មានការភ្ញាក់ផ្អើលមួយបានកើតឡើង ដោយសារតែមានលេចឮពាក្យថា មានពលករខ្មែរបានចាក់គ្នាស្លាប់នៅក្នុងបន្ទប់ផ្ទះជួល ដោយសារតែភ្លើងប្រច័ណ្ឌ ដែលស្ថិតនៅក្នុងផ្ទះជួលពីរជាន់ ក្នុងភូមិ១ ឃុំធ្នូ ស្រុកឧទ័យ ខេត្តនគរស្រីអយុធ្យា ប្រទេសថៃកាលពីវេលាម៉ោង៣និង៣០នាទីទៀបភ្លឺ បន្ទាប់ពីបានឮសម្លេងមនុស្សស្រែកឲ្យជួយរួចមក។
ប្រភពដែលនៅទីនោះបាននិយាយថា ដោយសារតែនៅម្តុំនេះមានពលករខ្មែរមួយចំនួនបានមករស់នៅនឹងបម្រើការងារផ្សេងៗផងនោះ ទើបគេគិតថា អាចជាពួកគាត់ឈ្លោះគ្នាហើយមើលទៅរហូតដល់មានការចាក់សម្លាប់គ្នាបែបនេះ លុះក្រោយពេលដែលសមត្ថកិច្ចថៃធ្វើការត្រួតពិនិត្យទើបដឹងថា គឺជាជនជាតិថៃសោះ ដែលបញ្ហានេះបានកើតឡើងដោយសារតែភ្លើងប្រច័ណ្ឌ។
តាមការអះអាងពីបុគ្គលិកដែលបម្រើការនៅក្នុងផ្ទះជួលនេះបាននិយាយថា មនុស្សពីរនាក់នេះបានមកជួលបន្ទប់ស្នាក់នៅប្រហែល១០ថ្ងៃមកហើយ ដោយគេបានស្នាក់នៅក្នុងបន្ទប់លេខ២១០ ដោយឧស្សាហ៍ឈ្លោះគ្នាជាញឹកញាប់។
លុះនៅវេលាម៉ោងប្រហែល៧ យប់ថ្ងៃទី៨ ខែធ្នូ ឆ្នាំ២០១៥ គេបានឮសម្លេងឈ្លោះប្រកែកគ្នាមួយយ៉ាងខ្លាំងនៅក្នុងបន្ទប់លេខ២១០នេះ ដែលជាទម្លាប់របស់ពួកគេទៅហើយបានជា មិនមានអ្នកណាចាប់អារម្មណ៍ទាល់តែសោះ ដោយនៅពេលនោះក៏មានសម្លេងនារីស្រែកឲ្យគេជួយថែមទៀតផង។
ប្រភពដដែលបានបន្ថែមថា រហូតដល់ម៉ោង ៣ និង ៣០នាទីទៀបភ្លឺ ក៏ស្រាប់តែគេបានឮសម្លេងមនុស្សប្រុសម្នាក់ស្រែកហៅឲ្យជួយ នៅចំពីមុខបន្ទប់លេខ២១០នេះ នៅពេលដែលម្ចាស់ផ្ទះជួល និង អ្នកដែលស្នាក់នៅក្នុងបន្ទប់ជិតខាងចេញមកមើល ក៏បានប្រទះឃើញមនុស្សប្រុសម្នាក់ដែលស្ថិតនៅក្នុងថ្លុកឈាមខាងមុខបន្ទប់ គឺមានស្នាមចាក់ចំនួនពីរកាំបិត ដោយចំត្រង់ដើមដោះទាំងសងខាង បណ្តាលឲ្យរងរបួសជាទម្ងន់ ដែលចាំបាច់ត្រូវបញ្ជូនទៅកាន់មន្ទីរពេទ្យដើម្បីសង្គ្រោះផងដែរ ព្រមទាំងបានរាយការណ៍ទៅតម្រួតឲ្យមកកាន់ចំណុចកើតហេតុដើម្បីត្រួតពិនិត្យលើហេតុការនេះ។
នៅពេលដែលសមត្ថកិច្ចចាប់ផ្តើមបើកបន្ទប់លេខ២១០ ដើម្បីត្រួតពិនិត្យ គឺសង្កេតឃើញថារបស់របរនៅក្នុងបន្ទប់មានសភាពរាយប៉ាយ ព្រមទាំងមានដិតដាមដោយឈាមគ្រប់កន្លែងដោយឡែកនៅលើគ្រែដេក គេបានប្រទះឃើញសពនារីវ័យក្មេងម្នាក់ដេកស្លាប់ក្នុងសភាពគ្មានសម្លៀកបំពាក់អ្វីក្រៅពីលីអូ ពណ៌ខ្មៅ មួយនៅជាប់នឹងខ្លួនតែប៉ុណ្ណោះ ដោយមានស្នាមចាក់ចំកណ្តាលដើមទ្រូង ព្រមទាំងស្នាមមុខកាំបិតពេញរាងកាយ។
បន្ទាប់ពីសមត្ថកិច្ចថៃ បានធ្វើការស្រាវជ្រាវរួចមកទើបដឹងថា ជនទាំងពីរនាក់គឺជាជនជាតិថៃដោយភាគីខាងប្រុសមានឈ្មោះ កុម៉ុន កេតឆោម អាយុ៣០ឆ្នាំ រស់នៅឃុំឆានណា ស្រុកស្នៅ ខេត្តនគរស្រីអយុធ្យា ដោយឡែកនារីវ័យក្មេងនេះគេគ្រាន់តែដឹងថា នាងមានអាយុ២០ឆ្នាំ ជានិស្សិតនៃវិទ្យាល័យមួយកន្លែង ក្នុងខេត្តនគរស្រីអយុធ្យា ចំណែកអាស័យដ្ឋានរបស់នាងគឺរស់នៅក្នុងស្រុកប្រាក់ខូនឆ័យ ខេត្តបុរីរ៉ាំ។
បច្ចុប្បន្ន សពត្រូវបានក្រុមតម្រួតថៃរក្សាទុក ដើម្បីប្រគល់ទៅឲ្យក្រុមគ្រួសារ រីឯបុរសដែលរងរបួស គឺកំពុងសម្រាកនៅក្នុងមន្ទីរពេទ្យ ដោយគ្រាន់តែគេដឹងថា ករណីនេះអាចកើតមានឡើងដោយសារភ្លើងប្រច័ណ្ឌ ហើយដើមហេតុយ៉ាងណានោះគឺយើងនៅមិនទាន់ទទួលបាននៅឡើយ៕
លេចឮដំណឹងថា ពលករខ្មែរចាក់សម្លាប់គ្នាព្រោះរឿងភ្លើងប្រច័ណ្ឌបណ្ដាលឲ្យរបួសម្នាក់និងស្លាប់
0 Comments