វិបត្តិជនភៀសខ្លួននៅតំបន់អឺរ៉ុបកំពុងគំរាមកំហែងដល់បញ្ហានៃភាពគ្មានប្រទេស ខណៈដែលអ្នកជំនាញបានព្រមានថា ចំនួនកើនឡើងនៃកុមារគឺជាផ្នែកមួយនៃ «ជំនាន់គ្មានសញ្ជាតិ» ដែលកំពុងរីកឡើង។
ច្បាប់សញ្ជាតិលម្អៀងនៅក្នុងប្រទេសស៊ីរីបានរួមបញ្ចូលគ្នាជាមួយនឹងការការពារផ្នែកច្បាប់មិនមានប្រសិទ្ធភាពនៅក្នុងរដ្ឋសហភាពអឺរ៉ុបមានន័យថា កុមារជាច្រើនដែលកើតក្នុងជនភៀសខ្លួនស៊ីរីនៅតំបន់អឺរ៉ុបគឺមានហានិភ័យខ្ពស់នៃការក្លាយជាមនុស្សគ្មានសញ្ជាតិ ដែលជាលក្ខខណ្ឌមួយប៉ះពាល់ដល់មនុស្ស១០លាននាក់នៅទូទាំងពិភពលោក។
ក្រោមច្បាប់របស់ប្រទេសស៊ីរី មានតែបុរសទេដែលអាចផ្តល់ភាពជាពលរដ្ឋចំពោះកូនរបស់ខ្លួន។
អង្គការសហប្រជាជាតិបានប៉ាន់ប្រមាណថា២៥ភាគរយនៃគ្រួសារជនភៀសខ្លួនស៊ីរីគឺគ្មានឪពុក។
Zahra Albarazi មកពីវិទ្យាស្ថានផ្នែកភាពគ្មានសញ្ជាតិ ដែលមានមូលដ្ឋានក្នុងប្រទេសហូឡង់បាននិយាយថា “មនុស្សជាច្រើន ដែលបានផ្លាស់ទីលំនៅមកកាន់អឺរ៉ុបគឺជាស្ត្រីដែលប្ដី ឬដៃគូរបស់ពួកគេត្រូវបានសម្លាប់ ឬបាត់ខ្លួន ហើយស្ត្រីទាំងនោះគឺមានកូន ឬមានផ្ទៃពោះដូច្នេះវាបានក្លាយជាបញ្ហាកាន់តែធំ”។
នៅក្រោមសន្ធិសញ្ញាអន្តរជាតិរួមទាំងអនុសញ្ញាអង្គការសហប្រជាជាតិស្ដីពីសិទ្ធិកុមាររដ្ឋាភិបាលគឺមានកាតព្វកិច្ចក្នុងការផ្តល់សញ្ជាតិឲ្យកុមារណាម្នាក់ ដែលកើតនៅលើទឹកដីរបស់ពួកគេបើមិនដូច្នេះទេក្មេងទាំងនោះអាចនឹងមានគ្មានសញ្ជាតិ។ ប៉ុន្តែបណ្ដាប្រទេសនៅអឺរ៉ុបមួយចំនួនបានអនុម័តគោលការណ៍នេះចូលទៅក្នុងច្បាប់ជាតិ និងបានបរាជ័យក្នុងការអនុវត្តវាឲ្យបានជាប់លាប់។
ទីភ្នាក់ងារជនភៀសខ្លួន UNHCR បានប៉ាន់ប្រមាណថា យ៉ាងហោចណាស់មានមនុស្ស៦៨០០០០នាក់នៅអឺរ៉ុបគឺគ្មានភាពជាពលរដ្ឋនៃប្រទេសណាមួយ បើទោះបីជាអ្នកជំនាញបាននិយាយថា តួលេខពិតប្រាកដគឺទំនងជាខ្ពស់ជាងនេះឆ្ងាយក៏ដោយ ព្រោះតែមនុស្សគ្មានសញ្ជាតិគឺមានការលំបាកក្នុងការរាប់ចំនួន។
បញ្ហាគ្មានសញ្ជាតិគឺពិតជាអាក្រក់ជាពិសេសនៅក្នុងតំបន់អាស៊ីអាគ្នេយ៍ដូចជានៅក្នុងប្រទេសមីយ៉ាន់ម៉ា អង្គការសហប្រជាជាតិបានប៉ាន់ប្រមាណថាមានមនុស្សគ្មានសញ្ជាតិជាង៨១០០០០នាក់ ។
ប៉ុន្តែស្ថានការណ៍នៅក្នុងតំបន់អឺរ៉ុបគឺកាន់តែអាក្រក់ ដែលជាលទ្ធផលបណ្ដាលមកពីការធ្វើចំណាកស្រុកមិនធ្លាប់មានពីមុនមក។
រហូតមកទល់ពេលនេះ ក្រុមនានាដូចជាមនុស្សនិយាយភាសារ៉ូម និងរុស្ស៊ីមកពីតំបន់បាល់តិកបានរងផលប៉ះពាល់ខ្លាំងបំផុត។
ភាពគ្មានសញ្ជាតិនៅក្នុងតំបន់អឺរ៉ុបអាចបង្កឲ្យមានបញ្ហាយ៉ាងធំ។ ក្រុមអ្នកជំនាញបាននិយាយថា ឪពុកម្ដាយជាច្រើនមិនបានដឹងថា កូនរបស់ពួកគេគឺគ្មានសញ្ជាតិនោះទេ។ ជាញឹកញាប់កុមារបានដឹងថា ពួកគេមិនមានភាពជាពលរដ្ឋស្របច្បាប់ នៅពេលដែលពួកគេឈានដល់ភាពជាមនុស្សពេញវ័យ ហើយនឹងបានដឹងថា ពួកគេមិនអាចធ្វើការ រៀបការ មានទ្រព្យសម្បត្តិផ្ទាល់ខ្លួន បោះឆ្នោតដោយស្របច្បាប់ ឬសូម្បីតែបញ្ចប់ការសិក្សាពីសាលារៀន។
ក្នុងបណ្ដាប្រទេសជាប់ព្រំដែនស៊ីរីកំពុងទទួលយកជនភៀសខ្លួនភាគច្រើននោះ ភាពគ្មានសញ្ជាតិគឺជាក្តីបារម្ភដ៏ចម្បងរួចទៅហើយ។
អង្គការសហប្រជាជាតិបានបញ្ជាក់ថា ទារកជាង៣០០០០នាក់ ដែលកើតក្នុងជនភៀសខ្លួនស៊ីរីនៅក្នុងប្រទេសលីបង់គឺមានហានិភ័យនៃភាពគ្មានសញ្ជាតិ៕
The Guardian
វិបត្តិជនភៀសខ្លួនបានបង្កើត “ជំនាន់គ្មានសញ្ជាតិ” ចំពោះកុមារ
0 Comments