សៀមរាប ៖ លោកវរសេនីយ៍ឯក ស្រី យូរ៉ា មេបញ្ជាការរងកងរាជអាវុធហត្ថខេត្ត ទទួលបន្ទុកការងារព័ត៌មាន និងស្រាវជ្រាវបង្ក្រាបបទល្មើស បានប្រាប់ថា កម្លាំងការិយាល័យបទល្មើសព្រហ្មទណ្ឌកងរាជអាវុធហត្ថខេត្តរបស់កំពុងតែធ្វើការ ចុះស្រាវជ្រាវរកមុខសញ្ញាដែល បង្ករបួសស្នាមមកលើ អ្នកនេសាទខ្មែរចំនួន១៨នាក់ ខណៈដែលត្រូវបានក្រុមជនជាតិវៀតណាម វាយមកលើពួកគេកាលពីយប់ថ្ងៃទី១៤ ខែធ្នូ ឆ្នាំ២០១៥ ស្ថិតនៅចំណុចព្រំប្រទល់ឡូតិ៍លេខ៤ រវាងសង្កាត់ចុងឃ្នៀស និងឃុំកំពង់ភ្លុក រហូតឈានដល់ធ្វើការឃាត់ខ្លួនបានជនសង្ស័យ ជាជនជាតិវៀតណាមម្នាក់ក្នុងចំណោម ជនជាតិវៀតណាម អូស យ៉ាំងកាវ ដែលមានគ្នា ចាប់ពី ៣០ទៅ៤០នាក់។
ក្នុងការចុះប្រតិបត្តិការឃាត់ខ្លួនជនជាតិវៀតណាមម្នាក់ក្នុងចំណោម៤០នាក់ ដែលបង្ករបួសស្នាមមកលើអ្នកនេសាទខ្មែរប្រមាណ១៨នាក់ កាលពីវេលាម៉ោង១៩និង០០នាទី ថ្ងៃទី១៥ ខែធ្នូ ឆ្នាំ២០១៥ស្ថិតនៅទីបញ្ជាការប៉េអិមក្នុងការិយាល័យបទល្មើសព្រហ្មទណ្ឌកងរាជអាវុធហត្ថខេត្ត បន្ទាប់ពីបានហៅមកសួរនាំ។
លោកវរសេនីយ៍ឯក ស្រី យូរ៉ា មេបញ្ជាការរងកងរាជអាវុធហត្ថខេត្ត ទទួលបន្ទុកការងារព័ត៌មាន និងស្រាវជ្រាវបង្ក្រាបបទល្មើស បានប្រាប់ថា ដោយមានបទបញ្ជាពីលោកឧត្តមសេនីយ៍ត្រីមេបញ្ជាការកងរាជអាវុធហត្ថខេត្ត បានឲ្យកម្លាំងក្រោមឱវាទចុះធ្វើការស្រាវជ្រាវ ស្វែងរកជនបង្កជាជនជាតិវៀតណាម ដែលបានបង្កអំពើហិង្សា បណ្តាលឲ្យមានរបួសស្នាមធ្ងន់ស្រាលមកលើ អ្នកនេសាទខ្មែរចំនួន១៨នាក់កាលពីយប់ថ្ងៃទី១៤ ខែធ្នូ ឆ្នាំ២០១៥ កន្លងមកនេះ (ក្នុងនោះ របួសធ្ងន់ចំនួន៥នាក់ ស្រាល១៣នាក់ធ្ងន់។
លោកបន្តថា ក្រោយពីកើតហេតុ លោកបានដាក់កម្លាំងជំនាញចុះស្រាវជ្រាវដល់កន្លែងកើតហេតុ រកជនដៃដល់ ដើម្បីយកមកផ្តន្ទាទោស ហើយរហូតឈានដល់ធ្វើការឃាត់ខ្លួនបានជនសង្ស័យម្នាក់ក្នុងចំណោមបក្សពួក៤០នាក់ ដែលបានរត់គេចខ្លួនបាត់។
លោកបានបញ្ជាក់ទៀត ជនសង្ស័យជាជនជាតិវៀតណាមម្នាក់ ក្នុងចំណោម៤០នាក់នេះមានឈ្មោះ ដូ យ៉ាំង ថាន់ ផេទប្រុសអាយុ ៥៣ឆ្នាំ មានមុខរបរចិញ្ចឹមត្រី មានទីលំនៅភូមិចុងឃ្នៀស សង្កាត់ចុងឃ្នៀស ក្រុងសៀមរាប និងបក្សពួកវាចំនួន៤០នាក់នោះ កម្លាំងជំនាញបានស្គាល់ថែម៤នាក់ទៀតមានឈ្មោះ ដូ យ៉ាំងសួរ ,ដូ យ៉ាំងយូរ, ដូ យ៉ាំង សរ ,ដូ យ៉ាំង ឌឹក, អ្នកទាំង៤នាក់រស់នៅភូមិទី៧ សង្កាត់ចុងឃ្នៀស ក្រុងសៀមរាប មានមុខរបរជាអ្នកនេសាទនៅចុងឃ្នៀស ចំណែកបក្ខពួកវាផ្សេងទៀត កម្លាំងសមត្ថកិច្ចមិនបានស្គាល់ឈ្មោះនោះទេ ហើយបានគេចខ្លួនបាត់ទាំងអស់។
បច្ចុប្បន្នកម្លាំងជំនាញកំពុងធ្វើការស្រាវជ្រាវ ដើម្បីយកមកផ្តន្ទាទោសទៅតាមផ្លូវច្បាប់។ ចំណែកជនរងគ្រោះ ដែលមានរបួសធ្ងន់ស្រាលទាំង១៨នាក់នោះ ពុំទាន់ឃើញមកដាក់ពាក្យបណ្តឹង ដើម្បីទាមទារជម្ងឺចិត្តនៅឡើយទេ មកដល់ថ្ងៃទី១៦ ខែធ្នូ។
រីឯ ជនសង្ស័យជាជនជាតិវៀតណាមម្នាក់ក្នុងចំណោម៤០នាក់ ដែលបានបង្ករបួសស្នាមដល់អ្នកនេសាទខ្មែរចំនួន១៨នោះ ត្រូវបានបញ្ជូនទៅតុលាការនៅរសៀលថ្ងៃទី១៦ ខែធ្នូ ឆ្នាំ២០១៥ ដើម្បីចាត់ការតាមនីតិវិធីច្បាប់៕
អាវុធហត្ថឃាត់ខ្លួន ជនជាតិវៀតណាមម្នាក់ក្នុងចំណោម៤០នាក់ ដែលបានវាយមកលើអ្នកនេសាទខ្មែរឲ្យរបួសធ្ងន់ស្រាល១៨នាក់
0 Comments