ការដាំបង្គោលធ្មេញក្នុងឆ្អឹង គឺមានសារៈប្រយោជន៍ខ្លាំងណាស់ ក្នុងការបន្ថែមសម្រស់នៃស្នាមញញឹមរបស់លោកអ្នកឱ្យស្រស់បំព្រង ជួយឱ្យលោកអ្នកក្មេងជាងវ័យ និងពិសាអាហារបានយ៉ាងមានឱជារស។ ដើម្បីជាការចែករំលែក ចំណេះដឹងទាក់ទងនឹងការដាំបង្គោលធ្មេញក្នុងឆ្អឹង លោកស្រី ទន្ដបណ្ឌិត សូវ សុខយី អ្នកឯកទេសផ្នែកទន្ដសាស្ដ្រ(Cert-Oral Implantologist, Harvard School of Dental Medicine USA)នៅឯមន្ទីរព្យាបាលធ្មេញសុវណ្ណភូមិ ផ្ដល់បទសម្ភាសន៍យ៉ាងក្បោះក្បាយដល់យើងខ្ញុំ ស្ដីពីការដាំបង្គោលធ្មេញក្នុងឆ្អឹងដូចខាងក្រោមនេះ៖
ដូចម្ដេចដែលហៅថា ការដាំបង្គោលក្នុងឆ្អឹង Dental Implant?
ទន្ដបណ្ឌិត៖ ចា៎!ដែលហៅថា Dental Implant គឺជាបង្គោលធ្មេញសិប្បនិម្មិត្ដិ ដែលគេដាំទៅក្នុងធ្មេញថ្គាមជំនួសធ្មេញដែលបាត់បង់ ហើយការដាំបង្គោលឆ្អឹង Implant នេះ គេបានរកឃើញដោយក្រុមអ្នកស្រាវជ្រាវ Swedish មួយក្រុមតាំងពីឆ្នាំ ១៩៦០ មកម្លេះ។
តើការដាំបង្គោលធ្មេញក្នុងឆ្អឹង មានអត្ថប្រយោជន៍ដូចម្ដេចខ្លះ?
ទន្ដបណ្ឌិត៖ អត្ថប្រយោជន៍របស់ធ្មេញ Implant គឺទទួលបានធ្មេញដែលបាត់បង់ហើយនោះត្រឡប់មកវិញ ដោយចៀសផុតពីការដាក់ធ្មេញ ដោយស្រោបប្រទាក់(Dental Bridges) និងធ្មេញក្រអូម(Full Dentures) ដែលគ្មានលំនឹង។ ហើយម្យ៉ាងទៀត Dental Implant នេះ ជួយឱ្យលោក អ្នកពិសាអាហារបានយ៉ាងមានឱជារស គ្រប់គ្រងឆ្អឹងកុំឱ្យមានការបាត់បង់ រក្សាសម្រស់ និងភាពក្មេងជាងវ័យ ជាពិសេស គឺមានសុខភាពល្អ។
តើអ្នកជំងឺប្រភេទណា ដែលស្ថិតនៅក្នុងលក្ខខណ្ឌ ដែលទទួលការព្យាបាល ដោយការដាំបង្គោលធ្មេញក្នុងឆ្អឹង Dental Implant?
ទន្ដបណ្ឌិត៖ ជាទូទៅបើសិនជាអ្នកជំងឺមានការបាត់បង់ធ្មេញ គឺគាត់ជាប្រភេទអ្នកជំងឺដែលស្ថិតក្នុងលក្ខខណ្ឌ ត្រូវទទួលការព្យាបាលដោយការដាំបង្គោលធ្មេញក្នុងឆ្អឹង Dental Implant។ កត្ដាសំខាន់គឺទាមទារឱ្យអ្នកជំងឺមានសុខភាពល្អ លើកលែងចំពោះអ្នកជំងឺ ដែលមានជំងឺមួយចំនួន ប៉ុន្ដែទោះជាយ៉ាងណាក៏ដោយ ការដាំបង្គោលធ្មេញក្នុងឆ្អឹង នៅតែជាជម្រើសមួយដ៏ល្អសម្រាប់អ្នក។
តើស្ថានភាពណាខ្លះ ដែលស្ថិតនៅក្នុងស្ថានភាពមិនសមស្រប ក្នុងការដែលអ្នកជំងឺ ត្រូវទទួលការព្យាបាលធ្មេញ ដោយការដាំបង្គោលធ្មេញក្នុងឆ្អឹង?
ទន្ដបណ្ឌិត៖ ជំងឺ ដែលមិនសមស្រប ក្នុងការដែលត្រូវទទួលការព្យាបាលមួយចំនួន ដោយការដាំបង្គោលធ្មេញក្នុងឆ្អឹងមានដូចជា ជំងឺមហារីក ជំងឺពុកឆ្អឹង ជំងឺទឹកនោមផ្អែមកម្រិតខ្ពស់ ជំងឺរលាកអញ្ចាញកម្រិតធ្ងន់ធ្ងរ និងអ្នកជំងឺពិសាស្រា និងបារីហួសកម្រិតជាដើម។ ជំងឺទាំងអស់នេះអាចមានផលប៉ះពាល់ ដល់ការលូតលាស់របស់ Implant ដែលនៅក្នុងឆ្អឹង ដូច្នេះហើយអ្នកជំងឺត្រូវប្រាប់ទន្ដបណ្ឌិតជំនាញអំពីប្រវត្ដិជំងឺ និងថ្នាំដែលអ្នកជំងឺកំពុងពិសា ដើម្បីឱ្យគ្រូពេទ្យកាន់ងាយស្រួលវិនិច្ឆ័យថាតើ លក្ខខណ្ឌរបស់អ្នកអាចទទួលការដាំបង្គោល ក្នុងឆ្អឹងបានដែរឬទេ។
តើបន្ទាប់ពីការដាំបង្គោលធ្មេញក្នុងឆ្អឹង Dental Implant ហើយនោះ យើងត្រូវមានតម្រូវការ ក្នុងការថែទាំយ៉ាងដូចម្ដេចខ្លះ?
