បន្ទាយមានជ័យ ៖ ផ្ទៃដីដំណាំស្រូវជួបកង្វះខាតទឹកប្រមាណជាង ៥.០០០ ហិតា របស់បងប្អូនប្រជាកសិករក្នុងឃុំចំនួន ០៤ នៃស្រុកមង្គលបូរី ខេត្តបន្ទាយមានជ័យ កំពុងត្រូវបានក្រុមការងារមន្ទីរធនធានទឹក និងឧតុនិយមខេត្តបន្ទាយមានជ័យ ចុះជួយអន្តរាគមន៍បូមទឹកសង្គ្រោះ។
លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយមខេត្តបន្ទាយមានជ័យ បានប្រាប់ឲ្យដឹងនៅថ្ងៃទី ០៨ ខែវិច្ឆិកា ឆ្នាំ ២០១៥ នេះថា ការងារអន្តរាគមន៍បូមទឹកសង្គ្រោះស្រូវនៅក្នុងស្រុកមង្គលបូរីនេះ គឺក្រុមការងារមន្ទីររបស់លោក ប្រើប្រាស់ម៉ាស៊ីនបូមទឹកខ្នាតមធ្យម (៦៥សេះ) ចំនួន ០៦ គ្រឿង ម៉ាស៊ីនបូមទឹកខ្នាតធំ ចំនួន ០១ គ្រឿង និងម៉ាស៊ីនស្ថានីយបណ្តែតទឹក ចំនួន ០១គ្រឿង ដើម្បីបូមយកទឹកពីស្ទឹងមង្គលបូរី មកសង្គ្រោះដំណាំស្រូវស្ថិតក្នុងឃុំសឿ ចំនួន ១.៩២៧ ហិតា, ឃុំគុយម៉ែង ចំនួន ១.៤០០ ហិតា, ឃុំរហាត់ទឹក និងឃុំភ្នំធំ សរុបចំនួន ១.៧៥២ ហិតា។
លោក យឹម ប៊ុនរ៉ុម បានបន្តថា គិតចាប់ពីថ្ងៃចុះជួយអន្តរាគមន៍ កាលពីថ្ងៃទី ០៤ ខែវិច្ឆិកា ឆ្នាំ២០១៥ រហូតមកដល់ពេលនេះ ផ្ទៃដីស្រូវប្រមាណជាង ២.០០០ហិតា ត្រូវបានសង្គ្រោះជាបន្តបន្ទាប់ ក្នុងនោះមានឃុំសឿ យើងសង្គ្រោះបានចំនួន ៩៩៧ ហិតា, ឃុំគុយម៉ែង ចំនួន ៣៧៨ ហិកតា, ឃុំរហាត់ទឹក និងឃុំភ្នំធំ បានចំនួន ៦៩៨ ហិតា។
លោកបន្តថា ក្រុមការងាររបស់លោកកំពុងប្រឹងប្រែងឲ្យអស់លទ្ធភាព ដើម្បីបន្តអន្តរាគមន៍សង្គ្រោះផ្ទៃដីដែលនៅសេសសល់ បើទោះបីជាផ្ទៃដីមួយចំនួនប្រជាកសិករបានដាំដុះនៅឆ្ងាយពីប្រភពទឹក។
លោកប្រធានមន្ទីរ បានបញ្ជាក់បន្ថែមថា ការងារបង្កបង្កើនផលស្រូវប្រាំងក្នុងខេត្តបន្ទាយមានជ័យ ប្រជាកសិករ បាន និងកំពុងធ្វើលើសផែនការដែលបានដាក់ចុះ ពោលគឺបានចំនួន ១៩.៣២៨ ហិតា ស្មើនឹង ១៦១ ភាគរយនៃផែនការ និងកំពុងបន្តដាំដុះ។ ចំពោះស្រូវវស្សាវិញ មកដល់ពេលនេះ ប្រជាកសិករប្រមូលផលបានចំនួន ១៣២.០០០ ហិតា ស្មើនឹងជាង ៥៣ភាគរយ នៃផ្ទៃដីផលិតបាន៕
មន្ទីរធនធានទឹក ខេត្តបន្ទាយមានជ័យ ចុះជួយអន្តរាគមន៍បូមទឹកសង្គ្រោះ ស្រូវប្រាំងប្រមាណជាង ៥.០០០ ហិតា
0 Comments