ពោធិ៍សាត់ ៖ រថយន្តមួយគ្រឿងបានបើកបត់លើផ្លូវជាតិលេខ៥មិនមើលមុខក្រោយ ក៏ត្រូវអ្នកដំណើរជិះម៉ូតូមួយគ្រឿង ច្រាសទិសបុករថយន្តនោះបណ្ដាលឲ្យអ្នកជិះម៉ូតូសន្លប់ឈឹងរបួសធ្ងន់ ឯអ្នកបើករថយន្តបានបើកគេចបាត់។
ហេតុការណ៍នេះបានកើតឡើងកាលពីថ្ងៃទី២៤ ខែធ្នូ ឆ្នាំ២០១៥ វេលាម៉ោង១៧និង៣០នាទីល្ងាច នៅលើផ្លូវជាតិលេខ៥ចន្លោះគីឡូម៉ែត្រលេខ១៧១-១៧២ ស្ថិតនៅភូមិធ្លាម្អម ឃុំត្នោតជុំ ស្រុកក្រគរ ខេត្តពោធិ៍សាត់។
សាក្សីបានឲ្យដឹងថា មុនពេលកើតហេតុ មានរថយន្តម៉ាកកាមរី ពណ៌ផ្ទៃមេឃ ដែលឃើញត្រឹមតែពាក់ស្លាកលេខ2B .96.46 បានបើកពីលិចទៅកើត លុះដល់ចំណុចកើតហេតុរថយន្តនោះបានបត់ត្រឡប់ក្រោយវិញ តែបត់មិនទាន់ផុតផង ស្រាប់តែមានម៉ូតូ មួយគ្រឿងបើកពីកើតទៅលិចក្នុងមានល្បឿនលឿន រួចក៏ប៉ះក្បាលរថយន្តនោះបណ្ដាលឲ្យអ្នកជិះម៉ូតូដួលផ្កាប់មុខលើផ្លូវសន្លប់ស្ដូកបាក់ជើងឆ្វេង រីឯម៉ូតូខ្ទាតទៅចិញ្ចើមថ្នល់ខាងជើង។ សាក្សីនោះបន្តថា ក្រោយពេលកើតហេតុភ្លាមរថយន្តនោះបានបើកដោយល្បឿនលឿនគេចបាត់តែម្ដង ឯជនរងគ្រោះត្រូវបានសមត្ថកិច្ចហៅរថយន្តមកដឹកទៅសង្គ្រោះជាបន្ទាន់ផងដែរ។
លោក ឈិន វណ្ណា រងប៉ុស្តិ៍រដ្ឋបាលត្នោតជុំបានឲ្យដឹងថា ជនរងគ្រោះមានឈ្មោះ អ៊ូច ហត អាយុ២១ ឆ្នាំ ភេទប្រុស ជនជាតិខ្មែរ មានទីលំនៅបច្ចុប្បន្ន ភូមិតាគា សង្កាត់ផ្ទះព្រៃ ក្រុងពោធិ៍សាត់ធ្វើការនៅអង្គការ ឥន្ទានកម្ពុជា ជិះម៉ូតូម៉ាកC125 ពណ៌ខ្មៅ ពាក់ស្លាកលេខបាត់ដំបង 1Q 36 99៕
បើកឡានបត់មិនទាន់ផុតផង ម៉ូតូមកដល់បុកប្រាវសន្លប់ឈឹង
0 Comments