បន្ទាយមានជ័យ ៖ នៅព្រឹកថ្ងៃទី២៣ ខែធ្នូ ឆ្នាំ២០១៥ កម្លាំងគយបានចុះប្រតិបត្តិការនៃការបង្ក្រាបរថយន្តនាំចូលគេចពន្ធខុសច្បាប់បានចំនួន២គ្រឿង មួយគ្រឿងជ្រកក្រោមស្លាកលេខ ខ.ម។
មន្ត្រីគយម្នាក់បាននិយាយថា មួយរយៈចុងក្រោយនេះវិធានការរីតបន្តឹងប្រមូលពន្ធចូលរដ្ឋទៅលើរថយន្តនាំចូលគេចពន្ធខុសច្បាប់កំពុងតែធ្វើឡើងយ៉ាងក្តៅគគុក ក្រោយពីមានរថយន្តគេចពន្ធចង្កូតស្តាំ និងចង្កូតឆ្វេងស៊េរីទំនើបៗត្រូវបានគេទិញយកប្រើប្រាស់ផ្ទាល់ខ្លួន ហើយជូនកាលប្រើប្រាស់ស្លាកលេខជ្រកក្រោមស្ថាប័នរដ្ឋក៏មានដែរ។
មន្ត្រីគយបាននិយាយបញ្ជាក់ទៀតថា ការនាំចូលរថយន្តលួចលាក់គ្មានការបង់ពន្ធចូលរដ្ឋនោះធ្វើឲ្យរដ្ឋខាតបង់ប្រាក់ពន្ធយ៉ាងធ្ងន់ធ្ងរ។ ជាក់ស្តែងរថយន្តស៊េរីទំនើបចំនួន២គ្រឿង ដែលមានតម្លៃរាប់ម៉ឺនដុល្លារក្នុងនោះ១គ្រឿង ពាក់ស្លាកលេខ ខ.ម ដែលសុទ្ធតែជារថយន្តចង្កូតស្តាំលួចនាំចូលគ្មានបង្កាន់ដៃបង់ពន្ធតាមច្រកក្នុងភូមិសាស្ត្រច្រករបៀង ខេត្តបន្ទាយមានជ័យ រថយន្តទាំង២គ្រឿងមានម៉ាក ហ្វ័ត ពណ៌សំបកឪឡឹក ២បាំង ពាក់ស្លាកលេខខេមរភូមិន្ទ012-7520 ស៊េរីឆ្នាំ២០១៤ និងរថយន្តម៉ាកនីសាន់ ពណ៌ស គ្មានស្លាកលេខស៊េរីឆ្នាំ២០១៣ ត្រូវបានគយបង្ក្រាបបានយកមកបង់ពន្ធតាមច្បាប់។
ជុំវិញបញ្ហារថយន្តចង្កូតស្តាំនេះវិញយោងតាមអនុក្រឹត្យលេខ០១ របស់រាជរដ្ឋាភិបាលបានអនុញ្ញាតឲ្យប្រើប្រាស់ទៅលើរថយន្តពន្លត់អគ្គិភ័យ និងរថយន្តពេទ្យសង្គ្រោះបន្ទាន់តែប៉ុណ្ណោះ រថយន្តដែលទទួលស្គាល់ដោយក្រសួងហិរញ្ញវត្ថុ លុះត្រាតែរថយន្តនោះនៅក្នុងអាំងហ្វង់ទែរបស់រដ្ឋប៉ុណ្ណោះ តាមរយៈនៃការនាំចូលប្រើប្រាស់បំរើក្នុងស្ថាប័នរដ្ឋ។
សូមរំលឹកថាពាក់ព័ន្ធនឹងរថយន្តចង្កូតស្តាំនោះដែរកាលពីក្នុងអំឡុងឆ្នាំ២០០៥សម្ដេចតេជោ ហ៊ុន សែន ប្រមុខរាជរដ្ឋាភិបាលធ្លាប់បានប្រកាសបញ្ចប់ការនាំចូលរថយន្តចង្កូតស្តាំមកចរាចរណ៍នៅក្នុងប្រទេសកម្ពុជា ក៏ប៉ុន្តែបច្ចុប្បន្ននេះគេសង្កេតឃើញរថយន្តចង្កូតស្តាំ ស៊េរីទំនើបៗ ត្រូវបានឈ្មួញខិលខូចលួចនាំចូលយកមកធ្វើអាជីវកម្មលក់ដូរយ៉ាងគគ្រឹកគគ្រេងឡើងវិញ រថយន្តចង្កូតស្តាំខ្លះត្រូវគេមើលឃើញថាបានប្រើប្រាស់ជ្រកក្រោមស្លាកលេខក្នុងស្ថាប័នរដ្ឋ ហើយរថយន្តចង្កូតស្តាំច្រកក្រោមស្លាកលេខស្ថាប័នរដ្ឋមួយចំនួនត្រូវគេមើលឃើញថា កន្លងមកបានយកទៅប្រើប្រាស់ធ្វើជាមធ្យោបាយប្រព្រឹត្តបទល្មើសខុសច្បាប់ទៀតផង៕
គយ ចាប់រថយន្តចង្កូតស្តាំ២គ្រឿងគេចពន្ធ ក្នុងនោះ១គ្រឿងជ្រកក្រោមស្លាកលេខ ខ.ម
0 Comments