ភ្នំពេញ ៖ មុខសញ្ញាចោរជំនាញខាងលួចរថយន្តស៊េរីទំនើបម្នាក់ ត្រូវបានកម្លាំងអាវុធហត្ថខណ្ឌដូនពេញឃាត់ខ្លួនព្រមទាំងដកហូតវត្ថុតាងរថយន្ត ម៉ាកRang Roverស៊េរី២០១៥មួយគ្រឿងកាលពីវេលាម៉ោងម៉ោង១៥និង៤៥នាទីរសៀលថ្ងៃទី១៥ ខែធ្នូ ឆ្នាំ២០១៥ចំណុចខាងក្រោយកាស៊ីណូណាហ្គាក្នុងសង្កាត់ទន្លេបាសាក់ ចំការមន។
មន្ត្រីអាវុធហត្ថខណ្ឌដូនពេញបានឲ្យដឹងថា ជនសង្ស័យដែលឃាត់ខ្លួនម្នាក់ ករណីលួចរថយន្តនេះឈ្មោះ ហេង ថៃ ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅផ្ទះលេខ១៩៨ ខណ្ឌ៧មករា រាជធានីភ្នំពេញ។ ចំណែកវត្ថុតាងដែលដកហូតបានរថយន្ត០១គ្រឿងម៉ាកRang Rover ពណ៌ប្រផេះស៊េរី២០១៥ ពាក់ស្លាកលេខភ្នំពេញ 2AD2622 ជារបស់ជនរងគ្រោះជនជាតិចិនម្នាក់មានមុខរបរបុគ្គលិកក្រុមហ៊ុនស្នាក់នៅខនដូមួយ នៅរាជធានីភ្នំពេញ។
មន្ត្រីអាវុធហត្ថខណ្ឌដូនពេញបានឲ្យដឹងថា កាលពីថ្ងៃបុណ្យអុំទូកទី១ ត្រូវជាថ្ងៃទី២៤ ខែវិច្ឆិកា ឆ្នាំ២០១៥ មានហេតុការណ៍ភ្ញាក់ផ្អើលមួយ ដោយបុរសជនជាតិចិនម្នាក់បានបាត់រថយន្ត ម៉ាកRang Rover ស៊េរី២០១៥ ពណ៌ប្រផេះ ពាក់ស្លាកលេខភ្នំពេញ2AD:2622 ខណៈជិះមកចូលម៉ាស្សានៅចំណុចហាងម៉ាស្សាយីហោ(ឡាក់គី )នៅក្នុងមូលដ្ឋានសង្កាត់បឹងរាំង ខណ្ឌដូនពេញ។
មន្ត្រីអាវុធហត្ថខណ្ឌដូនពេញបានបន្តទៀតថា បន្ទាប់ពីទទួលបាននូវពាក្យបណ្ដឹងរបស់ជនរងគ្រោះជនជាតិចិនរូបនោះ ហើយកម្លាំងជំនាញនៃកងរាជអាវុធហត្ថខណ្ឌដូនពេញ និងកម្លាំងកងរាជអាវុធហត្ថរាជធានីភ្នំពេញបានសហការគ្នាស្រាវជ្រាវរហូតមកដល់ថ្ងៃទី១៥ ខែធ្នូ ឆ្នាំ២០១៥នេះបានឮដំណឹងថា មានគេចង់លក់រថយន្ត ម៉ាក Rang Rover អត់ពន្ធមួយគ្រឿង ដោយទទួលបានព័ត៌មានដូច្នេះហើយកម្លាំងជំនាញបានប្រើល្បិចណាត់ជួបអ្នកលក់រថយន្តនោះ ដើម្បីមើលនៅចំណុចខាងក្រោយកាស៊ីណូណាហ្គានៅក្នុងសង្កាត់ទន្លេបាក់ ខណ្ឌចំការមន ស្រាប់តែឃើញរថយន្ត ម៉ាក Rang Rover មួយគ្រឿងនោះ ដែលជនជាតិចិនបានបាត់កាលពីថ្ងៃបុណ្យអុំទូកទី១ពិតប្រាកដ នៅមិនទាន់ដោះស្លាកលេខចេញនៅឡើយ ដោយឃើញដូច្នេះទើបកម្លាំងជំនាញបានឃាត់ជនសង្ស័យរូបនោះព្រមទាំងដកហូតវត្ថុតាងរថយន្តរបស់ជនរងគ្រោះមកវិញផងដែរ។
មន្ត្រីអាវុធហត្ថខណ្ឌដូនពេញបានឲ្យដឹងថា ទាំងជនសង្ស័យ និងវត្ថុតាងត្រូវបានបញ្ជូនបន្តទៅទីបញ្ជាការអាវុធហត្ថរាជធានីភ្នំពេញ ដើម្បីចាត់ការតាមនីតិវិធីច្បាប់៕
ចោរសង្ហាម្នាក់លួចរថយន្ត Rang Rover ស៊េរី២០១៥ ជិះបានជាងកន្លះខែជាប់អន្ទាក់ប៉េអិម
0 Comments