បាត់ដំបង ៖ នគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ និងព្រះរាជអាជ្ញាអមតុលាការខេត្តបាត់ដំបង កាលពីព្រឹកថ្ងៃទី ០៩ ធ្នូ ឆ្នាំ ២០១៥ បានឆ្មក់ចូលឆែកឆេរលំនៅដ្ឋានលេខ ១៧ ផ្លូវជាតិលេខ ៥សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ដើម្បីរឹបអូសសំបកកង់រថយន្តម៉ាក IRC ដែលឈ្មួញលួចនាំចូលរំលោភលើកម្មសិទ្ធបញ្ញារបស់ក្រុមហ៊ុន គង់ងួនគ្រុប។
នគរបាលរាយការណ៍ឲ្យដឹងថា ក្នុងរយៈពេលចុងក្រោយនេះ មានឈ្មួញលួចនាំចូលសំបកកង់រថយន្តម៉ាក IRC មិនបង់ពន្ធមកលក់ចែកចាយរំលោភលើកម្មសិទ្ធបញ្ញារបស់ ក្រុមហ៊ុនគង់ ងួនដែលនាំចូលផ្ដាច់មុខ។
ដោយសារមានការប្រកួតប្រជែងមិនស្មោះត្រង់ ដូច្នេះហើយទើបក្រុមហ៊ុនគង់ ងួនបានដាក់ពាក្យបណ្ដឹងមកកាន់នគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ។
ក្រោយពីបានពិនិត្យលើពាក្យបណ្ដឹងរួច លោកឧត្តមសេនីយ៍ ជា សុមេធី អគ្គស្នងការរងនគរបាលជាតិ និងជាប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃបានចាត់បញ្ជូនលោកឧត្តមសេនីយ៍ឡុង ស្រេង និងមន្ត្រីជំនាញចុះទៅខេត្តបាត់ដំបង ដើម្បីសហការជាមួយព្រះរាជអាជ្ញាអមតុលាការខេត្ត ដើម្បីធ្វើការត្រួតពិនិត្យជាក់ស្ដែងក្នុងលំនៅដ្ឋានលេខ ១៧ ផ្លូវជាតិលេខ ៥ សង្កាត់ស្វាយប៉ោក្រុងបាត់ដំបង។
ក្នុងការឆែកឆេរនេះសមត្ថកិច្ចបានរឹបអូសសំបកកង់រថយន្តម៉ាក IRC ចំនួន ១២៦ សំបក និងពោះវៀនកង់ចំនួន៦៣០ ដូចការប្ដឹងរបស់ក្រុមហ៊ុនមែន។ ជាមួយគ្នានេះសមត្ថកិច្ចក៏បានឃាត់ខ្លួនម្ចាស់ផ្ទះឈ្មោះ តាន់ គីមឡុង មកធ្វើការសាកសួរផងដែរ។
បច្ចុប្បន្ននគរបាលសេដ្ឋកិច្ចក្រសួងមហាផ្ទៃ បានប្រគល់ផ្ទះឈ្មោះ តាន់ គីមឡុង និងវត្ថុតាងដែលរឹបអូសបានទៅឲ្យនគរបាលការិយាល័យប្រឆាំងបទល្មើសសេដ្ឋកិច្ចខេត្តបាត់ដំបងដើម្បីចាត់ការតាមនីតិវិធី៕
ឆែកផ្ទះឈ្មួញកណ្ដាលក្រុងបាត់ដំបងលួចនាំចូលសំបកកង់រថយន្តរំលោភលើកម្មសិទ្ធបញ្ញា
0 Comments