បាត់ដំបង ៖ នៅក្នុងឆ្នាំ២០១៥ ដោយចាប់តាំងពីដើមខែមករា រហូតដល់ចុងខែធ្នូនេះ គេសង្កេតឃើញថា កិច្ចប្រតិបត្តិការបង្ក្រាបលើករណីជួញដូរ ចែកចាយ កាន់កាប់រក្សាទុក និងការប្រើប្រាស់គ្រឿងញៀនខុសច្បាប់ បានដំណើរការយ៉ាងក្តៅគគុក ក្នុងខេត្តបាត់ដំបងទាំងមូល ដោយអនុវត្តតាមគោលការណ៍ និងផែនការរបស់លោកឧត្ដមសេនីយ៍ នេត សាវឿនអគ្គស្នងការនគរបាលជាតិ ព្រមទាំងអនុវត្តតាមការណែនាំ និងការចង្អុលបង្ហាញរបស់លោកឧត្ដមសេនីយ៍ទោ ស ថេត ស្នងការនគរបាលខេត្ត ទើបធ្វើឲ្យសន្ទុះនៃមុខសញ្ញាគ្រឿងញៀន មានការថយចុះចំនួន៣ករណីផងដែរ។
យោងតាមរបាយការណ៍របស់ការិយាល័យ នគរបាលប្រឆាំងគ្រឿងញៀន នៃស្នងការដ្ឋានខេត្តបាត់ដំបង ដែលរៀបចំឡើងដោយលោកវរសេនីយ៍ត្រី ស៊ាន សុណាល់ នាយការិយាល័យស្តីទី បានឲ្យដឹងថា នៅក្នុងឆ្នាំ២០១៥នេះ កិច្ចប្រតិបត្តិការបង្ក្រាបលើករណីជួញដូរ ចែកចាយ កាន់កាប់រក្សាទុក និងប្រើប្រាស់គ្រឿងញៀនខុសច្បាប់ ដោយគិតចាប់ពីដើមខែមករា រហូតមកទល់នឹងចុងខែធ្នូ ឆ្នាំ២០១៥នេះ គឺកម្លាំងជំនាញ បានធ្វើការបង្ក្រាបចំនួន១១០ករណី ដោយឃាត់ខ្លួនបានជនសង្ស័យចំនួន២១១នាក់ក្នុងនោះស្រីចំនួន៣៥នាក់។
លោកនាយការិយាល័យស្តីទីបានឲ្យដឹងបន្តថា ក្នុងកិច្ចប្រតិបត្តិការនេះដែរកម្លាំង បានធ្វើការដកហូតនូវវត្ថុតាងជាច្រើនប្រភេទដូចជា គ្រឿងញៀនប្រភេទម៉ាទឹកកកចំនួន៤៣៦កូនថង់ ស្មើនឹងទម្ងន់១៦៧៥,១៧ក្រាម គ្រឿងញៀនប្រភេទយ៉ាម៉ាចំនួន៣០០៦គ្រាប់ ស្មើនឹងទម្ងន់២៨៥,៧០ក្រាម គ្រឿងញៀនប្រភេទអ៊ិចស្តាស៊ីចំនួន២គ្រាប់ ស្មើនឹងទម្ងន់០,៥៦ក្រាម ទូរស័ព្ទដៃចំនួន១៤១គ្រឿង ម៉ូតូចំនួន២០គ្រឿង រថយន្តចំនួន៦គ្រឿង ដាវសាំម៉ូរ៉ៃចំនួន១៣ដើម កូនកាំបិតចំនួន៥ កាំបិតខ្វែវចំនួន១ដើមនាឡិកាដៃចំនួន៥គ្រឿង អាវុធកែច្នៃសម្រាប់បាញ់សត្វកណ្ដុរចំនួន៣ដើម ជញ្ជីងសម្រាប់ថ្លឹងគ្រឿងញៀនចំនួន១៣ កូនកាបូបដាក់លុយចំនួន៣០ កន្ត្រៃចំនួន១២ ញញួរ១ និងសម្ភារៈសម្រាប់វេចខ្ចប់ ព្រមទាំងប្រើប្រាស់មួយចំនួនធំ។
របាយការណ៍បានបន្ថែមថា ក្នុងកិច្ចប្រតិបត្តិការបង្ក្រាបខាងលើ គឺបានចែកចេញជា៣ដូចជា ការបង្ក្រាបលើករណីជួញដូរ ចែកចាយ មានចំនួន៦៥ករណី ដោយបានឃាត់ខ្លួនជនសង្ស័យបានចំនួន១៣៥នាក់ ក្នុងនោះស្រីចំនួន២៧នាក់ ករណីកាន់កាប់ រក្សាទុកគ្រឿងញៀនខុសច្បាប់មានចំនួន៣៣ករណី ដោយធ្វើការឃាត់ខ្លួនជនសង្ស័យបានចំនួន៥៣នាក់ ក្នុងនោះមានស្រីចំនួន៥នាក់ និងការប្រើប្រាស់បានចំនួន៩ករណី ដោយឃាត់ខ្លួនមនុស្សបានចំនួន២០នាក់ ក្នុងនោះស្រីដែលប្រើប្រាស់មានចំនួន៣នាក់ លើ៣ករណី ដោយការិយាល័យបានបញ្ជូនទៅកាន់មណ្ឌលស្តារនិតិសម្បទាហើយ។
ដោយឡែកការងារទិន្នន័យព័ត៌មានគ្រឿងញៀន និងការងារប្រៀបសមរភូមិប្រឆាំងគ្រឿងញៀន គឺការិយាល័យជំនាញបានឃាត់ខ្លួនមុខសញ្ញាជួញដូរ និងចែកចាយបានចំនួន១០៤នាក់ ក្នុងនោះស្រីចំនួន២៨នាក់ និងមុខសញ្ញាប្រើប្រាស់ដោយបំពានលើផ្លូវច្បាប់បានចំនួន៤៦៥នាក់ ក្នុងនោះស្រីមានចំនួន១០នាក់ផងដែរ។
ដោយឡែកមន្ទីរពិសោធន៍របស់ការិយាល័យ បានធ្វើតេស្ត លើសំណាកជនសង្ស័យ ដែលមានសារធាតុញៀនបាន១០៧ករណី និងការធ្វើតេស្តលើទឹកនោមបានចំនួន១០៧លើក លើជនសង្ស័យចំនួន២០៨នាក់ ដោយប្រើឧបករណ៍ ONCB ។
ក្នុងកិច្ចប្រតិបត្តិការនេះ បើប្រៀបធៀបទៅនឹងឆ្នាំកន្លងមក គឺមានការថយចុះចំនួន៣ករណីតែប៉ុណ្ណោះ ទោះបីជាយ៉ាងនេះក្តី ក៏កម្លាំងការិយាល័យជំនាញ បានរៀបចំផែនការបន្តទៅឆ្នាំខាងមុខ ដោយបានសន្យាថា នឹងខិតខំបំបែកសំណុំរឿងដែលនៅសេសសល់ដើម្បីនាំខ្លួនមុខសញ្ញាយកមកផ្ដន្ទាទោសតាមផ្លូវច្បាប់ឲ្យបាន៕
បទល្មើសគ្រឿងញៀនប្រចាំឆ្នាំ២០១៥មានការថយចុះ៣ករណី
0 Comments