អគ្គសេនាធិការរបស់រុស្ស៊ីបាននិយាយថា បើទោះបីជាមានភស្តុតាងបង្ហាញពីការរត់ពន្ធប្រេងរបស់ក្រុម ISIS ក៏ដោយ ក្រុមចម្រុះដែលដឹកនាំដោយសហរដ្ឋអាមេរិកនៅក្នុងប្រទេសស៊ីរី និងអ៊ីរ៉ាក់មិនបានវាយប្រហារក្បួនរថយន្តដឹកប្រេងដែលកំពុងធ្វើដំណើរឆ្ពោះទៅកាន់ប្រទេសទួរគីឡើយ។
លោកឧត្តមសេនីយ៍ទោ Sergey Rudskoy មេបញ្ជាការរងនៃអគ្គសេនាធិការបាននិយាយនៅឯសន្និសីទមួយក្នុងទីក្រុងមូស្គូកាលពីថ្ងៃពុធថា “វាមានការពិបាកណាស់ក្នុងការកត់សម្គាល់ មានរថយន្តរាប់ពាន់គ្រឿងដែលប្រើប្រាស់ដោយក្រុមភេរវកម្មសម្រាប់ការរត់ពន្ធប្រេង”។
លោកបានបន្តថា “ទោះបីជាយ៉ាងណាក៏ដោយ យើងមិនបានឃើញការវាយប្រហារណាមួយលើក្បួនរថយន្តទាំងនោះពីសំណាក់ក្រុមចម្រុះនោះទេ”។
លោកមេបញ្ជាការរងបានសង្កត់ធ្ងន់ថា ការកម្ចាត់ក្រុម IS នឹងមិនអាចធ្វើទៅបានដោយគ្មានការទប់ស្កាត់ប្រភពសំខាន់នៃប្រាក់ចំណូលរបស់ពួកគេនោះទេ និងបានជំរុញឲ្យក្រុមចម្រុះធ្វើការវាយប្រហារលើហេដ្ឋារចនាសម្ព័ន្ធប្រេងរបស់ក្រុម IS។
ដូចគ្នានេះដែរកាលពីថ្ងៃពុធអ្នកនយោបាយអ៊ីរ៉ាក់ដ៏លេចធ្លោម្នាក់បាននិយាយថា លោកបានថ្លែងទៅកាន់យោធាអាមេរិកទាក់ទងនឹងបញ្ហាការបញ្ឈប់ការធ្វើពាណិជ្ជកម្មប្រេងខុសច្បាប់របស់ក្រុម IS ប៉ុន្តែលោកបានទទួលការឆ្លើយតបអវិជ្ជមានមួយ។
លោក Mowaffak al-Rubaie មេដឹកនាំរបស់គណបក្សរដ្ឋនៃសម្ព័ន្ធច្បាប់នៅក្នុងសភាអ៊ីរ៉ាក់បានប្រាប់ Sputnik ថា “ខ្ញុំបានទាក់ទងដោយផ្ទាល់ដល់តំណាងរបស់អាមេរិកដោយបានស្នើសុំឲ្យពួកគេកំណត់គោលដៅលើរថយន្តរបស់ក្រុម IS ដែលកំពុងដឹកប្រេងរបស់អ៊ីរ៉ាក់ និងស៊ីរីឆ្ពោះទៅប្រទេសទួរគី ប៉ុន្តែពួកគេបានឆ្លើយតបថា រថយន្តទាំងនោះគឺជាគោលដៅស៊ីវិលដូច្នេះអាមេរិកមិនអាចវាយប្រហារពួកគេបានឡើយ”។
ថ្លែងនៅក្នុងសន្និសីទកាសែតមួយកាលពីថ្ងៃពុធ អនុរដ្ឋមន្ត្រីក្រសួងការពារជាតិរុស្ស៊ីលោក Anatoly Antonov បាននិយាយថា ប្រទេសរុស្ស៊ីគឺបានដឹងអំពីផ្លូវរត់ពន្ធដ៏សំខាន់ចំនួនបីដែលបានប្រើដោយក្រុមIS ដើម្បីដឹកប្រេងទៅកាន់ទិសដៅចុងក្រោយរបស់ខ្លួននៅប្រទេសទួរគី។
លោក Antonov បានសង្កត់ធ្ងន់ថា មេដឹកនាំរបស់ប្រទេសទួរគីរួមទាំងលោកប្រធានាធិបតី Recep Tayyip Erdogan និងក្រុមគ្រួសាររបស់គាត់គឺមានការពាក់ព័ន្ធនៅក្នុងការធ្វើពាណិជ្ជកម្មប្រេងខុសច្បាប់ជាមួយក្រុមជីហាដនេះ៕
RT
ក្រុមចម្រុះដឹកនាំដោយអាមេរិកមិនបានវាយប្រហាររថយន្តប្រេងរបស់ក្រុម ISISទេ បើទោះជាមានភស្តុតាង
0 Comments