អ្នកនាំពាក្យម្នាក់របស់អាកាសយានដ្ឋានអន្តជាតិម៉ៃអាមី បានឲ្យដឹងថា អ្នកដំណើរទាំងអស់នៅលើយន្តហោះក្រុមហ៊ុនអាកាសចរណ៍អាមេរិក ត្រូវបាននាំចេញ ដើម្បីត្រួតពិនិត្យ ហើយយន្តហោះក៏អនុញ្ញាតឲ្យបន្តដំណើរដូចធម្មតាវិញដែរ កាលពីល្ងាចថ្ងៃអង្គារ បន្ទាប់ពីក្រុមនគរបាលបានកំណត់មុខសញ្ញាច្បាស់ថា វត្ថុសង្ស័យ ដែលគេឲ្យការណ៍អំឡុងជើងហោះហើរពីទីក្រុងប៉ារីស ប្រទេសបារាំង គ្មានការគំរាមកំហែងនោះទេ។
គួរឲ្យដឹងថា អ្នកដំណើរទាំងអស់ ២១៧ នាក់ និងក្រុមអាកាសយានិក ១៤ នាក់ ដែលគ្រោងនឹងធ្វើដំណើរចេញពីទីក្រុងប៉ារីសឆ្ពោះទៅកាន់ទីក្រុងម៉ៃអាមី តាមយន្តហោះធន់ Boeing 777 ត្រូវបានគេនាំចេញពីយន្តហោះ ហើយរង់ចាំនៅលើរថយន្តក្រុង ខណៈដែលក្រុមស៊ើបអង្កេតមកពីនាយកដ្ឋាននគរបាលក្រុងម៉ៃអាមី ត្រួតពិនិត្យវត្ថុសង្ស័យនោះ។
ក្រោយពេលដែលវត្ថុសង្ស័យ ត្រូវបានកំណត់មុខសញ្ញារួចថា គ្មានអ្វីគំរាមកំហែងទេនោះ ក្រុមអ្នកដំណើរ និងអាកាសយានិកត្រូវបានអនុញ្ញាតឲ្យឡើងជិះយន្តហោះម្តងទៀត រួចបន្តដំណើរដូចធម្មតា ឆ្ពោះទៅកាន់គោលដៅរបស់ពួកគេ។
ទោះបីជាយ៉ាងណាក៏ដោយ ក្រុមមន្ត្រីមិនបានបញ្ជាក់ឲ្យបានច្បាស់ថា វត្ថុគួរសង្ស័យនោះជារបស់អ្វីនោះទេ។
ប្រភពព័ត៌មានចុងក្រោយបានឲ្យដឹងថា ជើងហោះហើរខាងលើបានធ្វើដំណើរមកដល់ចំណុចគោលដៅនៅវេលាម៉ោង៣និង៣៥នាទីរសៀលម៉ោងក្នុងស្រុកត្រូវនឹងម៉ោង២០និង៣៥ នាទីម៉ោងសកល ហើយយន្តហោះដដែល ត្រូវបានអូសយកទៅកាន់កន្លែងត្រួតពិនិត្យក្នុងព្រលានយន្តហោះ ខណៈដែលការស៊ើបអង្កេតកំពុងបន្ត៕
ក្រុមមន្ត្រីបានអះអាងថា វត្ថុសង្ស័យលើជើងហោះហើរពីទីក្រុងប៉ារីស ទៅកាន់ម៉ៃអាមី គ្មានអ្វីគំរាមកំហែងនោះទេ
0 Comments