចប់កុងត្រាកម្មវិធី Cambodian Idol នៅឡើយ។ ម៉ៅ ហាជី នឹងត្រូវសងថ្លៃជំងឺចិត្តច្រើនម៉ឺនដុល្លារជាថ្នូរនឹងការគេចចេញមិនព្រមចូលខ្លួនដោះស្រាយ ក្នុងពេលហង្សមាសបានទុកឱកាសឲ្យចូលមកបកស្រាយច្រើនលើករួចទៅហើយ។ នេះបើតាមការបញ្ជាក់របស់លោក មាស រិទ្ធី។
លោកបញ្ជាក់ហង្សមាសបានសម្រេចឲ្យមេធាវីដាក់ពាក្យបណ្ដឹងទៅកាន់តុលាការក្រុងភ្នំពេញហើយតុលាការនឹងចេញដីកាកោះហៅបេក្ខជនរូបនេះក្នុងពេលដ៏ខ្លី ហើយបើនៅតែមិនព្រមចូលខ្លួនដូចអ្វីដែលខាងហង្សមាស ព្យាយាមទាក់ទងទៅមិនបានសម្រេចទៀតនោះគឺចំណាត់ការចុងក្រោយនឹងចុះចាប់ខ្លួនទៅតាមផ្លូវច្បាប់។
ដោយឡែក ម៉ៅ ហាជី វិញ បានបញ្ជាក់ប្រាប់«កម្ពុជាថ្មី»ថា អ្វីដែលហង្សមាសបង្កឡើងគឺជាការបង្ខូចកិត្តិយស និងរំលោភលើសិទ្ធិខ្លួនទាំងស្រុង ហើយលោកមិនមានលក្ខខណ្ឌណាមួយដែលតម្រូវឲ្យលោកត្រូវចូលខ្លួនដោះស្រាយនោះឡើយ។ ជាមួយគ្នានោះ ម៉ៅ ហាជី ក៏បានប្រកាសថា លោកមិនខ្លាចចំពោះចំណាត់ការណាមួយរបស់ហង្សមាសនោះដែរ។ លោកបញ្ជាក់ថា មួយរយៈចុងក្រោយនេះលោកមមាញឹកនឹងការងារតាមខេត្ត ហើយក៏មិនមានចេតនាគេចចេញណាមួយដែរ។
លោកថា មិនមានហេតុផល ដែលនាំឲ្យហង្សមាសសម្រេចចិត្តប្ដឹងលោកឡើយ ខណៈដែលលោកនៅមិនទាន់ចុះកុងត្រាផ្លូវការណាមួយជាមួយផលិតកម្មណានោះទេ គឺលោកគ្រាន់តែបានជជែកលែងជាមួយអ្នកភ្លេង និងបុគ្គលិករបស់ក្លិបថោនក្នុងពេលផឹកស៊ីបានម្ដងពីរដងធ្វើឲ្យការទំនាក់ទំនងមានភាពល្អប្រសើរ បន្ទាប់ពីខ្លួនប្រឡងធ្លាក់ពីកម្មវិធី Cambodia Idol ប៉ុណ្ណោះ។
លោក ម៉ៅ ហាជី បានសង្កត់ធ្ងន់ថា ការចុះកុងត្រាជាមួយ Cambodian Idol គឺគ្រាន់តែចងបេក្ខជនបេក្ខនារីកុំឲ្យរត់ចោលការប្រឡងមុនពេលកម្មវិធីត្រូវបានពន្យារពេល ប៉ុន្តែឥឡូវកម្មវិធីហ្នឹងចប់ហើយ។ លោកក៏ស្នើឲ្យហង្សមាសស្វែងរកភស្តុតាងពិតប្រាកដណាមួយដែលបានបញ្ជាក់ថា លោកចុះកុងត្រា៥ឆ្នាំជាមួយផលិតកម្មថោនដូចអ្វីដែលបានប្រកាសឡើង៕
ម៉ៅ ហាជី មិនញញើតនឹងបណ្ដឹងរបស់ហង្សមាសឡើយ
0 Comments