រដ្ឋមន្ត្រីការបរទេសសហរដ្ឋអាមេរិកលោក John Kerry និងរដ្ឋមន្ត្រីការបរទេសរុស្ស៊ីលោក Sergey Lavrov បាននិយាយបន្ទាប់ពីកិច្ចពិភាក្សាក្នុងទីក្រុងមូស្គូថា ប្រទេសរុស្ស៊ី និងសហរដ្ឋអាមេរិកបានឯកភាពគ្នាលើបញ្ហា “សំខាន់ៗ” មួយចំនួនជាពិសេសទាក់ទងទៅនឹងប្រទេសស៊ីរី។
លោក Kerry បានប្រាប់អ្នកកាសែតបន្ទាប់ពីបានជួបជាមួយលោកប្រធានាធិបតីរុស្ស៊ី Vladimir Putin និងរដ្ឋមន្ត្រីការបរទេសលោក Sergei Lavrov កាលពីថ្ងៃអង្គារថា “សហរដ្ឋអាមេរិកត្រៀមខ្លួនរួចជាស្រេច ដើម្បីធ្វើការជាមួយប្រទេសរុស្ស៊ី”។
លោក Kerry បាននិយាយថា “បើទោះបីជាមានភាពខុសគ្នារវាងប្រទេសរបស់យើងក៏ដោយ យើងបានបង្ហាញថា នៅពេលដែលសហរដ្ឋអាមេរិក និងរុស្ស៊ីស្ថិតនៅទិសដៅដូចគ្នា ការរីកចម្រើនអាចនឹងបង្កើតឡើង”។
លោក Lavrov បានប្រាប់អ្នកកាសែតថា ទីក្រុងមូស្គូ និងទីក្រុងវ៉ាស៊ីនតោនបានបញ្ជាក់ពីកិច្ចព្រមព្រៀងពីលើកមុនរបស់ពួកគេ ដើម្បីធ្វើការរួមគ្នាប្រយុទ្ធប្រឆាំងនឹង “បិសាច” នៃក្រុមរដ្ឋឥស្លាមនៅក្នុងប្រទេសស៊ីរី។ លោកបានបន្ថែមថា ជំហានជាក់ស្តែងមួយចំនួន ដើម្បីជំរុញកិច្ចខិតខំប្រឹងប្រែងនេះត្រូវបានយល់ព្រមនៅក្នុងកិច្ចប្រជុំ។
រដ្ឋមន្ត្រីការបរទេសរុស្ស៊ីរូបនេះបាននិយាយថា “យើងបានបញ្ជាក់ពីព្រមព្រៀងមួយ ដែលសម្រេចដោយកងយោធារបស់ប្រទេសរុស្ស៊ី និងសហរដ្ឋអាមេរិករួមទាំងកិច្ចព្រមព្រៀងដែលបានអនុវត្តចំពោះក្រុមចម្រុះដឹកនាំដោយអាមេរិកធ្វើការប្រឆាំងនឹងក្រុម ISIS ប្រកបដោយប្រសិទ្ធភាពផងដែរ” ។
ដោយឡែករដ្ឋមន្ត្រីការបរទេសអាមេរិកបាននិយាយថា “ប្រទេសរុស្ស៊ី និងសហរដ្ឋអាមេរិកបានយល់ស្របគ្នាថា អ្នកមិនអាចកម្ចាត់ក្រុម ISIS ដោយគ្មានការបន្ថយការប្រយុទ្ធនៅក្នុងប្រទេសស៊ីរីបាននោះទេ”។ លោកបានបន្ថែមថា ទាំងទីក្រុងមូស្គូ និងទីក្រុងវ៉ាស៊ីនតោនបានផ្ដោតលើដំណើរការនយោបាយ ហើយថា ពលរដ្ឋស៊ីរីនឹងត្រូវធ្វើការសម្រេចចិត្តពីអនាគតរបស់ប្រទេសស៊ីរី។
លោក Kerry ក៏បាននិយាយផងដែរថា ទីក្រុងមូស្គូ និងទីក្រុងវ៉ាស៊ីនតោនបានរកឃើញ “មូលដ្ឋានរួម” ដែលក្រុមប្រឆាំងគួរតែចូលរួមក្នុងកិច្ចចរចាសន្តិភាពស៊ីរី។
លោក Lavrov បានបញ្ជាក់ថា កិច្ចប្រជុំមួយនៃប្រទេសមហាអំណាចពិភពលោកស្ដីពីប្រទេសស៊ីរីនៅថ្ងៃសុក្រក្នុងទីក្រុងញូវយ៉កនឹងដំណើរការទៅមុខ។
លោក Lavrov បាននិយាយទៀតថា គម្រោងមួយសម្រាប់សេចក្ដីសម្រេចស្ដីពីប្រទេសស៊ីរីត្រូវបានគេរំពឹងថា នឹងត្រៀមខ្លួនរួចជាស្រេចសម្រាប់ការបង្ហាញទៅកាន់ក្រុមប្រឹក្សាសន្តិសុខអង្គការសហប្រជាជាតិ បន្ទាប់ពីកិច្ចប្រជុំនៅថ្ងៃសុក្រនេះ។
លោក Lavrov បានលើកឡើងថា “យើងបានជួបគ្នានៅថ្ងៃនេះមិនមែនតែក្នុងនាមជាប្រទេសរុស្ស៊ី និងសហរដ្ឋអាមេរិកប៉ុណ្ណោះទេ ប៉ុន្តែក៏ថែមទាំងសមាជិកដទៃទៀតនៃក្រុមអន្តរជាតិដែលគាំទ្រស៊ីរីផងដែរ”។
ដោយឡែកលោក Putin បាននិយាយមុនពេលចាប់ផ្តើមនៃកិច្ចប្រជុំនេះថា ប្រទេសរុស្ស៊ី និងសហរដ្ឋអាមេរិកកំពុងស្វែងរកដំណោះស្រាយចំពោះវិបត្តិដ៏សំខាន់បំផុតនេះជាមួយគ្នា។ លោកបានបន្ថែមទៀតថា លោកសប្បាយរីករាយសម្រាប់ឱកាសជួប និងពិភាក្សានេះ៕
RT
រុស្ស៊ី និងសហរដ្ឋអាមេរិកឯកភាពគ្នាលើបញ្ហាសំខាន់ៗមួយចំនួនស្ដីពី ប្រទេសស៊ីរី
0 Comments