បាត់ដំបង ៖ ទីតាំងជល់មាន់មួយកន្លែង ដែលស្ទើរតែដុះស្លែទៅហើយនោះ កំពុងតែសំងំសុខយ៉ាងរំភើយ គ្មានខ្វល់ពីរឿងអ្វីទាំងអស់ គឺគេគិតតែប្រមូលផ្តុំគ្នាស្រែកហ៊ោកញ្ជ្រៀវដើម្បីដេញថ្លៃគ្នាទៅលើសត្វមាន់ ដែលកំពុងប្រជល់គ្នាតែប៉ុណ្ណោះ រីឯសមត្ថកិច្ចក៏អត់ខ្វល់ឬឈឺក្បាលនឹងការបង្ក្រាប។
ទីតាំងនេះ គឺគេបើកដំណើរការនៅរៀងរាល់ថ្ងៃច័ន្ទ អង្គារ និងសុក្រ ស្ថិតនៅក្នុងភូមិកោងកាងឃុំបន្សាយត្រែង ស្រុកថ្មគោល ខេត្តបាត់ដំបង ដោយម្ចាស់សង្វៀននេះមានឈ្មោះ ម៉ៅដែលត្រូវជាពូជពង្សវង្សត្រកូល របស់លោកសាន ដែលអតីតគឺជាមេសង្វៀនជល់មាន់ដ៏ធំប្រចាំឃុំបន្សាយត្រែង ស្រុកថ្មគោលនេះ។
ប្រភពជាច្រើនបាននិយាយថា បន្ទាប់ពីឪពុកមារបស់គេឈប់លេងប្រហែលមួយឆ្នាំរួចមកក្មួយរបស់គេបានចាប់ផ្តើមបន្ត គឺមានន័យថាស្នងត្រកូលបន្តពីឪពុកមា ដោយគេបានបើកលេងយ៉ាងសប្បាយគ្មានខ្វល់នឹងការបង្ក្រាបរបស់សមត្ថកិច្ចឡើយ នេះទំនងជាមានការត្រូវរ៉ូវគ្នាផងក៏មិនដឹង បានជាគេមានសិទ្ធិបើកយ៉ាងចំហបែបនេះ។
នៅតាមផ្លូវចូលកាត់តាមចំការមុននឹងទៅដល់សង្វៀនជល់មាន់ គឺមាននារីដ៏ស្រស់ស្អាតម្នាក់នៅអង្គុយចាំយកលុយ ដោយម្នាក់ៗត្រូវបង់ចំនួន៤ពាន់រៀល ដើម្បីចូលទៅទស្សនាឬក៏ចូលទៅភ្នាល់គ្នាជាដើម ដោយគេមានថែមទឹកសុទ្ធមួយដបផង ដែលជាការលើកទឹកចិត្តដល់អ្នកដែលចូលទៅទស្សនា ក្នុងបរិវេណចំការចេកនេះ។
ប្រភពជាច្រើនកំពុងតែធ្វើការរិះគន់ថា តើពេលនេះសមត្ថកិច្ចទៅណាបាត់អស់ហើយឬមួយក៏កំពុងតែដេកលក់ បានជាមិនបានដឹងថា មានគេបើកសង្វៀនជល់មាន់ដ៏ធំនៅក្បែរក្លៀកបែបនេះ ហើយជើងកាង ដែលជាម្ចាស់សង្វៀននោះមានឈ្មោះ ម៉ៅ ត្រូវជាក្មួយលោកសាន នៅក្នុងភូមិកោងកាង នេះសោះអញ្ចឹង? បើយ៉ាងដូច្នេះមែន ប្រាកដជាគោលនយោបាយភូមិ ឃុំមានសុវត្ថិភាព ទៅជាគ្មានសុវត្ថិភាពវិញជាមិនខាន៕
សង្វៀនជល់មាន់ដុះស្លែមួយកន្លែង សមត្ថកិច្ចអត់ខ្វល់បង្ក្រាប
0 Comments