ភ្នំពេញ ៖ អាជីវករជាអ្នករកស៊ីដឹកអំពៅដាក់តាមម៉ូយ ខណៈពេលឈប់ឡានរវល់ជញ្ជូនអំពៅដាក់ឲ្យម៉ូយដោយបិទទ្វារឡានភ្លេចចាក់សោ ត្រូវចោរពីរនាក់ជិះម៉ូតូមកឈប់ជិតឡាន ហើយបើកទ្វារឡានលួចយកកាបូបលុយអស់ជិត៤លានរៀល ហើយក្រុមចោរ បាននាំគ្នាឡើងជិះម៉ូតូគេចខ្លួនបាត់ស្រមោល។
ករណីនេះកើតហេតុនៅវេលាម៉ោង២១និង២០នាទីយប់ថ្ងៃទី១៤ ខែធ្នូ ឆ្នាំ២០១៥នៅតាមបណ្ដោយផ្លូវវេងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។ ជនរងគ្រោះឈ្មោះ កូវណាវី ភេទស្រីអាយុ54ឆ្នាំមុខរបរដឹកអំពៅដាក់តាមម៉ូយជាមួយប្តីស្នាក់សង្កាត់ស្ទឹងមានជ័យខណ្ឌមានជ័យ។ លុយដែលបាត់ចំនួនជិតបួនលានរៀលនឹងទូរស័ព្ទដៃមួយគ្រឿងនឹងអត្តសញ្ញាណប័ណ្ណមួយសន្លឹក។
តាមប្រភពព័ត៌មានពីជនរងគ្រោះបាននិយាយថា មុនពេលកើតហេតុជនរងគ្រោះកំពុងតែជួយលើកអំពៅដាក់ឲ្យម៉ូយហើយក៏មានជនសង្ស័យមានគ្នា២នាក់ជិះម៉ូតូមួយគ្រឿង នៅពេលជិះមកដល់ចំណុចកើតហេតុម្នាក់ បានចុះពីលើម៉ូតូដើរមកក្បែរឡានគាត់ តែគាត់មិនចាប់អារម្មណ៍ហើយម្នាក់ទៀតនៅចាំខាងមុខជាស្រេចដោយអង្គុយលើម៉ូតូពេលនោះ ដោយសារជនរងគ្រោះភ្លេចចាក់សោទ្វាររថយន្តទើបចោរគ្រាន់តែដើរមកបើកទ្វាររថយន្តឆក់យកកាបូបលុយរត់ឡើងជិះម៉ូតូបក្ខពួកគេដែលកំពុងអង្គុយចាំលើម៉ូតូនោះជាស្រេចគេចខ្លួនបាត់តែម្ដង។
ប្រភពបន្ដថា ពេលចោរបទទ្វាររថយន្តវិញឮសូរគ្រាំងម្ចាស់នឹកស្មានថា មានគ្រោះថ្នាក់ចរាចរណ៍នៅក្បែរនោះខំដើរមករកមើលទើបឃើញជនសង្ស័យយកកាបូបរត់ឡើងលើម៉ូតូចេញឆ្ងាយបន្ដិចហើយ។
ក្រោយពេលកើតហេតុជនរងគ្រោះបានមកដាក់ពាក្យបណ្ដឹង នៅប៉ុស្តិ៍ចោមចៅដើម្បីឲ្យសមត្ថកិច្ចជួយអន្តរាគមន៍ក្រែងអាចនៅថ្ងៃណាមួយអាចរកជនសង្ស័យឃើញមកផ្ដន្ទាទោសតាមផ្លូវច្បាប់៕
បិទទ្វារឡានភ្លេចចាក់សោ ចោរលួចកាបូបលុយអស់ជិត៤លានរៀល
0 Comments