រតនគិរី ៖ សមត្ថកិច្ចប៉ូលិសប៉ុស្តិ៍ឡាបានសៀក បានចុះល្បាតក្នុងទឹកដីរបស់ខ្លួនចាប់បានជនសង្ស័យម្នាក់ពីបទករណីឆបោកយកម៉ូតូគេទៅលក់អស់រយៈពេល៥ថ្ងៃ សមត្ថកិច្ចនគរបាលប៉ុស្តិ៍បានឃាត់ខ្លួននៅថ្ងៃទី០២ ខែធ្នូ ឆ្នាំ២០១៥ វេលាម៉ោង១១និង៣០នាទីព្រឹក នៅចំណុចមុខផ្ទះឈ្មោះម៉ៅ ស្ថិតក្នុងភូមិ៧មករា សង្កាត់ឡាបានសៀក ក្រុងបានលុង ដែលជាប់ពាក់ព័ន្ធករណីអំពើរំលោភលើទំនុកចិត្ត(ឆបោកយកម៉ូតូទៅលក់) កាលពីថ្ងៃទី២៧ ខែវិច្ឆិកា ឆ្នាំ២០១៥ វេលាម៉ោង៧និង០០នាទី នៅចំណុចបន្ទប់ជួលភូមិអភិវឌ្ឍន៍ សង្កាត់ឡាបានសៀក។
ជនសង្ស័យមានឈ្មោះ ធុង ធើល ភេទប្រុស អាយុ៣០ឆ្នាំ ជនជាតិគ្រឹង មានទីលំនៅភូមិចាគ្រៀង ឃុំកិៈចុង ស្រុកបរកែវ មុខរបរធ្វើចម្ការ។ ជនរងគ្រោះមានឈ្មោះ កើន ប្រងីវ ភេទប្រុស អាយុ៣៩ឆ្នាំ ជនជាតិគ្រឹង មានទីលំនៅភូមិតាអង ឃុំតាអង ស្រុកកូនមុំ មុខរបរធ្វើចម្ការ។
ហើយសមត្ថកិច្ចប៉ុស្តិ៍បានដកហូតម៉ូតូ១គ្រឿង ម៉ាកហុងដាវ៉េឆ្លាម ពណ៌ខ្មៅ ពាក់ស្លាកលេខ រតនគិរី 1C-5166 លេខតួ382278 លេខម៉ាស៊ីន5431846 ផលិតឆ្នាំ២០១៥។ បច្ចុប្បន្ន ជនសង្ស័យត្រូវបានឃាត់ខ្លួននៅប៉ុស្តិ៍រដ្ឋបាលនគរបាលសង្កាត់ឡាបានសៀក ដើម្បីបំពេញសំណុំរឿងបញ្ជូនទៅសាលាដំបូងខេត្ត។
យោងតាមប្រភពពីប្រជាពលរដ្ឋនៅក្រុងបានលុងបានឲ្យដឹងថា សព្វថ្ងៃនេះសំបូរទៅដោយល្បែងស៊ីសងគ្រប់ប្រភេទមានដូចជា ចាក់បាល កន្ទុយលេខ ជល់មាន់ បៀរ អាប៉ោង .។ល។ ចំណែកសមត្ថកិច្ចនៅក្នុងក្រុងបានលុងមិនដែលយកភ្នែកមើលទេរឿងបញ្ហាទាំងអស់ខាងលើនេះ ឯណាទៅភូមិ/ឃុំមានសុវត្ថិភាពដែលបង្កើតប្រមុខរាជរដ្ឋាភិបាល និងក្រសួងមហាផ្ទៃនោះ។ ប្រជាពលរដ្ឋសព្វថ្ងៃដេកមិនលក់ទេ ខ្លាចចោរលួចគាស់ផ្ទះយកទ្រព្យសម្បត្តិ ព្រោះភាគច្រើនជាអ្នកអាជីវករលក់ដូរ៕
ឃាត់ខ្លួនជនសង្ស័យម្នាក់ ពីបទករណីឆបោកយកម៉ូតូគេទៅលក់
0 Comments