ភ្នំពេញ ៖ អភិបាលរាជធានីភ្នំពេញ លោកប៉ា សុជាតិវង្ស បានធ្វើការណែនាំឲ្យមន្ទីរ រៀបចំដែនដី នគរោបនីយកម្ម សំណង់ និង សុរិយោដីរាជធានីភ្នំពេញកំណត់តួប្រឡាយហា និងប្រឡាយភូមិមល ឲ្យបានច្បាស់លាស់ មុនប្រគល់កម្មសិទ្ធិជូនប្រជាពលរដ្ឋនៅជិតប្រឡាយនេះ ជៀសវាងកំអោយប្រជាពលរដ្ឋសាងសង់លំនៅដ្ឋានរំលោភលើប្រឡាយបន្តទៀត។
លោកប៉ា សុជាតិវង្ស បានធ្វើការណែនាំបែបនេះ កាលពីព្រឹកថ្ងៃទី៤ ធ្នូ ឆ្នាំ២០១៥ គឺក្នុងខណៈដែលលោកបានអញ្ជើញជាអធិបតីភាព ក្នុងពិធីបើកការដ្ឋានស្ថាបនាស្ពានថ្ម២កន្លែង គឺស្ពានបឹងតាម៉ាតឆ្លងកាត់ប្រឡាយភូមិមល និងស្ពានឆ្លងកាត់ប្រឡាយហា ស្ថិតនៅតាមព្រំប្រទល់ខណ្ឌមានជ័យនិងខណ្ឌដង្កោ។
លោកប៉ា សុជាតិវង្ស បានមានប្រសាសន៏ថា ប្រឡាយខាងលើនេះ ត្រូវបានប្រជាពលរដ្ឋរំលោភយក ដោយសាងសង់លំនៅដ្ឋានលើប្រឡាយដែលធ្វើឲ្យតួប្រឡាយកាន់តែរួមតូច មិនអាចរំដោះទឹកបានលឿន ដោយមើលឃើញពីបញ្ហានេះ សាលារាជធានីភ្នំពេញក៏បានធ្វើការអភិវឌ្ឍន៍ប្រឡាយនេះឡើងរួមនិងការកសាងស្ពានថ្មឆ្លងកាត់ប្រឡាយនេះផងដែរ។ លោកបន្តថា ប្រឡាយនេះដាច់ខាតត្រូវតែសាងសង់ផ្លូវនៅសងខាងប្រឡាយ ដើម្បីឲ្យគ្រឿងចក្រចូលស្តាប្រឡាយបាន បើមិនដូច្នោះទេ យើងមិនអាចស្តាប្រឡាយនេះបានឡើយ។ លោកប៉ា សុជាតិវង្សក៏បានបញ្ជាក់ផងដែរថា លើកបញ្ហានេះសម្រាប់មន្ទីរ រៀបចំដែនដី នគរូបនីយកម្ម សំណង់ និង សុរិយោដីរាជធានីភ្នំពេញត្រូវចុះមកពិនិត្យនិងកំណត់តួប្រឡាយហា និងប្រឡាយភូមិមល ឲ្យបានច្បាស់លាស់ ថាតួប្រឡាយមានទំហំប៉ុណ្ណា នៅសល់ពីនោះ វាជាដីរបស់ប្រជាពលរដ្ឋ ធ្វើប្លង់កម្មសិទ្ធិជូនពួកគាត់ទៅ។
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានមានប្រសាសន៍ថា ស្ពានបឹងតាម៉ាតឆ្លងកាត់ប្រឡាយភូមិមល ដែលត្រូវស្ថាបនាឡើងនេះមានប្រវែង២៤ម៉ែត្រ ទទឹង១៣ម៉ែត្រកន្លះ និងស្ពានឆ្លងកាត់ប្រឡាយហាប្រវែង១៥ម៉ែត្រ ទទឹង១៣ម៉ែត្រកន្លះ ជាស្ពានបេតុង ស្ថិតនៅតាមព្រំប្រទល់ខណ្ឌមានជ័យនិងខណ្ឌដង្កោ។ លោកបន្តថា ផ្លូវបេតុងបឹងតាម៉ាតតភ្ជាប់ពីផ្លូវលេខ៣៧១មកផ្លូវ២១៧បានស្ថាបនាឡើងកាលពីឆ្នាំ២០១២ជាប្រភេទផ្លូវបេតុងមានទទឹង៧ម៉ែត្រ មានតួនាទីក្នុងការដោះចរាចរពីផ្លូវលេខ៣៧១មកពីតំបន់ចម្ការដូងឆ្ពោះទៅក្រុងតាខ្មៅ ផ្លូវជាតិលេខ២ លេខ៣ ពិសេសរំដោះចរាចរពីចំណុចស្ពានមល ដែលមានចរាចររថយន្តធុនធ្ងន់ យ៉ាងមមាញឹកជាប្រចាំ ប៉ុន្តែកំណាត់ផ្លូវបឹងតាម៉ាតនេះបច្ចុប្បន្ន ពុំទានអាចដោះស្រាយចរាចររថយន្តធុនធ្ងន់នៅឡើយទេ ដោយសារស្ពានតភ្ជាប់ពីផ្លូវលេខ៣៧១ ជាស្ពានដែកចាស់តូច មានភាពចាស់ទ្រុឌទ្រោម និងពុំអាចធ្វើចរាចរធុនធ្ងន់បាន។ដោយឡែកស្ពានឆ្លងកាត់ប្រឡាយហាតភ្ជាប់ពីផ្លូវ២១៧មកព្រៃស ជាផ្លូវបេតុងដែលទើបនឹងស្ថាបនារួចកាលពីឆ្នាំ២០១៤មានទទឹង៨ម៉ែត្រ ប៉ុន្តែត្រង់ចំណុចស្ពាន ឆ្លងកាត់ប្រឡាយហាជា ស្ពានដែកតូចមានទទឹងត្រឹមតែ៥ម៉ែត្រ និងមានភាពចាស់ទ្រុឌទ្រោម ដែលស្ពានទាំង២នេះ ទាមទារសាងសង់ស្ពានបេតុងថ្មី ធំ មាំ និងត្រឹមត្រូវតាមស្តង់ដារបច្ចេកទេស ធានាសុវត្ថិភាព ក្នុងការបើកបរ ដឹកជញ្ជូនធុនធ្ងន់។ ដោយហេតុនេះហើយ ដើម្បីបញ្ចៀសការកកស្ទះចរាចរ ទើបសាលារាជធានីភ្នំពេញស្ថាបនាស្ពានថ្មថ្មីទាំង២នេះតែម្តង៕
អភិបាលរាជធានីណែនាំឲ្យមន្ទីររៀបចំដែនដីកំណត់តួប្រឡាយហា ប្រឡាយភូមិមល មុនប្រគល់កម្មសិទ្ធិជូនប្រជាពលរដ្ឋ
0 Comments