ទន្ដបណ្ដិត៖ ចា៎!ជាទូទៅមិនថា បង្គោលធ្មេញដែលដាំក្នុងឆ្អឹង ឬក៏ធ្មេញធម្មជាតិនោះទេ ការយកចិត្ដទុកដាក់ថែទាំធ្មេញ គឺជារឿងសំខាន់។ ដើម្បីឱ្យមានអនាម័យបានល្អ យើងត្រូវដុសធ្មេញឱ្យបានទៀងទាត់ យ៉ាងតិចឱ្យបាន ២ដងក្នុងមួយថ្ងៃ គឺពេលព្រឹក និងពេលយប់។ លើសពីនេះទៀត លោកអ្នកត្រូវអនុវត្ដទម្លាប់ល្អៗមួយចំនួនដូចជា៖
• គួរជ្រើសរើសថ្នាំដុសធ្មេញ ដែលមានសារធាតុ Fluoride
• គួរប្រើ Flossing ជាប្រចាំដើម្បីសម្អាតចន្លោះធ្មេញ
• គួរប្រើទឹកថ្នាំខ្ពុលមាត់បន្ថែម
• មិនគួរពិសាចំណីអាហារដែលមានជាតិស្ករ ឬជាតិស្អិតច្រើនពេក
• និងធ្វើការណាត់ជួបពេទ្យធ្មេញ ជារៀងរាល់ ៦ខែម្ដង។
បើសិនជាអ្នកជំងឺចង់ជ្រាបឱ្យកាន់តែច្បាស់ជាងនេះទៅទៀតនោះ គឺគាត់គួរតែធ្វើការណាត់ជួបពេទ្យ ដើម្បីសុំការណែនាំ។
ទន្ដបណ្ឌិតជំនាញនឹងណែនាំនូវច្រាសដុសធ្មេញសម្រាប់ដុសសម្អាតបង្គោលធ្មេញ Implant និងឧបករណ៍ផ្សេងៗមួយចំនួនទៀត ដែលទាក់ទងនឹងការថែទាំ ជាពិសេសទន្ដបណ្ឌិតជំនាញនឹងជួយពិនិត្យនូវបង្គោលធ្មេញ Implant និងធ្មេញដែលស្រោបលើ Implant ឱ្យបានដឹងច្បាស់ថាតើធ្មេញ និង Implant មានលំនឹងល្អ ឬអត់ ហើយពិនិត្យឱ្យដឹងថាតើ មុខងារ Implant និងធ្មេញមានសភាពល្អ សមស្របដែរឬទេ។ល។
អនុសាសន៍ទន្តបណ្ឌិត៖ ការដាំបង្គោលធ្មេញក្នុងឆ្អឹង តែងតែឆ្លងកាត់ការវះកាត់ យ៉ាងហោចណាស់ក៏វះកាត់ម្ដងដែរ។ ហេតុដូច្នេះអញ្ចាញរបស់លោកអ្នក ចាំបាច់ត្រូវមានសុខភាពល្អ ហើយឆ្អឹងថ្គាមរបស់លោកអ្នកចាំបាច់ត្រូវរឹងមាំគ្រប់គ្រាន់ដើម្បីទ្រ ឬទប់បង្គោលធ្មេញ Implant។ ទន្ដបណ្ឌិតមិនផ្ដល់ការព្យាបាល ដោយការដាំបង្គោលធ្មេញក្នុងឆ្អឹងដល់លោកអ្នកទេ ប្រសិនបើលោកអ្នកពិសាបារី ពីព្រោះវាអាចប៉ះពាល់ដល់ប្រសិទ្ធភាពនៃការព្យាបាល។ ការដាំបង្គោលធ្មេញក្នុងឆ្អឹង អាចនឹងមិនទទួលបានជោគជ័យប្រសិនបើលោកអ្នកធ្លាប់ទទួលការព្យាបាលរោគដោយប្រើកាំរស្មីអ៊ីច(radiotherapy)។ លើសពីនេះទៀត ទន្ដបណ្ឌិតអាចនឹងមិនផ្ដល់ការព្យាបាល ដោយការដាំបង្គោល Implant នេះទេប្រសិនបើលោកអ្នកកំពុងពិសាថ្នាំ(bisphosphonates) ដើម្បីព្យាបាលជំងឺឆ្អឹង។ ដូច្នេះមុនពេល ផ្ដល់ការព្យាបាលដោយការដាំបង្គោលធ្មេញក្នុងឆ្អឹងទន្ដបណ្ឌិតនឹងសាកសួរ អ្នកពីស្ថានភាពជំងឺដទៃ ប្រសិនបើលោកអ្នកមានជំងឺ មហារីក ជំងឺពុកឆ្អឹង ជំងឺទឹកនោមផ្អែមកម្រិតខ្ពស់ ជំងឺរលាកអញ្ចាញធ្ងន់ធ្ងរ និងប្រភេទថ្នាំ ដែលលោកអ្នកកំពុងប្រើប្រាស់ដើម្បីព្យាបាលជំងឺ៕
បទសម្ភាសន៍ស្ដីពីអត្ថប្រយោជន៍នៃការដាំបង្គោលធ្មេញក្នុងឆ្អឹង( Dental Implant )
0 Comments