រតនគិរី ៖ ប្រសិនបើអស់លោកអ្នក បានស្តាប់អត្ថន័យក្នុងបទចម្រៀងមួយបទ មានចំណងជើងថា«អកបឹងកន្សែង»ដែលបង្ហើរសំនៀងដោយអធិរាជសំឡេង មាសលោកស៊ីន ស៊ីសាមុត នោះយើងនឹងភ្នកគិតនឹកឃើញដល់កន្លែងលេងកម្សាន្តមួយ ដែលមានឈ្មោះថា«បឹងកន្សែង»នាទឹកដីខេត្តរតនគិរីជាក់ជាមិនខាន។
«ជ្រោះជ្រងសែនជ្រៅទឹកនៅស្ងៀមនឹង ដងព្រៃស្ងាត់ឈឹងដាក់នាមហៅបឹងកន្សែង សារាយព្រលឹតកៀកកាយប្រឡែង ថ្ងៃចចាំងសូរ្យសែង អស់ឱ!កន្លែងកម្សាន្ត…!» នេះជាប្រយោគ១ឃ្លា ដែលបានពិពណ៌នារៀបរាប់ពីសម្រស់បឹងធម្មជាតិមួយចោលសម្រស់ឆើតឆាយពួនកាយនៅក្នុងព្រៃជ្រៅនៃខេត្តរតនគិរីនាសម័យមុន ហើយនៅពេលបានស្តាប់នូវអត្ថន័យបទចម្រៀងនេះភ្លាម គឺក្នុងចិត្តហាក់គិតអណ្ដែតអណ្ដូងថា តើទេសភាពនៅបឹងកន្សែងពិតជាមានភាពស្រស់បំព្រងមែនឬបានជាធ្វើឲ្យលោកស៊ីន ស៊ីសាមុតងប់នឹងសម្រស់ធម្មជាតិនៅទីនោះដកចិត្តមិនរួចយ៉ាងនេះ។
បឹងកន្សែងមានទីតាំងស្ថិតនៅក្នុងទឹកដីភូមិអូរកន្សែង ក្រុងបានលុង ខេត្តរតនគិរីមានចម្ងាយជាង១គីឡូម៉ែត្រពីក្រុងបានលុង កាលពីសម័យមុន នៅតំបន់បឹងកន្សែងនេះគឺសំបូរទៅដោយដើមរុក្ខជាតិគ្រប់ប្រភេទដុះទ្រុបទ្រុលរីកផ្កាចោលក្លិនពិដោរក្រអូបឈ្ងុយឈ្ងុប។ ចំណែកឯនៅក្នុងបឹងកន្សែងវិញពោរពេញទៅដោយសារាយ ព្រលឹតមានផ្ការីករហង់ និងមានទឹកត្រជាក់ថ្លាយង់ពេលដែលសម្រស់ធម្មជាតិនៅបឹងកន្សែងបានទាក់នឹងក្រសែភ្នែកនរណាម្នាក់ហើយនោះគឺពិបាកនឹងដកចិត្តរួចណាស់។ ប៉ុន្តែបច្ចុប្បន្ននៅទីនេះវាមានសភាពខុសប្លែកពីមុនខ្លះៗពោលត្រូវជំនួសដោយលំនៅដ្ឋាន មន្ទីរពេទ្យ ភោជនីយដ្ឋាននិងសណ្ឋាគារប្រណីតៗស្អេកស្កះពីភាពស្ងាត់ជ្រងំដោយព្រៃធម្មជាតិប្រែមកជាមានភាពអឺងកងនៃមនុស្សម្នាទៅវិញ។
ទោះបីយ៉ាងណាបឹងកន្សែងក៏នៅបានរក្សាទុកភាពដើមរបស់ខ្លួន បានខ្លះនោះដែរគឺសភាពដ៏ត្រកាលនៃផ្ទៃបឹងនៅមានទឹកថ្លា គួរឲ្យចង់ងូតលេង មានសារាយ ព្រលឹតដដែលមើលទៅគួរឲ្យចម្លែកណាស់ ពិសេសនាពេលថ្ងៃរៀបអស្ដង្គតដែលទេសភាពទាំងនេះគឺជាមន្តស្នេហ៍អន្ទងចងចិត្តអ្នកទេសចរឲ្យទៅលេងកម្សាន្តនៅបឹងកន្សែងជារៀងរាល់ថ្ងៃ។
គេអាចមកលំហែកាយសប្បាយនៅបឹងកន្សែង បានតាំងពីព្រឹក រហូតដល់យប់ដោយជួបជុំគ្នាជាលក្ខណៈក្រុមគ្រួសារ មិត្តភក្តិ ឬក៏គូស្នេហ៍យុវវ័យអង្គុយញុំាអាហារនៅក្បែរមាត់បឹងសំឡឹងផ្ទៃទឹកថ្លាដូចកញ្ចក់យ៉ាងជក់ចិត្តបំផុតជាមួយនឹងការរំលឹកនឹកឃើញដានអនុស្សាវរីយ៍បទចំរៀងអកបឹងកន្សែងរបស់លោកតាស៊ីន ស៊ីសាមុតទៀតនោះគឺរឹតតែធ្វើឲ្យអ្នកដែលបានមកដល់ឬអង្គុយលេងនៅទីនេះកាន់តែរំភើបមិនចង់ឈានជើងដើរចាកចេញពីបឹងកន្សែងនោះឡើយ។
គ្រប់ពេលនៅបឹងកន្សែងតែងតែមានភាពអ៊ូអរពីសំណាក់បងប្អូនប្រជាពលរដ្ឋមកពីទីជិតឆ្ងាយក៏ដូចជាអ្នកទេសចរដែលបានមកទេសចរណ៍នៅខេត្តរតនគិរីបានស្កាត់មកចង់ឃើញ ចង់ស្គាល់ថាតើបឹងកន្សែងដែល ជីកកប់ទៅដោយដានអនុស្សាវរីយ៍របស់ទឹកដៃកវីនិពន្ធជំនាន់ដើមតាក់តែងសរសើរពីសម្រស់ទេសភាពធម្មជាតិនៅបឹងកន្សែងក្នុងទំនុកបទចម្រៀងនោះមានទិដ្ឋភាពស្រស់ត្រកាលមែនឬយ៉ាងណា?
សព្វថ្ងៃបើទោះបីជាបឹងកន្សែងបានរលុបបាត់នូវភាពដើមបន្តិចមែន ក៏ប៉ុន្តែបើនិយាយពីការទាក់ទាញវិញនៅតែលេចធ្លោសម្រាប់អ្នកនៅក្នុងតំបន់ក្បែរៗនោះមកលំហែកាយដែលក្លាយទៅជាកន្លែងជួបជុំមួយគួរឲ្យចេតនាបំផុតទៅនឹងធម្មជាតិនៅទីនេះ ពិសេសបឹងកន្សែងគឺជាកន្លែងកម្សាន្តមួយដ៏ពេញនិយមផងដែរសម្រាប់គូស្នេហ៍យុវវ័យនាំគ្នាមកទស្សនាព្រះសុរិយារៀបអស្ដង្គត៕
បឹងកន្សែងជាកន្លែងបង្កប់ដោយកម្រងអនុស្សាវរីយ៍ ក្នុងបទចម្រៀងពីសម័យដើម
0 Comments