កំពង់ឆ្នាំង ៖ បន្ទាប់ពីបិទវគ្គបំប៉ននគរបាលចរាចរណ៍ខេត្តអំពីនីតិវិធីប្រតិបត្តិការ និងក្រមសីលធម៌ នៅព្រឹកថ្ងៃទី០៧ ខែធ្នូ ឆ្នាំ២០១៥រួចមកនៅរសៀលថ្ងៃដដែល សមត្ថកិច្ចនគរបាលចរាចរណ៍មកពីក្រុង និងស្រុកចំនួនជាង៥០នាក់បានចុះប្រតិបត្តិការអនុវត្តន៍ជាក់ស្តែង នៅចំសួនច្បារឆ្នាំងមាស ក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ដោយបានផាកពិន័យរថយន្ត និងម៉ូតូខុសច្បាប់ចរាចរណ៍បានចំនួន៥០គ្រឿង ក្នុងរយៈពេលតែជាង១ម៉ោង។
មុនពេលប្រតិបត្តិការ យើងបានឃើញមន្ត្រីនគរបាលចរាចរណ៍ទាំងអស់ប្រជុំជួរ និងបានទទួលការណែនាំពីលោកឧត្តមសេនីយ៍ត្រី ឡុង ធូ អនុប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់នៃអគ្គស្នងការនគរបាលជាតិ អំពីរបៀបរៀបចំទីតាំង ក្នុងពេលប្រតិបត្តិការត្រួតពិនិត្យយានយន្តឆ្លងកាត់ ដោយបានរៀបចំកងកម្លាំងជា៣ផ្នែក មានក្រុមឆែកឆេរឯកសារយានយន្ត និងធ្វើប័ណ្ណផាកពិន័យ ក្រុមបញ្ជរយានយន្តឲ្យបើកចូលក្នុងទីតាំងត្រួតពិនិត្យ និងក្រុមទប់ស្កាត់យានយន្តដែលបើករត់គេចវេះពីទីតាំងត្រួតពិនិត្យ។
លោកវរសេនីយ៍ត្រី ឈឹម សារុន នាយការិយាល័យនគរបាលចរាចរណ៍ផ្លូវគោកខេត្តកំពង់ឆ្នាំង បានឲ្យដឹងថា នៅក្នុងកិច្ចប្រតិបត្តិការជាង១ម៉ោងនេះ កងកម្លាំងនគរបាលចរាចរណ៍ទាំងអស់បានអនុវត្តន៍តាមនីតិវិធី និងក្រមសីលធម៌របស់កងកម្លាំងបានត្រឹមត្រូវ បន្ទាប់ពីបានឆ្លងកាត់វគ្គបំប៉នពេញមួយព្រឹកពីលោកអនុប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់នៃអគ្គស្នងការនគរបាលជាតិ។
ជាលទ្ធផល សមត្ថកិច្ចក្នុងក្រុមប្រតិបត្តិការធ្វើការត្រួតពិនិត្យយានយន្តសរុបបានចំនួន២៧៣គ្រឿង ក្នុងនោះបានធ្វើការផាកពិន័យយានយន្តសរុបចំនួន៥០គ្រឿង ដែលមានម៉ូតូ២៣គ្រឿង និងរថយន្ត២៧គ្រឿង។ ការផាកពិន័យនេះមានរថយន្តចំនួន២៧គ្រឿង( ធុនស្រាល១៣គ្រឿង និងធុនធ្ងន់១៤គ្រឿង ) ល្មើសច្បាប់ចរាចរណ៍ដូចជា , ដឹកសំពីងសំពោង , អត់ឈៀក , អត់លិខិតអាជីវកម្ម , ប័ ណ្ណបើកបរខុសប្រភេទយានយន្ត , ប័ណ្ណបើកបរហួសសុពលភាព , រថយន្តអត់ស្លាកលេខ និងរថយន្តរបូតប៊ូឡុងតាកេ។ ដោយឡែកម៉ូតូចំនួន២៣គ្រឿង គឺបើកបរមិនពាក់មួកសុវត្តិភាព១៣គ្រឿង និងគ្មានកញ្ចក់មើលក្រោយ១០គ្រឿង។
លោកវរសេនីយ៍ត្រី ឈឹម សារុន បានសំណូមពរដល់មន្ត្រីនគរបាលចរាចរណ៍គ្រប់ស្រុក និងក្រុងថា ពេលទៅកាន់អង្គភាពវិញត្រូវយកចិត្តទុកដាក់ ផ្សព្វផ្សាយច្បាប់ចរាចរណ៍ឲ្យបានទូលំទូលាយដល់ប្រជាពលរដ្ឋក្នុងមូលដ្ឋានស្រុករបស់ខ្លួន ឲ្យគាត់បានយល់ថា ចាប់ពីខែមករា ឆ្នាំ២០១៦ តទៅរាល់ការផាកពិន័យបទល្មើសចរាចរណ៍តាមកំណត់ច្បាប់គឺត្រូវផាកពិន័យគុណនឹង៥ដង។ ចំណែកមន្ត្រីនគរបាលចរាចរណ៍គ្រប់ថ្នាក់ ត្រូវតែធ្វើគំរូមុនគេក្នុងការគោរពច្បាប់ចរាចរណ៍៕
ប្រតិបត្តិការរយៈពេល១ម៉ោងសមត្ថកិច្ចនគរបាលចរាចរណ៍ខេត្ត បានផាកពិន័យរថយន្ត និងម៉ូតូចំនួន៥០គ្រឿង
0 Comments