ភ្នំពេញ ៖ រាជរដ្ឋាភិបាលនៃព្រះរាជាណាចក្រកម្ពុជា បានសម្រេចជាផ្លូវការហើយ ដើម្បីបង្កើតគណៈកម្មការចំពោះកិច្ចសម្រាប់រៀបចំនីតិវិធីផ្ទេរការគ្រប់គ្រងការលក់ប័ណ្ណចូលទស្សនាអង្គរ រាជរដ្ឋាភិបាលកម្ពុជា ហើយការសំរេចនេះ បានធ្វើឡើងបន្ទាប់ពីសម្តេចតេជោ ហ៊ុន សែន បានប្រកាសនៅក្នុងកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី០៦ ខែវិច្ឆិកា ឆ្នាំ២០១៥ កន្លងទៅ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាន៍នៅពេលនោះថា តាមសំណើររបស់ក្រុមក្រុមហ៊ុនសុខាអូតែល រាជរដ្ឋាភិបាលបានសម្រេចបញ្ចប់កិច្ចសន្យាពីការប្រមូលចំណូលលើការលក់សំបុត្រចូលទស្សនាអង្គរជាមួយក្រុមហ៊ុន និងបានប្រគល់ភារកិច្ចជូនរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ សហការជាមួយក្រសួងស្ថាប័នពាក់ព័ន្ធ រៀបចំបទដ្ឋានគតិយុទ្ធ ក្នុងការបង្កើត និងដាក់ឲ្យដំណើការសហគ្រាសសាធារណៈ ដែលគ្រប់គ្រងដោយក្រុមប្រឹក្សាភិបាលមួយ ដើម្បីគ្រប់គ្រងការងារនេះ។ សហគ្រាសសាធារណៈនេះ គ្រោងនឹងចាប់ផ្តើមដំណើការការងាររបស់ខ្លួននៅដើមខែមករា ឆ្នាំ២០១៦ ខាងមុខតទៅ ហើយបុគ្គលិកទាំងអស់របស់ក្រុមហ៊ុន ដែលកំពុងបំរើការងារផ្នែកប្រមូលចំណូលនេះ នឹងបន្តការងាររបស់ខ្លួនដដែល ក្រោមការគ្រប់គ្រងរបស់សហគ្រាសសាធារណៈនេះ។
តាមសេចក្តីសម្រេច ដែលទើបទទួលបានថ្ងៃទី០២ ខែធ្នូ ឆ្នាំ២០១៥ ចុះហត្ថលេខាដោយសម្តេចតេជោ ហ៊ុន សែន បានឲ្យដឹងថា គណៈកម្មការចំពោះកិច្ចសម្រាប់រៀបចំនីតិវិធីផ្ទេរការគ្រប់គ្រងការលក់ប័ណ្ណចូលទស្សនាអង្គរ មានអគ្គនាយកដ្ឋានទ្រព្យសម្បត្តិរដ្ឋ និងចំណូលមិនមែនសារពើពន្ធនៃក្រសួងសេដ្ឋកិច្ច និងហិរញ្ញវត្ថុជាលេខាធិការដ្ឋាន។ គណៈកម្មការចំពោះកិច្ចសម្រាប់រៀបចំនីតិវិធីផ្ទេរការគ្រប់គ្រងការលក់ប័ណ្ណចូលទស្សនាអង្គរប្រើប្រាស់ត្រារបស់ក្រសួងសេដ្ឋកិច្ច និងហិរញ្ញវត្ថុក្នុងការបំពេញភារកិច្ចរបស់ខ្លួន។
គណៈកម្មការមានមុខងារ និងភារកិច្ច រៀបចំនីតិវិធីផ្ទេរការគ្រប់គ្រង ការកាន់កាប់បញ្ជីគណនេយ្យ បញ្ជីសារពើភ័ណ្ឌទ្រព្យសម្បត្តិ ក៏ដូចជាការផ្ទេរបុគ្គលិក និងភារកិច្ចនានាពីក្រុមហ៊ុន សុខាអូតែល អំពីការទូទាត់គ្នានូវកាតព្វកិច្ចហិរញ្ញវត្ថុ ដែលមានការពាក់ព័ន្ធ។ រៀបចំនូវលិខិតបទដ្ឋានចាំបាច់ជូនរាជរដ្ឋាភិបាល ដើម្បីបង្កើតគ្រឹះស្ថានសាធារណៈរដ្ឋបាល សម្រាប់គ្រប់គ្រងចំណូលដែលបានមកពីលក់ប័ណ្ណចូលទស្សនាអង្គរស្របតាមព្រះរាជក្រឹត្យលេខ នស/រកត/០៨១៥/ ៨៧២ ចុះថ្ងៃទី០៨ ខែសីហា ឆ្នាំ២០១៥ ស្តីពីលក្ខន្តិកៈគតិយុត្ត នៃគ្រឹះស្ថានសាធារណៈរដ្ឋបាល ដោយមានក្រសួងទេសចរណ៍ជាអាណាព្យាបាលបច្ចេកទេស និងក្រសួងសេដ្ឋកិច្ច និងហិរញ្ញវត្ថុជាអាណាព្យាបាលហិរញ្ញវត្ថុ។ ធ្វើរបាយការណ៍អំពីលទ្ធផលការងារជូនរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងករណីចាំបាច់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកសំណើគោរពសុំការណែនាំពិនិត្យ និងសម្រេចពីប្រមុខរាជរដ្ឋាភិបាល។
សេចក្តីសំរេចបញ្ជាក់ថា អនុប្រធាន និងសមាជិកគណៈកម្មការចំពោះកិច្ចសម្រាប់រៀបចំនីតិវិធីផ្ទេរ ការគ្រប់គ្រងការលក់ប័ណ្ណចូលទស្សនាអង្គរ ត្រូវចូលរួមប្រជុំតាមការអញ្ជើញរបស់ប្រធានគណៈកម្មការ។ អាណត្តិការងាររបស់គណៈកម្មការចំពោះកិច្ចសម្រាប់រៀបចំនីតិវិធីផ្ទេរ ការគ្រប់គ្រងការលក់ប័ណ្ណចូលទស្សនាអង្គរ មានសុពលភាពរហូតដល់ការងាររៀបចំនីតិវិធីផ្ទេរការគ្រប់គ្រងការលក់ប័ណ្ណចូលទស្សនាអង្គរត្រូវបានបញ្ចប់។ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្ត្រីក្រសួងទេសចរណ៍ រដ្ឋមន្ត្រីគ្រប់ក្រសួងស្ថាប័នពាក់ព័ន្ធ ត្រូវទទួលបន្ទុកអនុវត្តសេចក្តីសម្រេចនេះ តាមភារកិច្ចរៀងៗខ្លួនចាប់ពីថ្ងៃចុះហត្ថលេខាតទៅ៕
រាជរដ្ឋាភិបាលសម្រេចជាផ្លូវការបង្កើតគណៈកម្មការ ចំពោះកិច្ចរៀបចំនីតិវិធីផ្ទេរការគ្រប់គ្រងការលក់ប័ណ្ណចូលទស្សនាអង្គរ
0 Comments